ក្រសួងពាណិជ្ជកម្ម គាំទ្រ និងជំរុញលើកទឹកចិត្តដល់ការធ្វើធុរកិច្ចលើវិស័យគ្រឿងអលង្ការ និង​ត្បូង​មាន​តម្លៃ​នៅកម្ពុជា តាមរយៈការជំរុញពង្រីកទីផ្សារក្នុងស្រុក និងទៅកាន់ទីផ្សារអន្តរជាតិ។

លោកជំទាវ តាន់ ទេពីកណ្ណិកា អនុរដ្ឋលេខាធិការក្រសួងពាណិជ្ជកម្ម លើកឡើង​នៅ​ក្នុង​កម្ម​វិធី​បើក​សម្ពោធ ពិព័រណ៍គ្រឿងអលង្ការ និងត្បូងកម្ពុជា អន្តរជាតិ លើកទី១៥ ឆ្នាំ២០២៤ និង​ការ​បើក​សម្ពោធ​ជា​ផ្លូវការ នៃកម្មវិធីនារីឯកគ្រឿងអលង្ការ និងត្បូងអន្តរជាតិ លើកទី១ ឆ្នាំ២០២៤ នៅ​ថ្ងៃទី២១ ខែមីនា ឆ្នាំ២០២៤ នេះថា ពាក់ព័ន្ធគ្រឿងអលង្ការ និងត្បូងមានតម្លៃនេះ ក្រសួង​ពាណិជ្ជ​កម្ម តែងតែគាំទ្រ និងជំរុញលើកទឹកចិត្តការធ្វើធុរកិច្ចលើវិស័យគ្រឿងអលង្ការ និងត្បូង​មាន​តម្លៃ​នៅ​កម្ពុជា តាមរយៈការចូលរួមរៀបចំបង្កើតសមាគមនេះឡើង និងបន្តគាំទ្រ​សហការ​ជាមួយ​សមាគម ដោយប្រមូលកៀរគរផលិតករ អាជីវករ និងគ្រប់ភាគី​ភាគព័ន្ធ​ក្នុង​វិស័យ​គ្រឿង​អលង្ការ​ទាំងអស់ ឲ្យក្លាយទៅជាតួអង្គតែមួយប្រមូលផ្តុំនិងលើកទឹកចិត្តឲ្យមានគំនិតច្នៃប្រឌិត ដើម្បី​អភិវឌ្ឍន៍លើវិស័យគ្រឿងអលង្ការ និងទាំងការរចនាម៉ូត ការធ្វើពិពិធកម្មទីផ្សារ ដើម្បី​ជួយ​រាជ​រដ្ឋាភិបាលបើកច្រកសេដ្ឋកិច្ចសម្រាប់វិស័យនេះ និងបាន​ចូលរួម​ចំណែក​ក្នុង​ការ​យក​រូបិយប័ណ្ណ​បរទេសមកចាក់បញ្ចូលក្នុងសេដ្ឋកិច្ចជាតិ។

លោកជំទាវ បន្តថា ទំហំទីផ្សារនៃផលិតផលគ្រឿងអលង្ការ និងត្បូងមានតម្លៃនៅកម្ពុជា បាន​កំពុង​តែ​បន្តរីក​ចម្រើន​កាន់តែធំឡើងរយៈពេលប៉ុន្មានឆ្នាំមកនេះ ក្នុងនោះសម្រាប់គោល​បំណ​ង​នៃ​ក្រសួង​ពាណិជ្ជកម្មចំពោះវិស័យគ្រឿងអលង្ការ និងត្បូងមានតម្លៃនេះ គឺមិនត្រឹម​តែ​ចង់​ពង្រីក​ទីផ្សារ​ក្នុង​ប្រទេសប៉ុណ្ណោះទេ ប៉ុន្តែក៏មានគោលដៅក្នុងការពង្រីកទីផ្សារអន្តរជាតិ សម្រាប់​ទំនិញ​គ្រឿង​អលង្ការ និងត្បូងមានតម្លៃ ដែលផលិតនៅកម្ពុជាផងដែរ ដើម្បីបង្កើន​ឱកាស​ទីផ្សារ និង​កាលា​នុវត្តភាព សម្រាប់វិនិយោគិនជាតិនិងអន្តរជាតិ នៅក្នុងវិស័យនេះ។

ចំណែក, លោកបណ្ឌិត ឆាយ ស៊ីណាត ប្រធានស្តីទីសមាគមពាណិជ្ជករគ្រឿងអលង្ការ និង​ត្បូង​មាន​តម្លៃ​កម្ពុជា លើកឡើងផងដែរថា គ្រឿងអលង្ការ និងត្បូង មានការ​អភិវឌ្ឍ​យ៉ាង​ខ្លាំង​នូវ​ផលិត​ផល​ដ៏មានតម្លៃនេះ ក្នុងការកែច្នៃជាច្រើនម៉ូតជាច្រើនទម្រង មានក្បាច់ក្បូរ​រចនា​យ៉ាង​ប្រណិត ដើម្បីប្រកួតប្រជែងលើទីផ្សារ ដោយយើងសម្លឹងទៅមើលការច្នៃគ្រឿងអលង្ការ និង​ត្បូង​កាល​ពីសម័យមុន មានក្បាច់ទៅតាមសម័យកាលនោះ, ប៉ុន្តែសម័យកាលបច្ចុប្បន្ននេះ បង​ប្អូន​ខ្មែរ​យើង ជាពិសេសជាងទង (ជាងមាស) មានជំនាញ​យ៉ាង​ខ្លាំង​ក្នុង​ការ​រចនា​ម៉ូត​របស់​គ្រឿង​អលង្ការ ទោះបីជាក្បាច់នោះពិបាកក្នុងការរចនាយ៉ាងណាក្តី គឺគាត់អាចច្នៃបាន មិន​ថា​គ្រឿង​អលង្ការជា មាស ផ្លាកទីន ស្ពាន ឬត្បូងថ្មឡើយ។

លោក​បន្តថា បច្ចុប្បន្នយើងសង្កេតឃើញថា គ្រឿងអលង្ការ និងត្បូងមានតម្លៃរបស់កម្ពុជា មាន​សន្ទុះ​យ៉ាងខ្លាំងទាំងក្នុងស្រុក និងក្រៅស្រុក ម្យ៉ាងទៀតនៅ​ពេលការ​ដាក់​តាំង​បង្ហាញ​នៅ​តាម​បណ្តា​ប្រទេសផ្សេងៗ ដូចជា ប្រទេសឥណ្ឌា ថៃ ចិន ក្នុងទីក្រុងហុងកុង ប្រទេសសិង្ហបុរី និង​ប្រទេស​មួយ​ចំនួនទៀតក្នុងទ្វីបអាស៊ី រួមបញ្ជូលទាំងទ្វីបអឺរ៉ុប ដែលជាដៃគូ​របស់​ប្រទេស​កម្ពុជា​យើង​ គឺមានការចាប់អារម្មណ៍យ៉ាងខ្លាំង នូវការរចនា​ច្នៃម៉ូត​ក្បាច់​ក្បូរ​ពីស្នាដៃ​របស់​បង​ប្អូន​ខ្មែរ​យើង​។

សូមបញ្ជាក់ថា កម្មវិធីពិព័រណ៌នេះ មានការចូលរួមពីក្រុមហ៊ុនក្នុង និងក្រៅប្រទេសដូចជា ក្រុម​ហ៊ុ​នកម្ពុជា ចិន ឥណ្ឌា អ៊ីតាលី ជប៉ុន ថៃ និងវៀតណាមជាដើម ព្រម​ទាំង​មាន​ការ​ដាក់​តាំង​បង្ហាញ​លក់​គ្រឿងអលង្ការ ត្បូងមានតម្លៃ គ្រឿងម៉ាស៊ីន និងបច្ចេកវិទ្យាថ្មី សម្រាប់កែច្នៃ​គ្រឿង​អលង្ការ ផងដែរ៕ អត្ថបទ៖ សុន រ៉ាឌី