សាក្សី និងប្រព័ន្ធផ្សព្វផ្សាយក្នុងស្រុក បានឲ្យដឹងថា គ្មានអ្នកដេញថ្លៃបង្ហាញវត្តមាននៅឡើយទេ នាថ្ងៃពុធ (ទី២០ ខែមីនា) នេះ សម្រាប់ការដាក់លក់ នៅសហភាពមីយ៉ាន់ម៉ា នូវផ្ទះរបស់អតីតមេដឹកនាំជាប់ពន្ធនាគារលោកស្រី Aung San Suu Kyi (អ៊ុង សាន ស៊ូជី) ដែលតម្លៃចាប់ផ្តើមដេញថ្លៃ ត្រូវបានកំណត់ប្រហែល ៩០លានដុល្លារ។

គេហដ្ឋានលក្ខណៈគ្រួសារ នៅមាត់បឹង Inye ក្នុងទីក្រុង Yangon ដែលមានទំហំ ០,៧៨ហិកតា ត្រូវបានដាក់លក់ដេញថ្លៃតាមការបញ្ជារបស់តុលាការកំពូល បន្ទាប់ពីមានជម្លោះផ្លូវច្បាប់អស់រយៈពេលជាច្រើនឆ្នាំ រវាងលោកស្រី ស៊ូជី ដែលត្រូវបានទម្លាក់ចេញពីអំណាចដោយរដ្ឋប្រហារឆ្នាំ២០២១ និងបងប្រុសរបស់លោកស្រី គឺលោក Aung San Oo (អ៊ុង សាន អូ)។

ដោយនិយាយក្នុងលក្ខខណ្ឌមិនបញ្ចេញឈ្មោះដោយសារតែភាពរសើបនៃបញ្ហានេះ សាក្សីបានប្រាប់សារព័ត៌មាន Reuters ថា៖ «គ្មានអ្នកទិញលេចមុខឡើងនោះទេថ្ងៃនេះ ដូច្នេះមន្ត្រីទទួលបន្ទុកការដេញថ្លៃ បាននាំគ្នាចាកចេញអស់ហើយ»។

ព័ត៌មាននេះក៏ត្រូវបានរាយការណ៍ដោយសារព័ត៌មាន BBC ភូមាផងដែរ។ លោក អ៊ុង សាន អូ មិនអាចទាក់ទងសុំការអត្ថាធិប្បាយបានភ្លាមៗនោះទេ។ ចំណែកអ្នកនាំពាក្យរដ្ឋាភិបាលយោធាមីយ៉ាន់ម៉ា ក៏មិនបានឆ្លើយតបភ្លាមៗនោះដែរ ចំពោះកិច្ចខិតខំប្រឹងប្រែងស្វែងរកការអធិប្បាយ។

គួរបញ្ជាក់ថា ម្ចាស់ជ័យលាភីពានរង្វាន់ណូបែល លោកស្រី ស៊ូជី កំពុងជាប់ឃុំក្នុងពន្ធនាគាររយៈពេល ២៧ឆ្នាំ នៅទីតាំងមួយកន្លែងដែលមិនត្រូវបានបញ្ចេញឲ្យដឹង ពាក់ព័ន្ធនឹងបទល្មើសជាច្រើនដែលអ្នកគាំទ្រលោកស្រីនិយាយថា ជាការប្រឌិត៕