ប្រធានាធិបតីព័រទុយហ្គាល់ បានតែងតាំងលោក Luis Montenegro ដែលជាប្រធានគនបក្សសម្ព័ន្ធប្រជាធិបតេយ្យស្តាំនិយម (AD) ជានាយករដ្ឋមន្ត្រីថ្មីរបស់ប្រទេស ហើយបានស្នើលោកឲ្យបង្កើតរដ្ឋាភិបាលសំឡេងភាគតិច។ នេះបើតាមលោក Montengro ផ្ទាល់ ដែលបាននិយាយទៅកាន់អ្នកសារព័ត៌មាន នៅព្រឹកថ្ងៃព្រហស្បតិ៍ (ទី២១ មីនា) នេះ។

គួរបញ្ជាក់ថា គណបក្ស AD បានឈ្នះការបោះឆ្នោតសភា កាលថ្ងៃទី១០ ខែមីនា ជាមួយសំឡេងស្ដួចស្ដើង ពោលគឺខ្វះសំឡេងភាគច្រើន ដើម្បីដំណើរការ។ លោក Montenegro វ័យ ៥១ឆ្នាំ បាននិយាយម្តងហើយម្តងទៀតថា គណបក្សរបស់លោក ត្រូវបានរៀបចំដើម្បីដឹកនាំប្រទេសដោយខ្លួនឯង ហើយនឹងមិនចរចាកិច្ចព្រមព្រៀងផ្លូវការទូលំទូលាយជាមួយគណបក្សស្តាំជ្រុលនិយម គឺគណបក្ស Chega ដើម្បីធ្វើការជាមួយគ្នានោះឡើយ។ នេះក៏ជាជ័យជម្នះក្នុងសំឡេងដ៏តិចតួចលើគណបក្សសង្គមនិយមដែលបានកាន់អំណាចអស់រយៈពេល ៨ឆ្នាំផងដែរ។

បន្ទាប់ពីត្រូវបានតែងតាំងជានាយករដ្ឋមន្ត្រី លោក Montenegro បានប្រាប់អ្នកសារព័ត៌មានថា រដ្ឋាភិបាលនឹងស្បថចូលកាន់តំណែង នៅថ្ងៃទី២ ខែមេសា។ ក្នុងរង្វង់រយៈពេល ១០ថ្ងៃនៃកាលបរិច្ឆេទនោះ កម្មវិធីនយោបាយត្រូវតែបង្ហាញទៅកាន់សភា ដែលត្រូវបានអនុម័តដោយស្វ័យប្រវត្តិ ប្រសិនបើសភាមិនបោះឆ្នោតបដិសេធនោះទេ៕