​បាល់ទាត់៖ ​ខ្សែការពារ​បារាំង Raphael Varane កំពុងស្ថិត​ក្នុង​ផ្លូវ​ចាក​ចេញពី​ក្លិប​អេ​ស្ប៉ា​ញ Real Madrid ច្រើន​ខែ​មកហើយ ​ខណៈ​កិច្ចព្រមព្រៀង​ចាកចេញ​ទំនងជា​ចេញ​ជា​រូបរាង​។​ បើតាម​ការចុះផ្សាយ​ រប​ស់​សារព័ត៌មាន​អេ​ស្ប៉ា​ញ​ជាច្រើនបានឲ្យដឹងថា Manchester United និង Real Madrid ខិតជិត​ឈានដល់​កិច្ចព្រមព្រៀង​នឹង​គ្នា​ហើយ ​ក្នុងការ​ផ្ទេរ​កីឡាករ​វ័យ ២៧ឆ្នាំ​រូបនេះ​។

​​សារព័ត៌មាន The Mirror ក៏បាន​រាយការណ៍​ផងដែរ​ថា ​ក្រុម​អធិរាជ​ស Real Madrid បើកចំហ​ចំពោះ​លទ្ធភាព​ក្នុង​ការលក់ Raphael Varane ទៅឲ្យ​ក្រុម​បិសាច​ក្រហម Manchester United នៅ​រដូវក្តៅ​នេះ​ ចំពេល​ដែល​កីឡាករ​បារាំង​រូបនេះ​នឹងមិន​បន្ត​កិច្ចសន្យា​ ជាមួយ​ក្លិប​អេ​ស្ប៉ា​ញ​ឡើយ​។​ ​​កីឡាករ​វ័យ ២៧ឆ្នាំ​រូបនេះ​បាន​នៅ​ជាមួយ Los Blancos ចាប់តាំងពី​ឆ្នាំ២០១១ និង​បាន​បង្ហាញខ្លួន​ចំនួន ៣៥១លើក​សម្រាប់​ក្លិប​គ្រប់​ក្របខណ្ឌ​។ ​​Raphael Varane នឹង​ដល់​ឆ្នាំ​ចុងក្រោយ​នៃ​កិច្ចសន្យា​របស់ខ្លួន​នៅ​ខែមិថុនា​ឆ្នាំក្រោយ​ ហើយ​មិនមាន​ការចង្អុលបង្ហាញ​ណា​មួយ​ដែលថា​ គេ​សុខចិត្ត​បន្ត​ការ​ស្នាក់នៅ​ជាមួយ​ក្លឹប​នោះទេ​។​

​​ដូច្នេះ Real Madrid ចង់​រឹ​មិន​ចង់​នឹង​អាច​លក់​ ខ្សែការពារ​សញ្ជាតិ​បារាំង​នេះ​ចេញ​នៅ​រដូវក្តៅ​ខាងមុខ ប្រសើរ​ជាងការចាកចេញ​ដោយ​មិន​ទទួលបាន​អ្វី​សោះ​។ Manchester United មាន​ចំណាប់អារម្មណ៍​លើ​ខ្សែការពារ​កណ្តាល​រូបនេះ តាំងពី​ពេលដែល Varane នៅ Lens ជិត​មួយ​ទសវត្សរ៍​មុន​ហើយ​ក្លិប​នៅ Old Trafford មួយ​នេះ​ក៏​ព្យាយាម​ម្តងទៀត​នៅ​ឆ្នាំ២០១៩ ចែចូវ​កីឡាករ​វ័យ ២៧ឆ្នាំ​រូបនេះ​ពី Real Madrid៕

​អត្ថបទ​៖​នាង សុភា​វុ​ធ