អាជ្ញាធរក្នុងតំបន់ បាននិយាយថា មីស៊ីលរុស្ស៊ីមួយគ្រាប់ បានវាយប្រហារចំតំបន់ឧស្សាហកម្មមួយ ក្នុងទីក្រុងខាគីវ (Kharkiv) ភាគខាងជើងនៃប្រទេសអ៊ុយក្រែនកាលពីថ្ងៃពុធ ដោយបានសម្លាប់មនុស្សយ៉ាងហោចណាស់ ៥នាក់ និង ៨នាក់រងរបួស ខណៈដែលបណ្តាលមានអគ្គិភ័យដ៏ធំមួយ នៅក្នុងរោងពុម្ពមួយ។

អភិបាលក្រុងខាគីវ លោក Ihor Terekhov បាននិយាយថា មនុស្ស៥នាក់ផ្សេងទៀត បានបាត់ខ្លួនបន្ទាប់ពីការវាយប្រហារនោះ។ នៅក្នុងការបង្ហោះលើបណ្តាញសង្គមTelegram នៅម៉ោងប្រហែល១១យប់ ម៉ោងក្នុងស្រុក លោកបានអះអាងថា ទីក្រុងខាគីវ បានស្ថិតនៅក្រោមការបាញ់ផ្លោងថ្មីៗ ជាមួយនឹងការផ្ទុះនៅក្នុងទីក្រុងនេះ។

លោកប្រធានាធិបតី វ៉ូឡូមៀ ហ្សេឡិនស្គី ( Volodymyr Zelenskiy) បាននិយាយថា ការវាយប្រហារនេះបានគូសបញ្ជាក់ពីកង្វះនៃការការពារដែនអាកាសត្រឹមត្រូវ នៅក្នុងទីក្រុងខាគីវ ដែលជាទីក្រុងធំទីពីររបស់អ៊ុយក្រែន និងកន្លែងផ្សេងទៀត ជាពិសេសនៅតំបន់ភាគខាងជើងក្បែរព្រំដែនរុស្ស៊ី។

លោកហ្សេឡិនស្គី បាននិយាយនៅក្នុងសុន្ទរកថាតាមវីដេអូពេលយប់របស់ខ្លួនថា៖«ទីក្រុងខាគីវ ត្រូវការចំនួនប្រព័ន្ធការពារដែនអាកាសគ្រប់គ្រាន់ តំបន់ Sumy  តំបន់ Chernihiv និងតំបន់ទាំងអស់របស់យើងដែលទទួលរងពីការវាយប្រហាររបស់រុស្ស៊ី ក៏ត្រូវការប្រព័ន្ធទាំងនេះដែរ។ 

«ដៃគូរបស់យើងមានប្រព័ន្ធការពារទាំងនេះ ហើយដៃគូរបស់យើងចាំបាច់ត្រូវយល់ថា ការការពារដែនអាកាស ត្រូវតែការពារអាយុជីវិតមនុស្ស»។