ប្រទេសសេណេហ្គាល់នឹងរៀបចំការបោះឆ្នោតប្រធានាធិបតីដែលត្រូវបានពន្យារពេល នៅថ្ងៃអាទិត្យ (ទី២៤ ខែមីនា) ចំពេលមានបរិកាសនយោបាយតានតឹងខុសពីធម្មតា បន្ទាប់ពីប្រធានាធិបតីលោក Macky Sall មិនអាចពន្យារពេលការបោះឆ្នោតនេះ ហើយគូប្រជែងសំខាន់ៗ ២រូប ត្រូវបានដោះលែងពីពន្ធនាគារ ដោយទាំងនេះរឹតតែផ្តល់សន្ទុះដល់ក្រុមប្រឆាំង។

ការគាំទ្រចំពោះលោក Sall នៅសេណេហ្គាល់ ដែលជាធម្មតាគឺប្រទេសកាន់លទ្ធិប្រជាធិបតេយ្យដ៏មានស្ថិរភាពបំផុតមួយ នៅអាហ្វ្រិកខាងលិចដែលងាយជួបនឹងរដ្ឋប្រហារនោះ បានធ្លាក់ចុះអំឡុងពេលកាន់តំណែងអាណត្តិទី២ របស់លោក ដែលនេះនឹងជាការកាន់តំណែងចុងក្រោយរបស់លោក។ ចំណែកក្រុមចម្រុះដែលកំពុងកាន់អំណាច បានជ្រើសរើសលោក Amadou Ba វ័យ ៦២ឆ្នាំ ដែលជាអតីតនាយករដ្ឋមន្ត្រី និងជារដ្ឋមន្ត្រីហិរញ្ញវត្ថុ ជាបេក្ខជនរបស់ខ្លួន ដែលទំនងជានឹងបន្តគោលនយោបាយអំណោយផលដល់វិនិយោគិនរបស់សេណេហ្គាល់ ខណៈដែលប្រទេសនេះត្រៀមខ្លួនក្លាយជាអ្នកផលិតប្រេង និងឧស្ម័ននៅដំណាច់ឆ្នាំ២០២៤។

ប៉ុន្តែលោក Ba ប្រឈមនឹងទីលានប្រឆាំងដ៏តានតឹងដែលមានបេក្ខជនរហូតដល់ ១៨រូប ដោយអ្នកលេចធ្លោជាងគេបំផុត គឺអតីតអធិការកិច្ចពន្ធដារវ័យ ៤៣ឆ្នាំ លោក Bassirou Diomaye Faye ដែលត្រូវបានជំរុញឲ្យទៅជួរមុខដោយមានការគាំទ្រពីមេដឹកនាំបក្សប្រឆាំងលោក Ousmane Sonko។

លោក Sonko ដែលមានប្រជាប្រិយភាពក្នុងចំណោមយុវវ័យ នៅទីក្រុង ដែលខកចិត្តនឹងកង្វះការងារធ្វើ និងការលំបាកផ្នែកសេដ្ឋកិច្ច បានជាប់ចំណាត់ថ្នាក់លេខ៣ ក្នុងការប្រជែងតំណែងប្រធានាធិបតីឆ្នាំ២០១៩ ប៉ុន្តែត្រូវបានដកហូតសិទ្ធិក្នុងការបោះឆ្នោតលើកនេះ ដោយសារតែការផ្តន្ទាទោសពីបទបរិហារកេរ្តិ៍។ ហើយទាំងលោក Sonko និងលោក Faye ត្រូវបានដោះលែងពីពន្ធនាគារ កាលថ្ងៃទី១៤ ខែមីនាដោយសារតែការលើកលែងទោសដែលស្នើឡើងដោយលោក Sall បន្ទាប់ពីការឃុំខ្លួនជាច្រើនខែ ហើយចាប់តាំងពីពេលនោះមកបានទាក់ទាញមនុស្សឲ្យមកប្រមូលផ្តុំរាប់ពាន់នាក់។

ដើមឡើយការបោះឆ្នោតត្រូវបានកំណត់ថ្ងៃទី២៥ ខែកុម្ភៈ តែត្រូវបានពន្យារពេលភ្លាមៗ ដោយលោក Sall កាលថ្ងៃទី៣ ខែកុម្ភៈ ពោលគឺត្រឹមតែប៉ុន្មានម៉ោងមុនពេលយុទ្ធនាការត្រូវបានកំណត់ឲ្យចាប់ផ្តើម។ លោកបានលើកឡើងពីហានិភ័យដែលកើតចេញពីវិវាទលើបញ្ជីបេក្ខជនថា ជាហេតុផលនៃការពន្យារពេលនេះ។ ការសម្រេចនេះបានបង្កឲ្យមានរលកនៃអំពើហិង្សា ហើយបាននាំឲ្យអាជ្ញាធររដ្ឋធម្មនុញ្ញជាន់ខ្ពស់បំផុតរបស់ប្រទេស គឺក្រុមប្រឹក្សាធម្មនុញ្ញ បដិសេធការប៉ុនប៉ងពន្យារពេលការបោះឆ្នោត និងការបន្តអាណត្តិរបស់លោក Sall ឲ្យហួសពីថ្ងៃទី២ ខែមេសា៕