ការកើនឡើងនូវភាពមិនសប្បាយចិត្ត ក្នុងចំណោមមនុស្សវ័យក្មេង បានធ្វើឲ្យសហរដ្ឋអាមេរិក និងបណ្តាប្រទេសអឺរ៉ុបខាងលិចធំៗមួយចំនួនធ្លាក់ចុះសន្ទស្សន៍សុខុមាលភាពសកល ខណៈដែលបណ្ដាប្រទេសអឺរ៉ុបខាង បន្តកាន់កាប់ចំណាត់ថ្នាក់របស់ពួកគេនៅទីកំពូល។

របាយការណ៍សុភមង្គលពិភពលោកប្រចាំឆ្នាំ ដែលត្រូវបានចេញផ្សាយក្នុងឆ្នាំ២០១២ ដើម្បីគាំទ្រដល់គោលដៅអភិវឌ្ឍន៍ប្រកបដោយនិរន្តរភាពរបស់អង្គការសហប្រជាជាតិ (UN) គឺផ្អែកលើទិន្នន័យពីក្រុមហ៊ុនស្រាវជ្រាវទីផ្សាររបស់សហរដ្ឋអាមេរិក Gallup ដែលវិភាគដោយក្រុមសកលលោកដែលឥឡូវនេះដឹកនាំដោយសាកលវិទ្យាល័យ Oxford។

ប្រជាជននៅក្នុងប្រទេស និងដែនដីចំនួន១៤៣ ត្រូវបានស្នើសុំឲ្យវាយតម្លៃពីជីវិតរបស់ពួកគេលើមាត្រដ្ឋានពីសូន្យដល់១០ ដោយលេខ១០ តំណាងឲ្យការមានជីវិតល្អប្រសើរបំផុតរបស់ពួកគេ។ លទ្ធផលក្នុងរយៈពេល ២-៣ឆ្នាំកន្លងមកនេះ គឺជាមធ្យមភាគដើម្បីបង្កើតចំណាត់ថ្នាក់។ ការវាយតម្លៃបង្ហាញថា ប្រទេសហ្វាំងឡង់នៅតែស្ថិតក្នុងចំណាត់ថ្នាក់កំពូល ដោយទទួលបានពិន្ទុជាមធ្យម ៧,៧ តាមពីក្រោយដោយប្រទេសដាណឺម៉ាក អ៊ីស្លង់ និងស៊ុយអែត ខណៈអាហ្វហ្គានីស្ថាន និងលីបង់ ឈរនៅចំណាត់ថ្នាក់ក្រោមគេបំផុត ដោយមានពិន្ទុ ១,៧ និង ២,៧ រៀងគ្នា។

ក្នុងន័យទូលំទូលាយ ការវាយតម្លៃចំណាត់ថ្នាក់មានទំនាក់ទំនងខ្លះជាមួយនឹងភាពរុងរឿងរបស់ប្រទេស ប៉ុន្តែកត្តាផ្សេងទៀត ដូចជាអាយុសង្ឃឹមរស់ ចំណងសង្គម សេរីភាពផ្ទាល់ខ្លួន និងអំពើពុករលួយ ក៏មានឥទ្ធិពលលើការវាយតម្លៃរបស់មនុស្សម្នាក់ៗផងដែរ។

ជាមួយគ្នានេះ របាយការណ៍បានបង្ហាញថា សហរដ្ឋអាមេរិកបានធ្លាក់ចេញពីចំណាត់ថ្នាក់កំពូលទាំង ២០ជាលើកដំបូង ដោយឈរនៅចំណាត់ថ្នាក់ទី២៣ ដែលធ្លាក់ពីចំណាត់ថ្នាក់ទី១៥ កាលពីឆ្នាំមុន ហើយបច្ច័យនៃការធ្លាក់ចុះនេះ គឺដោយសារតែការធ្លាក់ចុះយ៉ាងខ្លាំងក្លានៃអារម្មណ៍សុខុមាលភាពរបស់ជនជាតិអាមេរិកដែលមានអាយុក្រោម ៣០ឆ្នាំ៕