បាត់ដំបង ៖ នាយកដ្ឋានផ្លូវលំជនបទ នៃក្រសួងអភិវឌ្ឍន៍ជនបទ ថែទាំខួបផ្លូវចំនួន៤កំណាត់ ក្រាលកៅស៊ូ DBST បន្ថែមពីលើ នៅក្នុងខេត្ត ចំនួនពីរបានយ៉ាងល្អប្រសើរ សម្រាប់បម្រើប្រយោជន៍សាធារណៈ ជាពិសេសការដឹកជញ្ជូនកសិផល និងការធ្វើដំណើរប្រជាពលរដ្ឋនៅ មូលដ្ឋាន។

​ឯកឧត្តម ជា ស៊្រុន រដ្ឋលេខាធិការក្រសួងអភិវឌ្ឍន៍ជន និងជាសមាជិកគណៈកម្មាធិការលទ្ធកម្ម (គ.ល) នៅថ្ងៃទី ២១ ខែ មីនា ឆ្នាំ ២០២៤ នេះ បានដឹកនាំប្រតិភូចុះត្រួតពិនិត្យ និងវាយតម្លៃលើលទ្ធផលការងារថែទាំខួបផ្លូវ សរុបចំនួន ៤ កំណាត់ នៅក្នុង ខេត្តបាត់ដំបង និងខេត្តសៀមរាប ក្នុងនោះសម្រាប់គម្រោងទី១ មានចំនួន២កំណាត់ ដោយក្រាលកៅស៊ូ DBST បន្ថែមពីលើ មាន ប្រវែងសរុបប្រមាណ ៧,២ គីឡូម៉ែត្រ ទទឹង ៦ ម៉ែត្រ ក្នុងនោះជួសជុលកាយគ្រឹះឡើងវិញប្រវែង ២,២ គីឡូម៉ែត្រ ទទឹង ៦ ម៉ែត្រ ស្ថិត នៅក្នុងឃុំមានជ័យ ស្រុកសំឡូត ខេត្តបាត់ដំបង ។ ចំណែកគម្រោងទី២ មានចំនួន ២កំណាត់ និងក្រាលកៅស៊ូ DBST បន្ថែមពីលើ ដូចគ្នា មានប្រវែងសរុប ១០ គីឡូម៉ែត្រ ទទឹងខ្នងលើ ៦ ម៉ែត្រ ស្ថិតក្នុងឃុំបល្ល័ង្ក និងឃុំសសរស្តម្ភ ស្រុកប្រាសាទបាគង និងស្រុកពួក ខេត្តសៀមរាប។

ទាក់ទងគម្រោងផ្លូវខាងលើនេះ, លោក អ៊ឹង ឌីម៉ង់ អនុប្រធាននាយកដ្ឋានផ្លូវលំជនបទ លើកឡើងថា បន្ទាប់ពីបានគោលការណ៍ឯកភាពពីក្រសួងអភិវឌ្ឍន៍ជនបទ, នាយកដ្ឋានផ្លូវលំជនបទបានអនុវត្តការងារនេះភ្លាម ដើម្បីជួយសម្រួលដល់ប្រជាពលរដ្ឋក្នុង មូលដ្ឋាន បង្ករភាពងាយស្រួលក្នុងការធ្វើចរាចរទៅមក ការដឹកជញ្ជូនកសិផល និងដំណាំបន្ទាប់បន្សំរបស់ប្រជាពលរដ្ឋមកកាន់ទីផ្សារ ការជួយសម្រួលដល់សិស្សានុសិស្សធ្វើដំណើរទៅកាន់សាលារៀន ការដឹកជញ្ជូនអ្នកជម្ងឹមកកាន់មណ្ឌលសុខភាពបានទាន់ពេលវេលា ជៀសវាងនូវគ្រោះថ្នាក់ផ្សេងៗនារដូវទឹកឡើង និងបង្ករលក្ខណៈងាយស្រួលដល់សេវាកម្មនានាដូចជា៖ អប់រំ សុខភាព អនាម័យ ព័ត៌មាន សិក្សាធិការជាដើម។ 

ជុំវិញការថែទាំខួបផ្លូវខាងលើនេះ, ឯកឧត្តម ជា ស៊្រុន ឯកភាពទទួលយកលទ្ធផល នៃការអនុវត្តការងាររបស់នាយកដ្ឋានផ្លូវលំជនបទ បញ្ចប់សុពលភាពការងារដោយគុណភាព និងសោភ័ណភាព ដោយរក្សាគុណភាពល្អដដែល ក្នុងនោះផងដែរ ឯកឧត្តមបាន សំណូមពរដល់អាជ្ញាធរមូលដ្ឋានភូមិ-ឃុំ ដែលមានតួនាទីទទួលបន្ទុកថែទាំបន្ត ត្រូវសហការណែនាំឱ្យប្រជាពលរដ្ឋ ចូលរួមក្នុងការថែទាំផ្លូវខាងលើឱ្យបានល្អប្រសើរ ប្រកបដោយគុណភាព ត្រូវមានការយាមកាមយ៉ាងហ្មត់ចត់ ដើម្បីរក្សាគុណភាពផ្លូវឱ្យបានគង់វង្សយូរអង្វែង ហើយចាត់ទុកថាផ្លូវនេះជារបស់ពួកគាត់គ្រប់គ្នា៕

អត្ថបទ៖ សុន រ៉ាឌី