ក្រសួងការពារជាតិកម្ពុជា និងក្រសួងការពារជាតិថៃ បានសន្យាធ្វើកិច្ចសហប្រតិបត្តិការជាមួយគ្នា ក្នុងការបោសសំអាតមីននៅតាមព្រំដែន ក៏ដូចជាការបំពុលផ្សែងឆ្លងដែន ទប់ស្កាត់​ការ​ជួញ​ដូរ​អាវុធ​ខុស​ច្បាប់ និងកិច្ចការងារមួយចំនួនទៀត ។

យោងតាមលទ្ធផល នៃកិច្ចប្រជុំគណៈកម្មាធិការព្រំដែនទូទៅកម្ពុជា-ថៃ (GBC) លើកទី១៦ នៅ​ថ្ងៃ​ទី២២ ខែមីនា ឆ្នាំ២០២៤ ដឹកនាំដោយឯកឧត្តម ទៀ សីហា ឧបនាយករដ្ឋមន្ត្រី រដ្ឋមន្ត្រី​ក្រសួង​ការពារ​ជាតិកម្ពុជា និងឯកឧត្តម Sutin KLUNGSANG រដ្ឋមន្ត្រីក្រសួងការពារជាតិ ថៃ គឺ​អនុ​លោមតាម​កិច្ចព្រមព្រៀងស្តីពី ការបង្កើតកិច្ចសហប្រតិបត្តិការព្រំដែនរវាងកម្ពុជា-ថៃ មាន​គោល​បំណង​ជំរុញកិច្ចសហប្រតិបត្តិការលើវិស័យសន្តិភាព និងសន្តិសុខនៅតាមតំបន់ព្រំដែន ក៏​ដូច​ជា​ពង្រឹងទំនាក់ទំនងរវាងកងកម្លាំងប្រដាប់អាវុធ និងអង្គភាព រក្សាសន្តិសុខនៃប្រទេសទាំងពីរ ។

កិច្ចប្រជុំបានសង្កត់ធ្ងន់លើសារៈសំខាន់ នៃការរៀបចំកិច្ចប្រជុំ GBC លើកទី១៦ ដែលផ្តល់​ការ​ណែនាំ និងទិសដៅបន្តជំរុញទំនាក់ទំនង និងកិច្ចសហប្រតិបត្តិការល្អ ដែល​មាន​ស្រាប់​រវាង​កង​កម្លាំង​ប្រដាប់​អាវុធទាំងពីរលើគ្រប់កម្រិត ដើម្បីបង្កើនសន្តិភាព ស្ថិរភាព និងសន្តិសុខ​នៅ​តាម​តំបន់​ព្រំដែន និងស្វាគមន៍ចំពោះវឌ្ឍនភាព នៃកិច្ចសហប្រតិបត្តិការតំបន់ព្រំដែន។

ភាគីទាំងពីរ បានពិនិត្យ លទ្ធផលនៃការអនុវត្តកម្មវិធីកិច្ចសហប្រតិបត្តិការផ្សេងៗ ដែល​ប្រគល់​ភារកិច្ច​ដោយ​កិច្ចប្រជុំ GBC លើកទី១៥ ដែលប្រព្រឹត្តទៅនៅទីក្រុងបាងកក នៃប្រទេសថៃ នា​ថ្ងៃ​ទី​២៥ ខែវិច្ឆិកា ឆ្នាំ២០២២ ដូចជាកិច្ចសហប្រតិបត្តិការ លើការឆ្លងព្រំដែន បញ្ហាការងារ ការ​ទប់​ស្កាត់​ការ​ជួញ​ដូរ និងបង្ក្រាបគ្រឿងញៀន ការលើកកម្ពស់កិច្ចសហប្រតិបត្តិការ រវាងយោធាកម្ពុជា និង​អង្គភាពសន្តិសុខថៃនៅតាមតំបន់ព្រំដែន កសិកម្ម សុខភាពសាធារណៈ ការអភិវឌ្ឍន៍ គុណ​ភាព​ជីវិត ការអប់រំ សាសនា និងវប្បធម៌ ។

កិច្ចប្រជុំបានទទួលស្គាល់ថា ភាគីទាំងពីរបានអនុវត្តនូវតួនាទី ភារកិច្ចនៅតាមតំបន់ព្រំដែន ស្រប​តាម​ការ​ណែនាំ និងវិធានការបានកំណត់ឯកភាពក្នុងកិច្ចប្រជុំលើកទី១៥ ហើយ​បាន​ឯកភាព​ជំរុញ​ឱ្យ​ភាគីទាំងពីរ បន្តការងាររក្សាសន្តិភាព និងស្ថិរភាពនៅតាមតំបន់ព្រំដែន ស្រប​តាម​ការ​ណែនាំ និងវិធានការបានកំណត់ឯកភាពក្នុងកំណត់ហេតុកិច្ចប្រជុំលើកទី១៦ លើគ្រប់វិស័យ ។

កិច្ចប្រជុំលើកទី១៦នេះ ក៏បានពិចារណាលើកិច្ចសហប្រតិបត្តិការលើគ្រប់វិស័យ និង​ការ​បន្ត​ទិស​ដៅ​អនុវត្តការងាររួមគ្នា ក៏ដូច​ជា​បំពេញ​បន្ថែម​កិច្ច​សហប្រតិបត្តិការ​លើ​ការ​ដោះមីន​នៅ​តាម​តំបន់​ព្រំដែន ការដោះស្រាយបញ្ហាបំពុលផ្សែងឆ្លងដែន ការរត់ពន្ធអាវុធ និងបញ្ហា Call Center ហើយ​បាន​ឯក​ភាពរក្សា និងជំរុញកិច្ចសហប្រតិបត្តិការ លើវិស័យ​សន្តិសុខ​តាម​ព្រំដែន​គ្រប់​កម្រិត​ជា​ប្រចាំ ដើម្បីធានាបាននូវសន្តិភាព និងសន្តិសុខនៅតាមតំបន់ព្រំដែន ដែលជា​កត្តា​សំខាន់​បំផុត​សម្រាប់​ការអភិវឌ្ឍន៍នៃប្រទេសទាំងពីរ ។

ឯកឧត្តមឧបនាយករដ្ឋមន្ត្រី ទៀ សីហា បានគូសបញ្ជាក់ថា កិច្ច​ប្រជុំ​នេះ​បាន​រួម​គ្នា​ដោះ​ស្រាយ​នូវ​កិច្ច​ការ​ដែល​នៅសេសសល់ ដើម្បីជំរុញ ពង្រឹងភាពជាអ្នកជិតខាងល្អ និងកិច្ចសហ​ប្រតិបត្តិការ​វិស័យ​យោធា នៃកងទ័ពរវាងប្រទេសទាំង២ ក្នុងស្មារតីពង្រឹងភាពជាដៃគូសន្តិភាព វិបុល​ភាព​នៅ​តាម​តំបន់​ព្រំដែន ដើម្បីប្រែក្លាយតំបន់នោះ ទៅជាព្រំដែនសន្តិភាពយូរអង្វែង និងការអភិវឌ្ឍ៕ អត្ថបទ បាន សុខរិទ្ធិ