អំឡុងដំណើរទស្សនកិច្ចទៅកាន់ទីក្រុងគីវ នៅថ្ងៃព្រហស្បតិ៍ (ទី២១ ខែមីនា) នេះ ប្រធានគណៈកម្មាធិការយោធារបស់អង្គការណាតូ (NATO) លោក Rob Bauer បាននិយាយថា សម្ព័ន្ធមិត្តរបស់អ៊ុយក្រែនមិនគួរមានទុទ្ទិដ្ឋិនិយមពេកនោះទេអំពីសមត្ថភាពរបស់ខ្លួនក្នុងការវាយរុញច្រានកងទ័ពរបស់រុស្ស៊ី ហើយបានអំពាវនាវឲ្យផ្តល់កញ្ចប់ជំនួយសំខាន់ៗឲ្យបានឆាប់រហ័ស។

លោក Bauer បានដឹកនាំដំណើរទស្សនកិច្ចជាផ្លូវការលើកដំបូងទៅកាន់ទីក្រុងគីវតាមរយៈគណៈប្រតិភូយោធារបស់អង្គការណាតូ គិតចាប់តាំងពីខែកុម្ភៈ ឆ្នាំ២០២២ នៅពេលដែលរុស្ស៊ីបានបញ្ជូនកងទ័ពរាប់ពាន់នាក់ចូលលុកលុយអ៊ុយក្រែន។

គួរបញ្ជាក់ថា កងទ័ពរបស់ទីក្រុងគីវ កំពុងប្រឈមនឹងការខ្វះខាតគ្រាប់រំសេវ និងកម្លាំងមនុស្ស ហើយកំពុងចាញ់ប្រៀបនៅភាគខាងកើត ដែលកងកម្លាំងរុស្ស៊ីកំពុងរុលមុខយ៉ាងយឺតៗ។

លោក Bauer បានប្រាប់វេទិកាសន្តិសុខទីក្រុងគីវថា៖ «អ៊ុយក្រែនត្រូវការការគាំទ្រកាន់តែច្រើន។ ហើយត្រូវការជំនួយនោះឥឡូវនេះ។ ពេលវេលានៅអ៊ុយក្រែនមិនត្រូវបានវាស់វែងជាថ្ងៃ សប្តាហ៍ ឬខែនោះទេ។ វាត្រូវបានវាស់វែងដោយជីវិតមនុស្ស។ នៅក្នុងបណ្ដាប្រទេសសម្ព័ន្ធមិត្ត មួយសប្តាហ៍ គឺមួយសប្តាហ៍។ នៅអ៊ុយក្រែន មួយសប្តាហ៍ គឺជាម្តាយ ឪពុក កូន មិត្តភ័ក្តិ គូស្នេហ៍ ឬការបាត់បង់ជារៀងរហូត»។

ជាមួយគ្នានេះ លោកបានសាទរចំពោះភាពធន់ និងសមត្ថភាពរបស់អ៊ុយក្រែន ក្នុងការសម្របខ្លួនយ៉ាងឆាប់រហ័ស ខណៈពេលដែលមានការផ្លាស់ប្តូរទិដ្ឋភាពជាច្រើននៃសង្គ្រាមសម័យទំនើប៕