កម្មករអណ្តែងរ៉ែរាប់រយនាក់នៅតាមអណ្តូងរ៉ែសំណ ស័ង្កសី និងប្រាក់គ្រប់គ្រងដោយរដ្ឋ បានរៀបចំពិធីបុណ្យតមអាហាររ៉ាម៉ាដានក្នុងជម្រៅក្រោមដី ៨០០ម៉ែត្រ នៅកូសូវ៉ូ គឺជាប្រទេសមួយដែលពលរដ្ឋភាគច្រើនរបស់ពួកគេគឺជាជនមូស្លីម ។

ក្រោយប្តូរវេននៅជម្រៅក្រោមដី ៨០០ម៉ែត្រដ៏ក្តៅជិត ៤០អង្សាសេក្នុងអណ្តូងរ៉ែ Trepca ស្ថិតនៅតំបន់ Stanterg ភាគខាងជើងកូសូវ៉ូ លោក Emin Hasani ស្ថិតនៅក្នុងចំណោមកម្មករអណ្តូងរ៉ែកូសូវ៉ូ ដែលនាំគ្នាមើលម៉ោង ដើម្បីដឹងពីពេលដែលថ្ងៃលិច និងពេលត្រូវទទួលទានអាហារ ។

អង្គុយនៅជុំវិញតុតូចមួយក្នុងការិយាល័យបណ្តោះអាសន្ននៃអណ្តូងរ៉ែ លោក Hasani និងសហការី ៤នាក់ទៀត បានយកផ្លែលម៉ើ ទឹកដោះគោជូ និងឈីស មកទទួលទានជាមួយតែស្ក ។

បុរសទាំងអស់នេះ សើចសប្បាយ និងជជែកគ្នាលេង ពេលដែលពួកគេចែករំលែកចំណីអាហារ ក្រោយតមអាហារអស់រយៈពេល ១ថ្ងៃ ចន្លោះពីថ្ងៃរះ និងថ្ងៃលិច អំឡុងខែមូស្លីមដ៏ពិសិដ្ឋរ៉ាម៉ាដាន ។

លោក Hasani និយាយថា លោកមានអារម្មណ៍ថាបាននៅកាន់តែកៀកជាមួយព្រះ ពេលដែលលោកទទួលទានអាហារនៅក្រោមដី អំឡុងពិធីបុណ្យរ៉ាម៉ាដានបែបនេះ ។

សូមបញ្ជាក់ថា អណ្តូងរ៉ែ Trepca បានជួលកម្មករជាង ២២.០០០នាក់ អំឡុងទសវត្សរ៍ឆ្នាំ ១៩៧០ និងទសវត្សរ៍ ៨០ និងស្មើនឹង ២ ភាគ ៣នៃផលិតផលក្នុងស្រុកសរុប(GDP)របស់កូសូវ៉ូ ប៉ុន្តែបច្ចុប្បន្នពួកគេជួលកម្មករត្រឹមតែ ៣ពាន់នាក់ប៉ុណ្ណោះ ៕