ក្រសួងសុខាភិបាលហ្កាហ្សា ដែលគ្រប់គ្រងដោយក្រុមហាម៉ាស បាននិយាយកាលពីថ្ងៃពុធ (២០ មីនា) ថា ចំនួនអ្នកស្លាប់របស់ប៉ាឡេស្ទីន ពីការវាយប្រហាររបស់អ៊ីស្រាអែល ដែលកំពុងបន្តនៅតំបន់ហ្កាហ្សាស្ទ្រីប បានកើនឡើងដល់ ៣១.៩២៣ នាក់ និងមនុស្ស ៧៤.០៩៦ នាក់ផ្សេងទៀតបានរងរបួស។

ក្រសួងបាននិយាយនៅក្នុងសេចក្តីថ្លែងការណ៍មួយថា ក្នុងរយៈពេល ២៤ ម៉ោងកន្លងមកនេះ កងទ័ពអ៊ីស្រាអែលបានសម្លាប់ជនជាតិប៉ាឡេស្ទីនចំនួន ១០៤ នាក់ និងបង្ករបួស ១៦២ នាក់ផ្សេងទៀត។

ប្រភព និងសាក្សីប៉ាឡេស្ទីនបានរាយការណ៍ថា ក្នុងអំឡុងពេលនោះ យន្តហោះអ៊ីស្រាអែលបានបើកការវាយឆ្មក់រាប់សិបដងនៅក្នុងតំបន់ផ្សេងៗគ្នា ពីចុងភាគខាងជើងនៃតំបន់ជុំវិញទៅដល់ភាគខាងត្បូងរបស់តំបន់ហ៊ុមព័ទ្ធ ដែលភាគច្រើនផ្តោតលើលំនៅឋាន និងអគារអាផាតមិន។

យោងតាមប្រភពបានឱ្យដឹងថា កងទ័ពអ៊ីស្រាអែលបានបន្តប្រតិបត្តិការយោធារបស់ខ្លួននៅក្នុងមជ្ឈមណ្ឌលវេជ្ជសាស្ត្រ អាល់ស៊ីហ្វា (Al-Shifa) សម្រាប់ថ្ងៃទីបីជាប់ៗគ្នា ដែលនាំឱ្យមានការសម្លាប់មនុស្សរាប់សិបនាក់ និងការចាប់ខ្លួនមនុស្សជាច្រើននាក់ផ្សេងទៀត ។

យោងតាមក្រសួងសុខាភិបាលនៃតំបន់ហ្កាហ្សា បានឱ្យដឹងថា កងទ័ពអ៊ីស្រាអែលបានសម្រុកចូលមន្ទីរពេទ្យនេះកាលពីថ្ងៃទី១៥ ខែកុម្ភៈ ឆ្នាំនេះ ដែលបណ្តាលឱ្យអ្នករបួសជាច្រើននាក់បានស្លាប់ដោយសារការខ្វះអុកស៊ីហ្សែន ព្រោះតែការដាច់ចរន្តអគ្គិសនីនៃបំពង់ខ្យល់។ បន្ទាប់ពីការវាយប្រហារមួយសប្តាហ៍ដោយកងកម្លាំងអ៊ីស្រាអែល មន្ទីរពេទ្យនេះបានបញ្ឈប់ប្រតិបត្តិការទាំងស្រុង៕