នាព្រឹកថ្ងៃទី២១ ខែមីនា ឆ្នាំ២០២៤នេះ ឯកឧត្តម វ៉ាន់មូហាម៉ាត់ណ មៈថា ប្រធានរដ្ឋសភានៃព្រះរាជាណាចក្រថៃ បានចូលជួបសម្តែងការគួរសម និងជំនួបពិភាក្សាទ្វេភាគី ជាមួយ ឯកឧត្តមកិត្តិសេដ្ឋាបណ្ឌិត ជាម យៀប ប្រធានរដ្ឋសភាស្តីទី នៃព្រះរាជាណាចក្រកម្ពុជា។
ឯកឧត្តមកិត្តិសេដ្ឋាបណ្ឌិត ជាម យៀប ប្រធានរដ្ឋសភាស្តីទីលើកឡើងថាដំណើរទស្សនកិច្ចរបស់គណៈប្រតិភូជាន់ខ្ពស់រដ្ឋសភាថៃនាពេលនេះ គឺជាព្រឹត្តិការណ៍ដ៏សំខាន់ និងជាប្រវត្តិសាស្រ្ត ក្នុងនាមជាប្រទេសជិតខាងភូមិផងរបងតែមួយ និងជាសមាជិកអន្តរសភាអាស៊ានដំបូងគេ ដែលបានមកបំពេញទស្សនកិច្ចនៅកម្ពុជាសម្រាប់នីតិកាលទី៧។ ដំណើរទស្សនកិច្ចនេះក៏រួមចំណែកយ៉ាងសំខាន់ដល់ការបន្តពង្រឹងពង្រីក និងលើកកម្ពស់បន្ថែមទៀតនូវចំណងមិត្តភាពជាប្រពៃណី ភាពជាអ្នកជិតខាងល្អ និងភាពជាដៃគូយុទ្ធសាស្រ្តគ្រប់ជ្រុងជ្រោយ ដែលអាចបើកឱកាសថ្មីសម្រាប់ប្រទេសយើងទាំងពីរ ក្នុងការពង្រឹងកិច្ចសហប្រតិបត្តិការទ្វេភាគីរបស់យើងឱ្យអស់សក្តានុពល។
នៅក្នុងជំនួបកិច្ចពិភាក្សាទ្វេភាគី គណៈប្រតិភូរដ្ឋសភាទាំង២បានវាយតម្លៃខ្ពស់នូវវឌ្ឍនភាពនៃទំនាក់ទំនង និងកិច្ចសហប្រតិបត្តិការទ្វេភាគីដែលមានជាយូរលង់មកហើយ ក៏ដូចជាសមិទ្ធផលសំខាន់ៗ ស្តែងចេញពីទំនាក់ទំនងនេះ និងសង្ឃឹមយ៉ាងមុតមាំថាទាំងស្ថាប័ននីតិប្បញ្ញត្តិ និងនីតិប្រតិបត្តិ នៃប្រទេសទាំងពីរនឹងខិតខំប្រឹងប្រែងទាំងអស់គ្នាបន្ថែមទៀត។
ក្នុងឱកាសនោះដែរ ឯកឧត្ដមកិត្តិសេដ្ឋាបណ្ឌិតប្រធានរដ្ឋសភាស្ដីទី បានបញ្ជាក់ថា ឆ្នាំក្រោយនេះជាខួបលើកទី៧៥ឆ្នាំ នៃចំណងការទូតរបស់ប្រទេសទាំង២ ក្នុងន័យនេះ ការទូតសភាគឺដើរតួនាទីសំខាន់ ក្នុងការជំរុញភាពជាដៃគូយុទ្ធសាស្រ្តឱ្យកាន់តែស៊ីជម្រៅថែមទៀត។ ឯកឧត្ដមបញ្ជាក់បន្ថែម អំពីកិច្ចសហប្រតិបត្តិការទ្វេភាគី ដែលមានលក្ខណៈពហុវិស័យ និងច្រើនកម្រិត ដោយមានកិច្ចសហប្រតិបត្តិការល្អពីគ្រប់ភាគីពាក់ព័ន្ធ ទាំងក្របខណ្ឌរដ្ឋ និងរដ្ឋ (តាំងពីថ្នាក់ជាតិដល់ថ្នាក់មូលដ្ឋាន) ក្របខណ្ឌសភា និងសភា ធុរកិច្ចនិងធុរកិច្ច គណបក្សនយោបាយ និងគណបក្សនយោបាយ និងរវាងប្រជាជន និងប្រជាជន។ ឯកឧត្ដមកិត្តិសេដ្ឋាបណ្ឌិតបន្ថែមថា បច្ចុប្បន្នមានប្រជាពលរដ្ឋកម្ពុជាប្រមាណជាងមួយលាននាក់បាននិងកំពុងរស់នៅ និងធ្វើការយ៉ាងសកម្មលើវិស័យផ្សេងៗក្នុងប្រទេសថៃ ហើយបានចូលរួមចំណែកយ៉ាងសំខាន់ក្នុងការអភិវឌ្ឍសេដ្ឋកិច្ចសង្គមប្រទេសថៃក៏ដូចជាប្រទេសកម្ពុជា។
ឯកឧត្តម វ៉ាន់មូហាម៉ាត់ណ មៈថា បានថ្លែងអំណរគុណចំពោះបដិសណ្ឋារកិច្ចដ៏កក់ក្ដៅរបស់រដ្ឋសភាកម្ពុជា និងឯកភាពចំពោះប្រសាសន៍លើកឡើងរបស់ឯកឧត្តមប្រធានរដ្ឋសភាស្តីទី។ ឯកឧត្ដមបានលើកឡើងពីវឌ្ឍនភាពនៃទំនាក់ទំនង និងកិច្ចសហប្រតិបត្តិការទ្វេភាគីដែលមានជាយូរលង់មកហើយក៏ដូចជាសមិទ្ធផលសំខាន់ៗស្តែងចេញពីទំនាក់ទំនងនេះ និងសង្ឃឹមយ៉ាងមុតមាំថាទាំងស្ថាប័ននីតិប្បញ្ញត្តិ និងនីតិប្រតិបត្តិនៃប្រទេសទាំងពីរ ដោយឯកឧត្ដមបញ្ជាក់ឡើងវិញថា «ថៃនិងកម្ពុជាគឺជាបងប្អូន។ ប្រទេសទាំងពីរ ជាអ្នកជិតខាងល្អ ជាមិត្តល្អ ដូចសុភាសិតបានលើកឡើងថា មានមិត្តល្អម្នាក់នៅជិត ប្រសើជាងមានមិត្តល្អ១០នាក់ដែលនៅឆ្ងាយ»។
ឯកឧត្ដមប្រធានគណៈប្រតិភូជាន់ខ្ពស់រដ្ឋសភាថៃ ក៏បានសំណូមពរឱ្យរដ្ឋសភាប្រទេសទាំងពីរមានអនុស្សរណៈយោគយល់គ្នា ដូចរដ្ឋសភាកម្ពុជា មានជាមួយប្រទេសវៀតណាម និងប្រទេសផ្សេងៗទៀត ដើម្បីឱ្យកិច្ចសហប្រតិបត្តិការនៃសភាប្រទេសទាំងពីកាន់តែល្អប្រសើរ និងគ្រប់ជ្រុងជ្រោយថែមទៀត។ ជាមួយគ្នានេះ ឯកឧត្ដម ក៏បានគោរពអញ្ជើញសម្ដេចមហារដ្ឋសភាធិការធិបតី ឃួន សុដារី ប្រធានរដ្ឋសភា និងគណៈប្រតិភូជាន់ខ្ពស់រដ្ឋសភាកម្ពុជាទៅបំពេញទស្សកិច្ចនៅព្រះរាជាណាចក្រថៃ ដើម្បីមានឱកាសច្រើនថែមទៀតក្នុងការពិភាក្សាគ្នាអំពីកិច្ចសហប្រតិបត្តិការសភា និងការពិចារណាទៅលើការចុះអនុស្សារណៈរួមជាមួយគ្នា។
ឯកឧត្ដមបានមានប្រសាសន៍លើកឡើងថា ឯកឧត្ដមនឹងជួយជំរុញអ្នកវិនិយោគថៃឱ្យមកបណ្ដាក់ទុនកាន់ តែច្រើននៅកម្ពុជាព្រមទាំងលើកកម្ពស់សិទ្ធពលករខ្មែរដែលកំពុងធ្វការនៅប្រទេសថៃ និងមើលថែពួកគេនិងគ្រួសារដូចជាជាពលករថៃដែរ ដោយកូនចៅរបស់ពលករទាំងនោះមានសិទ្ធិបានចូលសិក្សារៀនសូត្រ ដើម្បីក្លាយជាទំពាំងស្នងឫស្សីនាពេលអនាគតដែរ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
