ភ្នំពេញ៖ ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បានប្រកាសថា កម្ពុជានឹងចាក់វ៉ាក់សាំងដល់ក្រុមមនុស្សមានអាយុចន្លោះពី ១២ ដល់ទៅ ១៧ឆ្នាំ ដែលជាផ្នែកមួយនៃកិច្ចខិតខំប្រឹងប្រែងរបស់រដ្ឋាភិបាលដើម្បីបង្កើតភាពស៊ាំដល់ប្រជាជនសម្រាប់បង្ការជំងឺកូវីដ-១៩។
សម្ដេចតេជោ ហ៊ុន សែន បានប្រកាសបែបនេះនៅក្នុងសំឡេងសំឡេងពិសេសរបស់សម្ដេចដែលត្រូវបានផ្សព្វផ្សាយនៅព្រឹកថ្ងៃនេះ។
សម្ដេចតេជោ ហ៊ុន សែន ថ្លែងថា៖ «យើងមានការចាំបាច់ដើម្បីចាក់ជូនកុមារ និងយុវវ័យអាយុ ១២ឆ្នាំ ដល់អាយុ ១៧ឆ្នាំបន្តទៀត បន្ទាប់ពីដំណើរការចាក់វ៉ាក់សាំងសម្រាប់អ្នកដែលមានអាយុពី ១៨ឆ្នាំឡើងទៅ ដែលមកដល់ពេលនេះ យើងចាក់បានប្រមាណជា ៥លាន ៤សែននាក់រួចស្រេចទៅហើយ»។
ប្រមុខរាជរដ្ឋាភិបាលកម្ពុជា បានបញ្ជាក់ថា នេះគឺជាការគិតគូររបស់រាជរដ្ឋាភិបាលទៅដល់អនាគតរបស់កុមារ និងយុវជន ជាពិសេសសុខមាលភាពរបស់ពួកគេសម្រាប់បើកដំណើរការសាលារៀនឡើងវិញ។
សម្ដេចតេជោ ហ៊ុន សែន បានថ្លែងឱ្យដឹងផងដែរថា កុមារ និងយុវវ័យអាយុចន្លោះពី ១២ ទៅ ១៧ឆ្នាំ មានចំនួនខ្ទង់ ២លាននាក់នៅទូទាំងប្រទេស ហើយត្រូវការវ៉ាក់សាំងជាង ៤លានដូសដើម្បីចាក់ជូនពួកគេ។
កម្ពុជាបានចាប់ផ្ដើមយុទ្ធនាការចាក់វ៉ាក់សាំងជូនប្រជាពលរដ្ឋរបស់ខ្លួនចាប់តាំងពីថ្ងៃទី១០ ខែកុម្ភៈក្នុងឆ្នាំនេះ ហើយរហូតមកដល់ថ្ងៃនេះ ប្រជាជនកម្ពុជាជាង ៥លាន ៤សែននាក់ បានទទួលវ៉ាក់សាំងបង្ការជំងឺកូវីដ-១៩ ក្នុងនោះពលរដ្ឋជាង ៤លាននាក់ហើយ បានទទួលវ៉ាក់សាំងទាំងពីរដូសរួចរាល់៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
