ក្រុមមន្រ្តីនិយាយថា នៅថ្ងៃព្រហស្បតិ៍នេះ រុស្ស៊ី បានបើកការវាយប្រហារដោយមីស៊ីលទ្រង់ទ្រាយធំបំផុតរបស់ពួកគេលើទីក្រុងគីវ និងតំបន់ជុំវិញ ក្នុងរយៈពេលជាច្រើនសប្តាហ៍កន្លងមកនេះ បណ្តាលឲ្យមនុស្សយ៉ាងហោច ១៧នាក់ រងរបួស និងបំផ្លិចបំផ្លាញសាលារៀន អគាររស់នៅ និងអគារឧស្សាហកម្ម ។

កងទ័ពអាកាសអ៊ុយក្រែន និយាយថា ប្រព័ន្ធការពាររបស់ពួកគេ បានបាញ់ទម្លាក់មីស៊ីលទាំងអស់ ក្រោយការផ្អាកការវាយប្រហារបែបនេះ អស់រយៈពេល ៤៤ថ្ងៃមកហើយលើទីក្រុងគីវ ។ ការខូចខាតអគារ អាចបណ្តាលមកពីការធ្លាក់បំណែកមីស៊ីល ។

ស្រ្តីជាម្តាយម្នាក់ បានឱបកូនស្រីរបស់គាត់នៅក្រៅអគារ ដែលបំណែកមីស៊ីលធ្លាក់ត្រូវ ។ អ្នកស្រីនិយាយថា អ្នកស្រីពិតជារន្ធត់ចិត្ត និងខឹងសម្បារខ្លាំងណាស់ ពេលមើលឃើញផ្ទះរបស់អ្នកស្រី រងការបំផ្លិចបំផ្លាញដោយសារមីស៊ីលរុស្ស៊ីបែបនេះ ។

មន្ត្រីទីក្រុងគីវនិយាយថា រុស្ស៊ីបានបើកការវាយប្រហារដោយមីស៊ីលទៅលើរដ្ឋធានីអ៊ុយក្រែន នៅព្រឹកថ្ងៃព្រហស្បតិ៍នេះ បណ្តាលឲ្យមនុស្សយ៉ាងហោចណាស់ ១៧ នាក់រងរបួស និងបានបំផ្លាញអគារលំនៅឋានជាច្រើនខ្នង រួមទាំងអគារឧស្សាហកម្ម ទោះបីជាប្រព័ន្ធការការពារដែនអាកាស បានបាញ់ទម្លាក់មីស៊ីលទាំងអស់នោះក៏ដោយ ។

លោក Serhiy Popko ប្រធានរដ្ឋបាលយោធា បាននិយាយថា ការវាយប្រហារទ្រង់ទ្រាយធំ លើកដំបូងក្នុងប៉ុន្មានសប្តាហ៍ថ្មីៗនេះ បានដាក់គោលដៅលើទីក្រុងគីវ ទាំងមីស៊ីលបាលីស្ទីក និងមីស៊ីលតម្រង់គោលដៅ ៕