រដ្ឋមន្ត្រីការបរទេសអូស្ត្រាលី លោកស្រី Penny Wong នៅថ្ងៃពុធ (ទី២០ ខែមីនា) នេះ បាននិយាយថា លោកស្រីបានពិភាក្សាអំពីផលប្រយោជន៍រួមជាច្រើនជាមួយសមភាគីចិនរបស់លោកស្រី គឺលោក Wang Yi ហើយថា រដ្ឋាភិបាលលោកស្រីនឹងព្យាយាមដោះស្រាយការខ្វែងគំនិតគ្នាជាមួយប្រទេសចិនដោយភាពឈ្លាសវៃ។

លោកស្រី Wong បានប្រាប់ថា លោកស្រីបានលើកឡើងពីការព្រួយបារម្ភរបស់ប្រទេសអូស្ត្រាលីអំពីសិទ្ធិមនុស្ស ក្នុងនោះរួមទាំងនៅតំបន់ Xinjiang ទីបេ និងទីក្រុងហុងកុង ហើយនិងការកាត់ទោសអ្នកនិពន្ធជនជាតិចិន-អូស្ត្រាលីលោក Yang Hengjun ក្នុងជំនួបរបស់លោកស្រីជាមួយលោក Wang នៅទីក្រុង Canberra។ ហើយលោកស្រីបានបន្ថែមថា ជាមួយគ្នានេះ ប្រទេសអូស្ត្រាលីស្វាគមន៍ចំពោះការវិវត្តនៃការដកចេញនូវរបាំងពាណិជ្ជកម្មលើស្រូវបាឡេ និងស្រាផងដែរ។

លើសពីនេះទៀត លោកស្រី Wong ក៏បាននិយាយផងដែរថា ប្រទេសអូស្ត្រាលីនឹងរៀបចំឲ្យមានដំណើរទស្សនកិច្ចរបស់នាយករដ្ឋមន្ត្រីចិន លោក Li Qiang នៅចុងឆ្នាំនេះ ប៉ុន្តែមិនបានផ្តល់ពេលវេលាជាក់លាក់នោះឡើយ។

គួរបញ្ជាក់ថា លើកចុងក្រោយដែលរដ្ឋមន្ត្រីការបរទេសចិន បានធ្វើទស្សនកិច្ចនៅប្រទេសអូស្ត្រាលី គឺក្នុងឆ្នាំ២០១៧ ហើយដំណើរទស្សនកិច្ចរបស់លោក Wang Yi បានបង្ហាញពីការផ្សះផ្សាទំនាក់ទំនងការទូតឡើងវិញ៕