មន្រ្តីអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានអះអាងថា កម្មករ​និយោជិត​របស់​រោងចក្រ Y&W ហ្គាមេន រងគ្រោះដោយសារថៅកែរត់ចោល និងកម្មកររោងចក្រ RG Footwear (Cambodia) រងគ្រោះដោយសារអគ្គិភ័យ គិតមកដល់ពេលនេះ កម្មករ​និយោជិត​ជា​ច្រើន​នាក់​ហើយ ទទួលបានឱកាសការងារថ្មីធ្វើ និងរង់ចាំដំណោះស្រាយជាបន្តបន្ទាប់។

ឯកឧត្តម កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ នៅ​ព្រឹក​ថ្ងៃទី២២ ខែមីនា ឆ្នាំ២០២៤នេះ បានមានប្រសាសន៍ប្រាប់ ប៊ីធីវី ឲ្យដឹងថា នៅក្រោយ​មាន​បញ្ហា​កើតឡើងចំពោះកម្មក កម្មការិនីរោងចក្រទាំងនេះ ក្រសួង​បាន​បញ្ជូន​មជ្ឈ​មណ្ឌល​ការងារ​ចល័ត នៃទីភ្នាក់ងារជាតិមុខរបរ និងការងារ (NEA) ចុះទៅប្រចាំការនៅតំបន់ និងក្បែរ​ការ​រស់​នៅ​របស់កម្មករ ធ្វើយ៉ាងណាផ្តល់ឱកាសការងារជាង ៣ពាន់កន្លែង សម្រាប់​កម្មករ​និយោជិត​នៅ​ក្នុងរោងចក្រ ដែលអត់ការងារធ្វើ។ ដោយឡែក ចំពោះកម្មកររោងចក្រ RG Footwear ដែលរងហានិភ័យដោយសារអគ្គិភ័យ ឯកឧត្តម បានបញ្ជាក់ថា ទីភ្នាក់ងារជាតិមុខរបរ និង​ការងារ ក៏បានបញ្ជូនមជ្ឈមណ្ឌលចល័ត ដើម្បីទៅកាន់ទីនោះ ក្នុងការ​ផ្តល់​ព័ត៌មាន​អំពី​ឱកាស​ការងារ​ថ្មី​ៗ សម្រាប់កម្មករដែលចង់ស្វែងរកការងារថ្មី ពោលគឺផ្តល់​ភាព​ងាយ​ស្រួល​ដល់​ពួក​គេ​រហូ​ត​ជាង ៨ពាន់កន្លែងឯណោះ។

លោក គឹម ចាន់សំណាង ប្រធានសហភាពសិទ្ធិកម្មករកម្ពុជា យល់ឃើញថា ការងារខាងលើនេះ បង្ហាញ​ឲ្យឃើថា រដ្ឋាភិបាលពិតជាមានការយកចិត្តទុកដាក់ខ្លាំងណាស់ទៅកាន់កម្មករនិយោជិត ជា​ពិសេសកម្មករដែលកំពុងជួបបញ្ហា និងត្រូវការជំនួយបន្ទាន់បែបនេះ ដើម្បី​មាន​ប្រាក់​ចំណូល​ទៀង​ទាត់​ សម្រាប់ផ្គត់ផ្គង់ការចំណាយប្រចាំថ្ងៃក្នុងការរស់នៅរបស់ពួកគាត់ ក៏ដូច​ជា​ក្រុម​គ្រួសារ​ទាំងមូល​។

គួរបញ្ជាក់ថា ដើម្បីជួយសម្រាលទុក្ខលំបាករបស់កម្មករនិយោជិត ក្រសួងការងារ និង​បណ្តុះ​បណ្តាល​វិជ្ជាជីវៈ បានប្រកាសថា សម្រាប់អត្ថប្រយោជន៍បេឡាជាតិសន្តិសុខសង្គម (ប.ស.ស.) រួម​មាន ផ្នែកថែទាំសុខភាព អត្ថប្រយោជន៍នៅពេលសម្រាលកូន និងការពិនិត្យផ្ទៃពោះ កម្មករ​និយោជិត​នៅ​តែទទួលបានអត្ថប្រយោជន៍ និងប្រើប្រាស់ ប.ស.ស. ជាធម្មតា។ ទន្ទឹមនេះ ក្រសួង​ការងារ បានបញ្ជាក់បន្ថែមទៀតថា ក្នុងករណីកម្មករនិយោជិតចង់ស្វែងរកការងារ អាចចាប់​យក​ឱកាស​ការងារ​ថ្មី​តាមរយៈមជ្ឈមណ្ឌលការងារចល័ត នៃទីភ្នាក់ងារជាតិមុខរបរ និងការងារ (NEA)។ ក្រសួងការងារ ក៏នឹងចុះផ្សព្វផ្សាយពីឱកាសការងារ និងមានមន្រ្តី​រង់ចាំ​ចុះ​ឈ្មោះស្វែង​រក​ការងារ​ធ្វើភ្លាមៗជូនកម្មករនិយោជិតនៅម្តុំរោងចក្រតែម្តង ដើម្បីឲ្យកម្មករ​ទទួល​បាន​ឱកាស​ការងារ​ជា​មួយ​នឹងរោងចក្រ សហគ្រាស ដែលនៅក្បែរនឹង​តំបន់​ដែល​កម្មករ​និយោជិត​រស់​នៅ​ស្រាប់​៕ អត្ថបទ៖ ឈិត បូរ៉ាវី