នៅព្រឹកថ្ងៃទី២១មីនាឆ្នាំ២០២៤នេះ ស្នងការដ្ឋាននគរបាលខេត្តឧត្តរមានជ័យ បានបើកវគ្គបណ្តុះបណ្តាលស្តីពីការបង្ការទប់ស្កាត់ការលួចនាំមនុស្សឆ្លងដែនដោយខុសច្បាប់ និងជួយដូរមនុស្សគ្រប់ទម្រង់ មានរយៈពេលពីរថ្ងៃ ក្រោមអធិបតីភាពឯកឧត្តម ឧត្តមសេនីយ៍ឯក ជីវ ផល្លី អគ្គស្នងការរងនគរបាលជាតិតំណាងឲ្យឯកឧត្តម នាយឧត្តមសេនីយ៍ ស ថេត អគ្គស្នងការ​នគរ​បាលជាតិ និងមានការចូលរួមពីសិក្ខាកាមមកពីតាមអង្គភាពជំនាញ​ជាច្រើនរូបផងដែរ។

ឯកឧត្តមឧត្តមសេនីយ៍ឯក ជីវ ផល្លី បានប្រសាសន៍ថា ការបើកវគ្គបណ្តុះបណ្តាលនេះ គឺមានសារៈសំខាន់ណាស់ចំពោះសិក្ខាកាមដែលមកសិក្សារៀនសូត្រ ។ ឯកឧត្តម បានបន្តទៀតថា ការសិក្សាសម្រាប់វគ្គបណ្តុះបណ្តាលខ្លីៗ អាចផ្តល់ឲ្យយើងដឹកពីរបៀប​របប​ច្បាប់​ការងារស្នូលកាន់​តែច្បាស់បន្ថែមទៀត លើការងារដែលយើងកំពុងធ្វើបច្ចុប្បន្ន ជាពិសេសនោះការជួញដូរ មនុស្សឆ្លងដែនដោយខុសច្បាប់​គ្រប់ទម្រង់ យើងត្រូវក្តាប់​សភាពការណ៍​ឲ្យបានណែន​នៅក្នុងដៃទើបយើងអាចសម្រេចការងារបានល្អប្រសើរ។

ជាមួយគ្នានោះដែរឯកឧត្តម ​ឧត្តមសេនីយ៍ឯក បានធ្វើការផ្តាំផ្ញើដល់សិក្ខាកាម​ទាំងអស់ត្រូវខិតខំ​យកចិត្តទុកដាក់ស្តាប់នូវខ្លឹមសារមេរៀនល្អៗ​ពី​គ្រូបង្គោល​ដើម្បី​ពង្រឹងសមត្ថិភាពរបស់ខ្លួន​ឲ្យបាន​តែរីកចម្រើនបន្ថែមទៀត លើការងារជំនាញស្នូល​ក្នុងដែនសមត្ថកិច្ចរបស់ខ្លួន​ដើម្បី​ទប់ស្កាត់​នូវការ​ជួញដូរមនុស្សគ្រប់ទម្រង់ និងគ្រប់រូបភាព​ឲ្យមានប្រសិទ្ធភាពខ្ពស់៕