គណបក្សហ៊្វុនស៊ិនប៉ិច(FUNCINPEC) នាព្រឹកថ្ងៃទី២១ មីនា ឆ្នាំ២០២៤នេះ បាន​ប្រាប់​ពិធី​អបអរ​សាទរ ខួប៤៣ឆ្នាំរបស់ខ្លួន នៅទីស្នាក់កណ្តាល ក្នុងសង្កាត់បឹងរាំង ខណ្ឌដូនពេញ រាជ​ធានី​ភ្នំពេញ។ ដោយពិធី នេះបានប្រព្រឹត្តទៅក្រោមអធិបតីភាពព្រះអង្គម្ចាស់ នរោត្តម ចក្រាវុធ ព្រះ​ប្រធាន​គណបក្សហ៊្វុនស៊ិនប៉ិច   រួមទាំងសមាជិក-សមាជិកាជាច្រើនទៀត។

នៅក្នុង​ឱកាស​ដ៏​នក្ខន្តឫក​ប្រកប​ដោយ​មង្គលប្រសើរ នៃ​ព្រះរាជ​វត្តមាន​របស់​សម្តេច​ព្រះអភិសិរី​សុគន្ធា​មហា​សង្ឃរាជាធិបតី កិត្តិឧទ្ទេសបណ្ឌិត បួរ គ្រី សម្តេចព្រះមហា​សង្ឃរាជ​នៃ​គណៈ​ធម្មយុត្តិក​និកាយ នៃព្រះរាជាណាចក្រកម្ពុជា ព្រមទាំងព្រះមន្ត្រីសង្ឃ ចំនួន៩អង្គ បានយាងនិមន្ត ចំរើន​ព្រះបរិត្តសូត្រ ដារបង្សុកូល ឧទ្ទិសព្រះរាជកុសលថ្វាយដល់ដួងព្រះវិញ្ញាណក្ខន្ធ ព្រះរាជ​បិតាស្ថាបនិកហ៊្វុនស៊ិនប៉ិច និង សម្តេចក្រុមព្រះ នរោត្តម រណឫទ្ធិ ព្រមឥស្សរជន យុទ្ធជន ដែល​ពលី​ក្នុងបុព្វហេតុ ជាតិ សាសនា ព្រះមហាក្សត្រ សូម ស្តេចយាង និងអញ្ជើញ​កាន់​យក​ក្នុង​សុគតិភព កុំបីឃ្លៀងឃ្លាតឡើយ ។

បន្ទាប់ពីពិធីរាប់បាត្រឧទ្ទិសព្រះកុសល ព្រះអង្គម្ចាស់ ក៏បានយាងសំណេះសំណាល ជាមួយ​បង​ប្អូន​ក្រុម​ប្រកប​មុខរបរ ស៊ីក្លូ ដោយបាននាំយកគ្រឿងឧបភោគ និងថវិកា ជូនពួកគាត់ផងដែរ ៕