លោកប្រធានាធិបតី Joe Biden កាលពីថ្ងៃពុធ (ទី២០ ខែមីនា) បានផ្តល់ឲ្យក្រុមហ៊ុន Intel នូវទឹកប្រាក់ជិត ២០ពាន់លានដុល្លារជាជំនួយ និងប្រាក់កម្ចី ដែលជាការចំណាយដ៏ធំបំផុតរបស់រដ្ឋាភិបាលសហរដ្ឋអាមេរិក ក្នុងការឧបត្ថម្ភធនដល់ការផលិតបន្ទះឈីបឈានមុខគេ និងជួយជំរុញបន្ថែមទៀតដល់ទិន្នផលបន្ទះឈីបក្នុងស្រុករបស់ក្រុមហ៊ុននេះ។

លោក Biden បានប្រកាសពីកិច្ចព្រមព្រៀងដំបូង ក្នុងការផ្ដល់ជំនួយចំនួន ៨,៥ពាន់លានដុល្លារ និងប្រាក់កម្ចីរហូតដល់ ១១ពាន់លានដុល្លារ សម្រាប់ក្រុមហ៊ុន Intel ក្នុងរដ្ឋ Arizona ដែលថវិកាមួយចំនួននឹងត្រូវប្រើប្រាស់សម្រាប់សាងសង់រោងចក្រថ្មីចំនួន២ និងធ្វើទំនើបកម្មរោងចក្រដែលមានស្រាប់។ ប្រធានាធិបតីអាមេរិកបាននិយាយថា ការវិនិយោគនេះនឹង «អាចឲ្យការផលិតបន្ទះអេឡិចត្រូនិកកម្រិតខ្ពស់ត្រឡប់មកវិញ នៅទីនេះ នៅសហរដ្ឋអាមេរិក បន្ទាប់ពីរយៈពេល ៤០ឆ្នាំ»។

ជាមួយគ្នានេះ លោក Biden ដែលជាសមាជិករបស់គណបក្សប្រជាធិបតេយ្យ ក៏បានវាយប្រហារទៅលើលោក Donald Trump ដោយបាននិយាយថា ក្រោមគោលនយោបាយរបស់អតីតប្រធានាធិបតីរបស់គណបក្សសាធារណរដ្ឋរូបនោះ ក្រុមហ៊ុនបានបញ្ជូនការងារទៅក្រៅប្រទេស ហើយការកាត់បន្ថយពន្ធរបស់លោក Trump បានជួយដល់សាជីវកម្មរបស់អ្នកមានទ្រព្យសម្បត្តិ។

លោក Biden បានសង្កត់ធ្ងន់ថា ប្រសិនបើបន្ទះឈីបត្រូវបានបង្កើតឡើងនៅអាមេរិក «ដូច្នេះ វាគួរតែត្រូវបានផលិតនៅអាមេរិក» ដោយបន្ថែមថា ការវិនិយោគនេះ «នឹងកែប្រែប្រទេសតាមរបៀបមួយដែលសូម្បីតែអ្នកគ្រប់គ្នាក៏មិនអាចដឹងបានដែរ»៕