រលកកម្ដៅក្ដៅខ្លាំងបំផុត នៅដើមឆ្នាំនេះ បានវាយប្រហារតំបន់ភាគខាងត្បូងនៃអាហ្វ្រិកខាងលិច កាលពីពាក់កណ្តាលខែកុម្ភៈ ហើយបើយោងតាមការវិភាគថ្មីដោយក្រុមអ្នកវិទ្យាសាស្ត្រអន្តរជាតិ បានបង្ហាញថា បម្រែបម្រួលអាកាសធាតុបានធ្វើឲ្យកម្ដៅឡើងកាន់តែខ្ពស់ប្រហែល ១០ដង។

លើសពីនេះទៀត វាក៏បណ្តាលឲ្យសន្ទស្សន៍កម្ដៅឡើងប្រហែល ៤អង្សារសេ ពោលគឺលើសពីអ្វីដែលវានឹងមាន ដោយមិនមានឧស្ម័នផ្ទះកញ្ចក់បន្ថែមក្នុងបរិយាកាស ពីការដុតឥន្ធនៈហ្វូស៊ីល។

ក្រុមមន្ត្រីបានប៉ាន់ស្មានពីសីតុណ្ហភាពមិនប្រក្រតីដែលនឹងកើតមាន ហើយភ្នាក់ងារអាកាសធាតុជាតិ នៅក្នុងប្រទេសហ្គាណា និងនីហ្សេរីយ៉ា បានចេញការព្រមានដល់សាធារណជន។ ការប្រកួតបាល់ទាត់ ក្នុងកម្មវិធី Africa Cup of Nations បានធ្វើឡើងនៅប្រទេសកូតឌីវ័រ អំឡុងពេលមានរលកកំម្ដៅ ហើយកីឡាករត្រូវបន្ថែមការសម្រាក អំឡុងពេលប្រកួតដើម្បីទទួលបានជាតិទឹក។

អ្វីដែលត្រូវបានគួរឲ្យកត់សម្គាល់ជាពិសេសអំពីរលកកំដៅនេះ គឺការចាប់ផ្តើមនៃសីតុណ្ហភាពខ្ពស់ នៅដើមឆ្នាំនេះ ជាពេលវេលាដែលមនុស្សមានពេលតិច ក្នុងការសម្របខ្លួននឹងការកើនឡើងនៃសីតុណ្ហភាពនេះ។ ប្រធានការិយាល័យព្យាករកណ្តាលរបស់ទីភ្នាក់ងារឧតុនិយមនីហ្សេរីយ៉ា និងជាអ្នកនិពន្ធនៃការសិក្សានេះ គឺលោក Wasiu Adeniyi Ibrahim បាននិយាយថា «មនុស្សច្រើនណាស់ នឹងមិនអាចសម្របខ្លួននឹងកម្ដៅនេះបានទេ»។

អំឡុងការប្រព្រឹត្តិទៅនៃរលកកម្ដៅនេះ សំណើមបានបង្កឲ្យមានគ្រោះថ្នាក់កាន់តែខ្ពស់ឡើង។ នៅក្នុងព្រឹត្តិការណ៍ដ៏អាក្រក់បំផុតនេះ សីតុណ្ហភាពបានឡើងខ្ពស់លើសពី ៤០អង្សារសេ។ ប៉ុន្តែសំណើមខ្ពស់មានន័យថា ខ្យល់ធ្វើឲ្យមានសភាពកាន់តែក្តៅឡើងៗ។ សន្ទស្សន៍កម្ដៅដែលវាស់វែងផលប៉ះពាល់រួមនៃកំដៅ និងសំណើមលើរាងកាយមនុស្ស បានឡើងដល់ប្រហែល ៥០អង្សារសេ។

អ្នកស្រាវជ្រាវមានទិន្នន័យកំណត់អំពីរបៀបដែលកម្ដៅនេះបានប៉ះពាល់ដល់មនុស្សដោយភាគច្រើន នៅទូទាំងទ្វីបអាហ្រ្វិកខាងលិច និងថា តើវានាំឲ្យមានការចូលមន្ទីរពេទ្យ និងការស្លាប់ច្រើនយ៉ាងដូចម្ដេច។ ប៉ុន្តែបើយោងតាមអ្នកប្រឹក្សាហានិភ័យនៅមជ្ឈមណ្ឌលអាកាសធាតុអឌ្ឍចន្ទក្រហម និងជាអ្នកនិពន្ធម្នាក់នៃការវិភាគនេះ គឺលោកស្រី Maja Vahlberg បានឲ្យដឹងថា មានហេតុផលដែលត្រូវជឿថា អាចនឹងមានគ្រោះថ្នាក់រីករាលដាល៕