​បាល់ទាត់៖ អតីត​កីឡាករ​របស់​តោ​ខៀវ Chelsea និង Bayern Munich កីឡាករ​ហូ​ឡង់ Arjen Robben បាន​សំរេច​ចិត្ត​ចូលនិវត្តន៍​ពី​អាជីព​បាល់ទាត់​ហើយ ​នៅ​ថ្ងៃ​ព្រហស្បតិ៍​ម្សិលមិញ​។ ​នេះ​ជាការ​សំរេច​ចិត្ត​លើក​ទី​២ សំរាប់​កីឡាករ​វ័យ ៣៧​ឆ្នាំ​រូប​នេះ បន្ទាប់ពី​ចំណាយ​ពេល ២១ឆ្នាំ​ក្នុង​អាជីព​បាល់​ទាត់ និង​ចុងក្រោយ​ជាមួយ​ក្លិប​ក្នុងស្រុក Groningen នៅ​ក្រប​ខណ្ឌ​ទី​២ ហូ​ឡង់​។

​​កាលពី​ឆ្នាំ​២០១៩ កន្លងទៅ Arjen Robben បាន​សំរេច​ចិត្ត​ចូលនិវត្តន៍​ម្តង​រួច​ទៅ​ហើយ ​បន្ទាប់ពី​រដូវ​កាល​ចុងក្រោយ​ជាមួយ Bayern Munich តែ​ក៏បាន​ផ្លាស់ប្តូរ​ចិត្ត​ត្រលប់​មក​អាជីព​បាល់ទាត់​វិញ​នៅ​ឆ្នាំ២០២០ មក​ចូលរួម​ជាមួយ Groningen ដែល​ជា​ក្លិប​ចាប់ផ្តើម​អាជីព​ដំបូង​របស់​ខ្លួន​នៅ​ឆ្នាំ​២០០០​។ ​​ទោះបីជា​ក្លិប​ Groningen បាន​យល់ព្រម​បន្ត​កិច្ចសន្យា​មួយឆ្នាំ​ទៀត​ដល់ Arjen Robben ក៏ដោយ​កីឡាករ​វ័យ ៣៧​ឆ្នាំ​រូបនេះ​គិតថា​ នេះ​ជា​ពេលវេលា​ដែល​ត្រូវ​លា​ពី​អាជីព​ជា​កីឡាករ​មែន​ទែន​ហើយ បន្ទាប់ពី​រដូវ​កាល​កន្លងមក​ជាមួយ Groningen នោះ​ញាំញី​ដោយសារ​របួស​។​ ​​ពេល​ត្រលប់​មក Groningen វិញ Robben បង្ហាញខ្លួន​ដំបូង​ជួប​ជាមួយ PSV កាលពី​ខែកញ្ញា​ឆ្នាំមុន​នោះ តែ​ក៏ត្រូវ​ផ្លាស់ចេញ​វិញ​ត្រឹម​នាទី​ទី២៨ ដោយសារ​របួស​កំភួន​ជើង​។

​​ក្រោយមក​អតីត​កីឡាករ​ជំរើសជាតិ​ហូ​ឡង់​រូបនេះ​ក៏ត្រូវ​សំរាក​រហូត ៧ខែ​មុនពេល​ត្រលប់​មកវិញ​នៅ​ខែមេសាចូល​លេង​វិញ​ពេល Groningen ចាញ់ Heerenveen ហើយក៏​បញ្ចប់​រដូវ​កាល​ទៅ​បង្ហាញខ្លួន​បានតែ ៧ប្រកួត​ប៉ុណ្ណោះ​។​ ​​រំលឹកថា Arjen Robben ធ្លាប់ជា​កីឡាករ​របស់ Chelsea ដែល​ឈ្នះ​ពាន English Premier League ២លើក, FA Cup ១​លើក​ក្នុងការ​បង្ហាញខ្លួន​សរុប ១០៩ប្រកួត​រកបាន ១៩គ្រាប់ មុនពេល​ផ្លាស់​ទៅ Real Madrid និង Bayern Munich៕

​អត្ថបទ​៖​នាង សុភា​វុ​ធ