ឆ្មាំល្បាតឆ្នេរបាននិយាយថា មនុស្សយ៉ាងហោចណាស់ ៨នាក់បានស្លាប់ បន្ទាប់ពីនាវាដឹកប្រេងដែលមានទង់ជាតិកូរ៉េខាងត្បូង ១គ្រឿង បានក្រឡាប់នៅម្ដុំសមុទ្រប្រទេសជប៉ុន នាថ្ងៃពុធ (ទី២០ ខែមីនា) នេះ ដោយបានច្រានចោលនូវសេចក្តីថ្លែងការណ៍មុនរបស់ខ្លួនដែលថា អ្នកនៅលើនាវាត្រូវបានជួយសង្គ្រោះនោះ។

អ្នកនាំពាក្យម្នាក់បានប្រាប់សារព័ត៌មាន AFP ថា៖ «ពួកគេត្រូវបានគេបញ្ជាក់ថា ស្លាប់នៅមន្ទីរពេទ្យ»។ មនុស្សម្នាក់ទៀតស្ថិតក្នុងស្ថានភាពមិនមានគ្រោះថ្នាក់ដល់ជីវិតនោះឡើយ ខណៈ២នាក់ទៀត បាត់ខ្លួន។

ឆ្មាំសមុទ្របានប្រាប់ថា នាវាផ្ទុកសារធាតុគីមីនេះ មានមនុស្ស ១១នាក់ នៅលើនោះ ដែលរួមមានជនជាតិកូរ៉េខាងត្បូង ២នាក់ ឥណ្ឌូនេស៊ី ៨នាក់ និងចិនម្នាក់។ ហើយយោងតាមឆ្មាំល្បាតឆ្នេរ បានឲ្យដឹងថា នាវានោះបានផ្ទុកអាស៊ីតអាគ្រីលីក (Acrylic Acid) ទម្ងន់ ៩៨០តោន ប៉ុន្តែមិនមានព័ត៌មានថា តើសារធាតុនោះបានធ្លាយចូលទៅក្នុងសមុទ្រដែរ ឬយ៉ាងណានោះទេ។

ខ្សែវីដេអូពីទូរទស្សន៍ជប៉ុន NHK បង្ហាញឲ្យឃើញពីតួនាវាពណ៌ក្រហមដែលបានក្រឡាប់ ក៏ដូចជាទូកពោងសង្គ្រោះជីវិត ខណៈដែលនាវាឆ្មាំល្បាតឆ្នេរបានបើកឆ្លងកាត់រលកធំៗ ហើយឧទ្ធម្ភាគចក្របានហោះក្រឡឹងពីលើ។ ទូរទស្សន៍ NHK បានឲ្យដឹងថា នៅព្រឹកថ្ងៃពុធនេះ នាវិកបានជូនដំណឹងដល់ឆ្មាំល្បាតឆ្នេរថា នាវានេះកំពុងផ្អៀង និងបានស្នើសុំជំនួយ នៅម្ដុំកោះ Mutsure នៃឆ្នេរសមុទ្រភាគនិរតីរបស់ជប៉ុន៕