កំពង់ឆ្នាំង ៖ ស្រូវប្រាំងប្រមាណជាង ១ ពាន់ហិកតា ដែលស្ថិតក្នុងស្រុកជលគិរី ខេត្តកំពង់ឆ្នាំង ដែលកំពុងប្រឈមនឹងការខ្វះទឹកស្រោចស្រព ពេលនេះ ត្រូវបានជួយសង្គ្រោះតាមរយៈការចុះទៅអន្តរាគមន៍ស្ដាប្រឡាយ និងដោះស្រាយបញ្ហាចំពោះមុខ ពីក្រុមការងារចុះមូលដ្ឋានរបស់គណបក្សប្រជាជនកម្ពុជា ។ 

នាថ្ងៃទី ២២ ខែមីនា ឆ្នាំ ២០២៤ ក្រុមការងារគណបក្សប្រជាជនកម្ពុជា ចុះមូលដ្ឋានខេត្តកំពង់ឆ្នាំង ដែលដឹកនាំដោយ ឯកឧត្តមបណ្ឌិតសភាចារ្យ អ៊ុក រ៉ាប៊ុន បានចុះសួរសុខទុក្ខ និងជួយអន្តរាគមន៍បញ្ហាចំពោះមុខរបស់ប្រជាកសិករដាំដុះស្រូវប្រាំងប្រមាណជាង ១ ពាន់ហិកតា ដែលត្រូវការការជួយសង្គ្រោះ ស្ថិតនៅក្នុងភូមិសាស្រ្ត ឃុំជលសារ និងឃុំកោះថ្កូវ ស្រុកជលគិរី ដោយបានជួយស្ដារប្រឡាយ និងជួយប្រេងដើម្បីបូមទឹកស្រោចស្រពស្រែស្រូវដែលកំពុងតែប្រឈមនឹងការខ្វះខាតទឹក។ 

ក្នុងឱកាសសំណេះសំណាលជាមួយបងប្អូនប្រជាកសិករ ឯកឧត្តមបណ្ឌិតសភាចារ្យ អ៊ុក រ៉ាប៊ុន ប្រធានក្រុមការងារចុះមូលដ្ឋានខេត្តកំពង់ឆ្នាំង បានមានប្រសាសន៍ឱ្យប្រជាកសិករប្រើប្រាស់ទឹកធ្វើស្រែដោយសន្សំសំចៃ ខណៈរដូវប្រាំងនៅបន្តអូសបន្លាយក្នុងរយៈពេលវែង ដែលអាចបង្កការប៉ះពាល់ធ្ងន់ធ្ងរចំពោះដាំណាំស្រូវប្រាំងរបស់ប្រជាកសិករ។

ប្រជាកសិករក្នុងឃុំជលសារ និងឃុំកោះថ្កូវ ស្រុកជលគីរី ខេត្តកំពង់ឆ្នាំង បានមានក្ដីសប្បាយចិត្ត ព្រមទាំងថ្លែងអំណរគុណដល់ និងដឹងគុណដល់ថ្នាក់ដឹកនាំគណបក្សប្រជាជនកម្ពុជាចុះជួយខេត្តកំពង់ឆ្នាំង និងជាពិសេសតែងតែងខ្វល់ខ្វាយ ជួយដោះស្រាយទុក្ខកង្វល់ពួកគាត់ដល់មូលដ្ឋានគ្រប់កាលៈទេសៈ។ 

សូមជម្រាបជូនថា ស្រុកជលគិរី គឺជាស្រុកមួយក្នុងខេត្តកំពង់ឆ្នាំង ដែលមានភូមិសាស្រ្តអំណោយផលខ្ពស់លើវិស័យកម្ម។ ក្រៅពីការងារនេសាទនារដូវវស្សា ប្រជាកសិករ អាចធ្វើស្រែប្រាំងបានពី ២ ទៅ ៣ ដងក្នុងមួយឆ្នាំ ដែលជួយឱ្យជីវភាពគ្រួសារកាន់តែប្រសើរឡើង។ ប៉ុន្តែឆ្នាំនេះដោយសារបញ្ហាអាកាសធាតុមិនសូវអនុគ្រោះដល់ការធ្វើស្រែប្រាំង ទើបធ្វើឱ្យស្រែស្រូវប្រាំងរបស់កសិករប្រឈមនឹងបញ្ហាខ្វះទឹកស្រោចស្រព៕

​អត្ថបទ៖ កាំង ហុងវាស្នា ​