វិទ្យាស្ថានដើម្បីសិក្សាអំពីសង្គ្រាម (ISW) បាននិយាយកាលពីថ្ងៃពុធថា មេដឹកនាំរុស្ស៊ីលោក វ្ល៉ាឌីមៀពូទីន ផ្តោតលើការធ្វើឲ្យសេដ្ឋកិច្ចរុស្ស៊ីរស់ឡើងវិញ មិនមែនគ្រាន់តែជាការផ្តល់មូលនិធិសម្រាប់សង្គ្រាមទៅលើប្រទេសអ៊ុយក្រែនប៉ុណ្ណោះទេ។

វិទ្យាស្ថាន ISW បានសរសេរនៅក្នុងរបាយការណ៍ការពីថ្ងៃទី២០ ខែមីនារបស់ខ្លួនថា៖«ទិន្នន័យហិរញ្ញវត្ថុ សេដ្ឋកិច្ច និងយោធារបស់រុស្ស៊ីមួយចំនួនបង្ហាញថា    រុស្ស៊ី កំពុងរៀបចំសម្រាប់ជម្លោះទ្រង់ទ្រាយធំជាមួយអង្គការណាតូ មិនមែនក្នុងពេលឆាប់ៗនេះទេ ប៉ុន្តែទំនងជានៅលើពេលវេលាខ្លីជាងអ្វីដែលអ្នកវិភាគលោកខាងលិចមួយចំនួន បានលើកឡើងពីដំបូង»។

វិទ្យាស្ថាននេះ បានលើកឡើងពីកិច្ចប្រជុំដែលលោកពូទីន បានធ្វើឡើងជាមួយសភារបស់ប្រទេសរុស្ស៊ីកាលពីថ្ងៃអង្គារ។ កិច្ចប្រជុំនោះ បានធ្វើឡើងតែប៉ុន្មានថ្ងៃប៉ុណ្ណោះ បន្ទាប់ពីមេដឹកនាំរុស្ស៊ីរូបនេះ បានអះអាងពីជ័យជម្នះភ្លូកទឹកភ្លូកដី នៅក្នុងការបោះឆ្នោតប្រធានាធិបតីអាណត្តិទី៥របស់ខ្លួនកាលពីថ្ងៃ     អាទិត្យ។

ក្នុងជំនួបនោះ លោកពូទីន បានពិភាក្សាអំពីវិស័យមួយចំនួនដែលលោកចង់ផ្តោត ក្នុងអាណត្តិប្រធានាធិបតីទី៥របស់ខ្លួន។ អ្វីដែលសំខាន់បំផុតនោះ លោកពូទីន បានប្រាប់សមាជិកសភាគឺអំពី «ការជួយសង្គ្រោះមនុស្ស» និង «ការជួយគ្រួសាររបស់ពួកគេ»។

លោកពូទីន បាននិយាយកាលពីថ្ងៃអង្គារថា៖«ជាការពិតណាស់ អ្វីៗទាំងអស់នេះ អាចធ្វើបាន គឺតែនៅតែផ្អែកលើមូលដ្ឋាននៃការអភិវឌ្ឍសេដ្ឋកិច្ចដដែល។«នេះគឺជាបញ្ហាសំខាន់សម្រាប់ការអភិវឌ្ឍប្រទេសរបស់យើង ហើយបញ្ហាទាំងអស់នៃអធិបតេយ្យភាពបច្ចេកវិទ្យា និងការអភិវឌ្ឍសង្គម ត្រូវតែដោះស្រាយជាចាំបាច់។

លោកពូទីន ក៏បាននិយាយសំដៅឥស្សរជនដែលមានទ្រព្យសម្បត្តិច្រើនរបស់ប្រទេសនេះផងដែរ ដោយជំរុញឲ្យសមាជិកសភាមិនត្រូវគិតពី«ផលប្រយោជន៍ក្រុម ឬគណបក្ស»ទេ។