ការសិក្សាដ៏ធំមួយបានឱ្យដឹងកាលពីថ្ងៃពុធ (២០ មីនា) ថា ចំនួនប្រជាជនស្ទើរតែគ្រប់ប្រទេសនឹងធ្លាក់ចុះនៅចុងសតវត្សនេះ ដោយបានព្រមានថា កំណើនទារកនៅក្នុងប្រទេសកំពុងអភិវឌ្ឍន៍ និងការធ្លាក់ចុះនៃអត្រាកំណើតទារកក្នុងប្រទេសអ្នកមាន នឹងជំរុញឱ្យមានការផ្លាស់ប្តូរសង្គមដ៏ធំ។

ក្រុមអ្នកស្រាវជ្រាវអន្តរជាតិរាប់រយនាក់ បានរាយការណ៍នៅក្នុងទិនានុប្បវត្តិ ដឹ លែនសេត (The Lancet) ថាអត្រាមានកូននៅក្នុងប្រទេសពាក់កណ្តាលនៃប្រជាជាតិពិភពលោកទាំងអស់ គឺធ្លាក់ទាបពេកដែលមិនអាចរក្សាទំហំប្រជាជនរបស់ពួកគេរួចទៅហើយ។ ដោយប្រើទិន្នន័យសកលជាច្រើនស្តីពីអត្រាកើត អត្រាស្លាប់ និងហេតុផលដែលជំរុញឱ្យមានកូន ក្រុមអ្នកស្រាវជ្រាវបានព្យាយាមព្យាករពីអនាគតសម្រាប់ចំនួនប្រជាជនពិភពលោក។

នៅឆ្នាំ ២០៥០ ចំនួនប្រជាជននៅក្នុងចំនួន ៣ ភាគ ៤ នៃបណ្តាប្រទេសទាំងអស់នឹងធ្លាក់ចុះ នេះបើយោងតាមការសិក្សាដោយវិទ្យាស្ថានសម្រាប់ការវាស់វែង និងវាយតម្លៃសុខភាព (IHME) ដែលមានមូលដ្ឋាននៅសហរដ្ឋអាមេរិក។ ក្រុមអ្នកស្រាវជ្រាវបាននិយាយថា នៅចុងបញ្ចប់នៃសតវត្សនេះ ការព្យករណ៍នេះនឹងក្លាយជាការពិតសម្រាប់ ៩៧ ភាគរយ ឬ ១៩៨ ប្រទេសក្នុងចំណោម ២០៤ ប្រទេស និងដែនដី ក្នុងពិភពលោក។

ការសិក្សានេះបានប៉ាន់ប្រមាណថាមានតែដែនដីសាម័រ ប្រទេសសូម៉ាលី, តុងហ្គា, នីហ្សេ, ឆាដ និងតាហ្ស៊ីគីស្ថាន ទេ ដែលត្រូវបានគេរំពឹងថានឹងមានអត្រាមានកូនលើសពីកម្រិត ២,១ នៃការសម្រាលកូនសម្រាប់ស្ត្រីក្នុងឆ្នាំ២១០០៕