ក្នុងព្រឹត្តិការណ៍មួយនៅឯអង្គការសហប្រជាជាតិ (UN) កាលពីថ្ងៃទី១៨ ខែមីនា គ្រូពេទ្យលោកខាងលិចដែលបានទៅកាន់ដែនដីប៉ាឡេស្ទីនក្នុងប៉ុន្មានខែថ្មីៗនេះ បានប្រាប់ថា ប្រព័ន្ធថែទាំសុខភាព នៅតំបន់ហ្កាហ្សា បានដួលរលំយ៉ាងធ្ងន់ធ្ងរ ដោយពួកគេបាននិយាយអំពី «អំពើឃោរឃៅដ៏គួរឲ្យភ័យខ្លាច» ពីការវាយលុករបស់អ៊ីស្រាអែល។

គ្រូពេទ្យ ៤រូបមកពីសហរដ្ឋអាមេរិក ចក្រភពអង់គ្លេស និងបារាំង បាន និងកំពុងធ្វើការជាមួយក្រុមនានា នៅតំបន់ហ្កាហ្សា ដើម្បីគាំទ្រដល់ប្រព័ន្ធថែទាំសុខភាពរបស់តំបន់នេះ ដែលបាន និងកំពុងរង្គោះរង្គើ ចាប់តាំងពីអ៊ីស្រាអែលបានចាប់ផ្តើមការវាយប្រហារយោធានៅទីនោះ ក្នុងខែតុលា ឆ្នាំ២០២៣។

គួរបញ្ជាក់ថា បើយោងតាមក្រសួងសុខាភិបាលរបស់តំបន់ហ្កាហ្សា បានឲ្យដឹងថា ការវាយលុករបស់អ៊ីស្រាអែល បានធ្វើប្រជាជនជិត ២,៣លាននាក់ភៀសខ្លួន បណ្តាលឲ្យកើតមានវិបត្តិអត់ឃ្លាន បំផ្លិចបំផ្លាញតំបន់ភាគច្រើន និងបានសម្លាប់មនុស្សជាង ៣១.០០០នាក់។

លោកវេជ្ជបណ្ឌិត Nick Maynard ជាគ្រូពេទ្យផ្នែកវះកាត់ដែលមានវត្តមានចុងក្រោយ នៅតំបន់ហ្កាហ្សា កាលពីខែមករា ជាមួយអង្គការជំនួយផ្នែកវេជ្ជសាស្រ្តរបស់អង់គ្លេស សម្រាប់ប៉ាឡេស្ទីន បាននិយាយឡើងវិញថា លោកបានឃើញកុមារីម្នាក់រលាកយ៉ាងធ្ងន់ធ្ងរ រហូតអាចមើលឃើញឆ្អឹងផ្ទៃមុខរបស់កុមារីនោះ។

នៅឯព្រឹត្តិការណ៍ក្នុងទីស្នាក់ការកណ្តាលរបស់ UN នៅទីក្រុងញូវយ៉ក សហរដ្ឋអាមេរិក វេជ្ជបណ្ឌិត Maynard ដែលជាគ្រូពេទ្យវះកាត់ផ្នែកជំងឺមហារីកនោះ បានប្រាប់ថា៖ «យើងដឹងថា ឱកាសរស់រានរបស់កុមារីនោះ មិនមានទេ ប៉ុន្តែមិនមានថ្នាំម៉រហ្វីន (ថ្នាំបំបាត់ការឈឺចាប់) ផ្តល់ឲ្យនាងទេ។ ដូច្នេះ កុមារីនោះមិនត្រឹមតែត្រូវស្លាប់ដោយជៀសមិនរួចប៉ុណ្ណោះទេ ប៉ុន្តែនាងនឹងស្លាប់ក្នុងសភាពឈឺចាប់ខ្លាំងបំផុត»៕