ភ្នំពេញ៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បាន​ទទួល​ជួប​ពិភាក្សា​ការងារ​ជាមួយ លោកបណ្ឌិត ហ្វ្រង់ស៊ីស រ៉យជឺ (Francois ROGER) នាយក​ប្រចាំ​តំបន់​នៃ​មជ្ឈ​មណ្ឌលស្រាវជ្រាវកសិកម្មប្រទេសបារាំង ដើម្បីអភិវឌ្ឍន៍អន្តរជាតិ (CIRAD) ពាក់ព័ន្ធ​ការងារ​មួយ​ចំនួន​លើវិស័យកសិកម្ម នៅទីស្តីការក្រសួង។

ក្រសួងកសិកម្ម រុក្ខាប្រមាញ់ និងនេសាទ នៅព្រឹកថ្ងៃទី២១ ខែមីនា ឆ្នាំ២០២៤នេះ បានឲ្យដឹងថា ក្នុ​ងជំនួបនាឱកាសនោះ ឯកឧត្តមរដ្ឋមន្ត្រី បាន​សម្តែង​នូវ​ការ​ស្វាគមន៍​ចំពោះ​កិច្ច​សហ​ប្រតិបត្តិការ​ជា​មួយ​គ្នា​ក្នុងការចូលរួមអភិវឌ្ឍវិស័យកសិកម្ម និងអភិរក្សបរិស្ថាន។ ជាមួយគ្នានេះដែរ ឯកឧត្តម បាន​គូសបញ្ជាក់អំពីគោលដៅយុទ្ធសាស្ត្រក្នុងការជំរុញសហគមន៍កសិកម្មទំនើប និងការ​ដាក់​ពង្រាយ​មន្ត្រី​កសិកម្មតាមមូលដ្ឋាន ព្រមទាំងការបង្កើតឱ្យមានបណ្ឌិតសភាកសិកម្ម។ គ្រឹះស្ថាន​រដ្ឋបាល​សាធារណៈ​មួយនេះ នឹងដើរតួនាទីយ៉ាងសំខាន់ក្នុងការផ្ដល់ចំណេះដឹង និងផ្តល់​ភាព​ងាយ​ស្រួល​ដល់កសិករ។

លើសពីនេះទៀត ឯកឧត្តមរដ្ឋមន្ត្រី បានបញ្ជាក់បន្ថែមអំពីភាពចាំបាច់ដែលត្រូវពិភាក្សា អំពី​កិច្ច​សហការ​រួមគ្នា ដោយបង្កើតឱ្យមាន MOU ដើម្បីឱ្យការអនុវត្តការងារ ស្របតាម​គោល​នយោបាយ​ជាតិ​ ក្នុងការលើកស្ទួយវិស័យកសិកម្មឱ្យមានភាពរីកចម្រើន ធានាសន្តិសុខស្បៀង និង​ធ្វើ​ឱ្យ​មាន​និរន្តរភាព​សេដ្ឋកិច្ច និងបរិស្ថាន។ ឯកឧត្តម បានបន្តទៀតថា ផលិតផលកសិកម្មកម្ពុជា ផ្តោត​សំខាន់​លើ​គុណភាព សុវត្ថិភាព តាមស្តង់ដាគោលនយោបាយ ថ្លៃដើមផលិតទាប មាន​តម្លៃ​បន្ថែម​ខ្ពស់ មានប្រសិទ្ធភាពសេដ្ឋកិច្ចពិតប្រាកដ ដែលផ្តល់ផលចំណេញដល់កសិករ និងភាគីពាក់ព័ន្ធ។

ទន្ទឹមនឹងនេះដែរ ឯកឧត្តមរដ្ឋមន្ត្រី ក៏បាន​បញ្ជាក់​អំពី​ភាព​ចាំបាច់ នៃ​ការ​ធ្វើ​ទីផ្សារ​ឱ្យ​បាន​ល្អលើ​ផលិត​ផលដូចជា អង្ករ ស្វាយចន្ទី កៅស៊ូ និងផលិតផលមានសក្តានុពលដទៃទៀត ដែល​មជ្ឈ​មណ្ឌល CIRAD អាចពិនិត្យលទ្ធភាពបន្ថែមលើការងារនេះ ដោយ​ត្រូវ​សិក្សា​ឱ្យ​បាន​គ្រប់​ជ្រុង​ជ្រោយ​លើ​ប្រសិទ្ធភាពសេដ្ឋកិច្ច៕