ក្រុមសង្រ្គោះនៅចុងបូព៌ាប្រទេសរុស្ស៊ី បានព្យាយាមគាស់កម្ទេចថ្ម និងមុជទឹក កាលពីថ្ងៃពុធ ក្នុងបំណងជួយសង្រ្គោះកម្មករអណ្ដូងរ៉ែ១៣នាក់ ដែលបានជាប់នៅក្នុងជម្រៅ១២០ម៉ែតក្រោមដីក្នុងអណ្ដូងរ៉ែមាសមួយរយ:ពេលជិត៣ថ្ងៃកន្លងមកនេះ។

កម្មករអណ្ដូងរ៉ែបានជាប់ខ្លួនកាលពីថ្ងៃច័ន្ទដោយសារធ្លាក់ដុំថ្មនៅឯអណ្ដូងរ៉ែមាសPioneer(ផៃអូនៀ)។ អណ្ដូងរ៉េនោះជាអណ្ដូងរ៉ែមួយដែលធំជាងគេបំផុតរបស់ប្រទេសរុស្ស៊ី ស្ថិតនៅតំបន់អាមួរ(Amur) ដែលមានព្រំដែនជាប់ប្រទេសចិនចម្ងាយប្រមាណជា៥.៣០០គីឡូម៉ែត្រភាគខាងកើតក្រុងម៉ូស្គូ។

អភិបាលតំបន់អាមួរលោក វ៉ាស៊ីលី អ័រឡូវ(Vasily Orlov) បាននិយាយនៅលើបណ្តាញតេឡេក្រាមថា ស្ថានភាពនៅតែពិបាកនៅឡើយ។ លោកអ័រឡូវ បាននិយាយថា ក្រុមសង្រ្គោះអណ្ដូងរ៉ែដែលមានជំនាញបានមកដល់តាមជើងយន្ដហោះ ដោយចេញដំណើរពីតំបន់ធ្យូងថ្មដ៏ធំល្វឹងល្វើយរបស់រុស្ស៊ី ជាល្អាងគូសនេត(Kuznetsk) ដែលគេស្គាល់ថាជាគូសបាស់ (Kuzbass) និងតំបន់ស៊ីប៊ីរីផ្សេងទៀត។

ទីភ្នាក់ងាព័ត៌មានRIAរបស់រដ្ឋ បានរាយការណ៍ថា សេវាសង្រ្គោះបន្ទាន់រុស្ស៊ីបាននិយាយកាលពីថ្ងៃពុធថា លំហូរកម្ទេចថ្មនិងដុំថ្មនៅឯអណ្ដូងរ៉ែ គឺមានទំហំ៩ដងធំជាង ការប៉ាន់ប្រមាណពីមុន៕