នាយករដ្ឋមន្ត្រីអេស្តូនី លោកស្រី Kaja Kallas បានគាំទ្រគំនិតរបស់ស្នងការអឺរ៉ុបដែលចង់ផ្ដោតជាពិសេសលើឧស្សាហកម្មការពារជាតិ ខណៈដែលសហភាពអឺរ៉ុប (EU) ប្រឹងប្រែងដើម្បីក្លាយជាអ្នកមានតួនាទីដ៏ធំ នៅក្នុងវិស័យនេះ។

លោកស្រី Kallas ដែលជាសមាជិកក្រុមប្រឹក្សាអឺរ៉ុបនៃបណ្ដាមេដឹកនាំជាតិរបស់ EU បានប្រាប់សារព័ត៌មាន Reuters នៅក្នុងបទសម្ភាសន៍ថា មានតម្រូវការបន្ទាន់ ដើម្បីអភិវឌ្ឍឧស្សាហកម្មការពារជាតិរបស់អឺរ៉ុប។ ជាមួយគ្នានេះ ប្រធានគណៈកម្មការអឺរ៉ុប លោកស្រី Ursula von der Leyen បានជំរុញឲ្យមានការជជែកដេញដោលគ្នា ដោយសន្យាថា នឹងបង្កើតតំណែងស្នងការការពារជាតិ ប្រសិនបើលោកស្រីឈ្នះអាណត្តិទី២ នៅចុងឆ្នាំនេះ។

គំនិតនេះបង្ហាញពីរបៀប ដែលវិស័យការពារជាតិបានផុសឡើងយ៉ាងខ្លាំងក្លាក្នុងរបៀបវារៈនយោបាយរបស់អឺរ៉ុប។ បណ្ដាមេដឹកនាំបានប្តេជ្ញាបង្កើនការចំណាយលើវិស័យការពារជាតិ និងការផលិតអាវុធ ចំពេលមានការព្រួយបារម្ភអំពីរុស្ស៊ី បន្ទាប់ពីប្រទេសនេះបានលុកលុយចូលប្រទេសអ៊ុយក្រែន និងអំពីអនាគតនៃការប្តេជ្ញាចិត្តផ្នែកសន្តិសុខរបស់សហរដ្ឋអាមេរិក ចំពោះអឺរ៉ុប។

អ្នកនយោបាយ និងអ្នកការទូតមួយចំនួនយល់ឃើញថា គំនិតរបស់លោកស្រី Von der Leyen ជាសញ្ញាស្វាគមន៍ដែលថា អឺរ៉ុបកាន់តែយកចិត្តទុកដាក់ចំពោះការការពារជាតិ។ អ្នកផ្សេងទៀតអះអាងថា គោលនយោបាយការពារជាតិ គឺជាដែនឥទ្ធិពលរបស់បណ្ដាប្រទេសសមាជិក ហើយសំណើនេះបង្កហានិភ័យដល់ការចម្លងដ៏គ្រោះថ្នាក់ជាមួយអង្គការណាតូ (NATO)។ លោកស្រី Kallas បាននិយាយថា ការប្រកាសបែបនេះនឹងសមហេតុផល ប្រសិនបើផ្តោតលើឧស្សាហកម្មការពារជាតិ៕