រដ្ឋមន្រ្តីការបរទេសអង់គ្លេសលោក David Cameron និយាយនៅថ្ងៃពុធនេះថា ជម្លោះបង្ហូរឈាមគ្នានៅមីយ៉ាន់ម៉ាគ្រប់គ្រងដោយយោធា បច្ចុប្បន្នគឺជា “សង្រ្គាមស៊ីវិលចម្រុះភាគី” ហើយមាននូវតម្រូវការមួយឲ្យអតីតអាណានិគមនអង់គ្លេស ប្លុកអាស៊ាន និងប្រទេសដទៃជាច្រើនទៀត បង្កើនកិច្ចខិតខំ និងជួយបញ្ចប់សង្រ្គាមមួយនេះ ។

លោកនិយាយថា លោកសង្ឃឹមថាអង់គ្លេសអាចដើរតួក្នុងការធានាដល់ជំនួយដែលអាចទៅដល់មនុស្សត្រូវការខ្លាំងបំផុតនៅមីយ៉ាន់ម៉ា ក្រោយពួកគេជាប់ផុងក្នុងសង្រ្គាមរវាងរដ្ឋាភិបាលមីយ៉ាន់ម៉ា និងចលនាតស៊ូប្រដាប់អាវុធ ហើយនិងក្រុមឧទ្ទាមជនជាតិដើមភាគតិច ។

គួរឲ្យដឹងថា លោក Cameron ស្ថិតក្នុងខេត្តនគររាជសីមា ស្ថិតនៅភាគឦសានប្រទេសថៃ ដើម្បីអង្កេតយន្តហោះចម្បាំង Gripen ផលិតឡើងដោយក្រុមហ៊ុន Saab របស់ស៊ុយអែត រួមកិច្ចសហប្រតិបត្តិការជាមួយក្រុមហ៊ុនអង់គ្លេស ។

លោកសង្ឃឹមថា ថៃនឹងទិញយន្តហោះបន្ថែមទៀតនៅក្នុងកិច្ចព្រមព្រៀងមិនច្បាស់លាស់មួយដែលលោកនិយាយថា នឹងទ្រទ្រង់សេដ្ឋកិច្ចអង់គ្លេសនូវថវិកា ៤០០លានផោន(ស្មើនឹង៥០៨,៦៤លានដុល្លារ) ។

លោក Cameron និយាយផងដែរថា ភាពជាដៃគូយុទ្ធសាស្រ្តនឹងត្រូវចុះហត្ថលេខារវាងអង់គ្លេស និងថៃ ដែលនឹងធ្វើឲ្យទំនាក់ទំនងប្រទេសទាំង ២ឈានដល់កម្រិតថ្មី ៕