ប្រទេសអូស្ត្រាលី នឹងចាប់ផ្តើមអនុវត្តច្បាប់ទិដ្ឋាការដ៏តឹងរ៉ឹងសម្រាប់និស្សិតបរទេសនៅសប្តាហ៍នេះ ខណៈដែលទិន្នន័យផ្លូវការបានបង្ហាញថា ការធ្វើអន្តោប្រវេសន៍បានកើនឡើងដល់កម្រិតខ្ពស់មួយទៀត ដែលទំនងជាធ្វើឱ្យទីផ្សារជួល កាន់តែតឹងតែងជាងមុន។

ចាប់ពីថ្ងៃសៅរ៍នេះ តម្រូវការភាសាអង់គ្លេសសម្រាប់ទិដ្ឋាការសិស្ស និងនិស្សិតបញ្ចប់ការសិក្សានឹងកើនឡើង ខណៈដែលរដ្ឋាភិបាលនឹងទទួលបានអំណាចក្នុងការផ្អាកអ្នកផ្តល់សេវាអប់រំពីការជ្រើសរើសនិស្សិតអន្តរជាតិ ប្រសិនបើពួកគេបំពានច្បាប់ម្តងហើយម្តងទៀត។

រដ្ឋមន្ត្រីក្រសួងមហាផ្ទៃ លោកស្រី ឃ្លែរ អូនៀល (Clare O'Neil) បាននិយាយនៅក្នុងសេចក្តីថ្លែងការណ៍មួយថា «សកម្មភាពនៅចុងសប្តាហ៍នេះ នឹងបន្តជំរុញឱ្យកម្រិតនៃការធ្វើអន្តោប្រវេសន៍ធ្លាក់ចុះ ខណៈពេលដែលមានការប្តេជ្ញាចិត្តរបស់អូស្ត្រាលី នៅក្នុងយុទ្ធសាស្ត្រអន្តោប្រវេសន៍ដើម្បីជួសជុលប្រព័ន្ធដែលបានខូច »។

«ការធ្វើតេស្តសិស្សពិតប្រាកដថ្មី» នឹងត្រូវបានដាក់ចេញដើម្បីបង្រ្កាបបន្ថែមទៀតលើនិស្សិតអន្តរជាតិដែលចង់មកធ្វើការនៅប្រទេសអូស្ត្រាលីជាចម្បង ខណៈពេលដែលការដាក់លក្ខខណ្ឌ «មិនស្នាក់នៅរយៈពេលយូរបន្ថែម» នឹងត្រូវបានប្រើប្រាស់សម្រាប់ទិដ្ឋាការទេសចរណ៍៕