​​អា​ហ្វ​ហ្គា​នី​ស្ថាន​៖ មន្ត្រី​រដ្ឋាភិបាល​នៅ​ខេត្ត​មួយ​ក្នុង​ប្រទេស​អា​ហ្វ​ហ្គា​នី​ស្ថាន​ភាគ​ខាងលិច ​បាន​និយាយ​កាលពី​ថ្ងៃ​ព្រហស្បតិ៍​ ទី១៥ ខែ​កក្កដា​ថា ពួកគេ​បាន​ចរចា​ “បទ​ឈប់​បាញ់​គ្មាន​កំណត់​” ជាមួយ​ក្រុម​តា​លី​បង់​ ដើម្បី​ការពារ​ការវាយប្រហារ​បន្ថែម​ទៀត​ទៅលើ​រដ្ឋធានី​របស់​ខេត្ត​នេះ​។​

​សកម្មភាព​នេះ​បាន​កើតឡើង​ បន្ទាប់ពី​យុទ្ធជន​មកពី​ក្រុម​អ៊ីស្លាម​និយម​ដណ្ដើម​គ្រប់គ្រង​ទាំង​ស្រុង​លើ​ស្រុក​ទាំងអស់​ក្នុង​ខេត្ត Badghis ដែល​ឆ្លុះបញ្ចាំង​ពី​ការ​ដណ្ដើម​កាន់កាប់​កាន់តែ​ច្រើន​ឡើង ​របស់​ពួក​តា​លី​បង់លើ​ទឹកដី​ និង​ហេដ្ឋារចនាសម្ព័ន្ធ​ ក្នុង​ប៉ុន្មាន​សប្ដាហ៍​ចាប់​តាំង​ពី​ប្រធានាធិបតី​អាមេរិក Joe Biden បាន​ប្រកាស​ដក​កងទ័ព​សហរដ្ឋអាមេរិក​នៅ​ថ្ងៃ​ទី​១១ ខែ​កញ្ញា​។​ ​អភិបាលខេត្ត​ លោក Husamuddin Shams បាន​ប្រាប់​សារព័ត៌មាន​រ៉​យ​ទ័​រថា​ ព្រឹទ្ធាចារ្យ​កុល​សម្ព័ន្ធ ១០​នាក់​បាន​ទទួល​បន្ទុក​ក្នុង​បទ​ឈប់​បាញ់​គ្នា ​ដូច្នេះ​ពួកគេ​បាន​ពិភាក្សា​ជាមួយ​ពួក​តា​លី​បង់​ជា​មុន​សិន ​ហើយ​បន្ទាប់មក​បាន​ពិភាក្សា​ជាមួយ​រដ្ឋាភិបាល​ក្នុង​តំបន់​ ហើយ​ភាគី​ទាំង​ពីរ​បាន​ឈាន​ដល់​បទ​ឈប់​បាញ់​គ្នា​។​ ​លោក​ថា ពួក​តា​លី​បង់​បាន​ឈាន​ដល់​កិច្ច​ព្រមព្រៀង​មួយ​ ជាមួយ​ក្រុម​ព្រឹទ្ធាចារ្យ​កុលសម្ព័ន្ធ​ដើម្បី​ឆ្ពោះ​ទៅ​កាន់​តំបន់​ជាយក្រុង Qala-e-Naw ដែល​ជា​រដ្ឋធានី​របស់​ខេត្ត Badghis​។

​អ្នកនាំពាក្យ​ក្រុម​តា​លី​បង់​បាន​ច្រានចោល​ពាក្យ​ដែល​ថា ពួកគេ​បាន​ឈាន​ដល់​កិច្ចព្រមព្រៀង​បទ​ឈប់​បាញ់ ប៉ុន្តែ​ពួកគេ​បាន​ចាក​ចេញពី​ទីក្រុង​នេះ​ ​ជៀសវាង​បង្ក​ការបាត់បង់​អាយុជីវិត​ដល់​ជន​ស៊ី​ល​។​ ​លោក Abdul Aziz Bek ប្រធាន​ក្រុមប្រឹក្សា​ខេត្ត​នៅ Badghis បាន​និយាយ​ថា Qala-e-Naw គឺជា​ទីក្រុង​តែមួយគត់​នៅ​ក្នុង​ប្រទេស​អា​ហ្វ​ហ្គា​នី​ស្ថាន​ ជាទី​ដែល​ក្រុម​តា​លី​បង់​បាន​ប្រកាស​បទ​ឈប់​បាញ់​។ ​ចំណែក​ក្រុម​មន្ត្រី​អា​ហ្វ​ហ្គា​នី​ស្ថាន​ក្នុង​រដ្ឋធានី​កា​ប៊ុល ពុំ​ទាន់​អាច​សុំ​ការ​អត្ថាធិប្បាយ​បានទេ​៕

អត្ថបទ៖ សុខមាន