ភ្នំពេញ៖ ព្រះស្កន្ទគង់លើក្ងោក ដែលជាបុរាណវត្ថុរបស់កម្ពុជា នឹងត្រូវរដ្ឋាភិបាលអាមេរិកបញ្ជូនមកឱ្យកម្ពុជា វិញនៅពេលឆាប់ៗខាងមុខនេះ។ បើតាមសេចក្ដីប្រកាសព័ត៌មានរបស់ក្រសួងវប្បធម៌ និងវិចិត្រ សិល្បៈចេញនៅថ្ងៃទី១៦ ខែកក្កដា។
ប្រភពដដែលបានឱ្យដឹងទៀតថា ចម្លាក់ដែលកសាងឡើងនៅអំឡុងសតវត្សរ៍ទី១០ នេះ ត្រូវបានមន្ត្រី ជំនាញអាម៉េរិករឹបអូសពីពលរដ្ឋខ្លួននៅសង្កាត់ភាគខាងត្បូងនៃទីក្រុងញូវយ៉ក។
លោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចត្រសិល្បៈបានលើកឡើងនៅក្នុងសេចក្តីប្រ កាសព័ត៌មាននោះថា វត្ថុបុរាណដ៏ពិសិដ្ឋនេះ ត្រូវបានយកចេញពីប្រាសាទក្រចាប់ ដែលជាប្រាសាទមួយស្ថិតនៅក្នុងរមណីយដ្ឋានប្រាសាទកោះកេរ អតីតរាជធានីនៃអាណាចក្រខ្មែរនៅអំឡុងសតវត្សរ៍ទី១០ ក្រោយគ្រិស្តសករាជ។ ចម្លាក់ព្រះស្កន្ទគង់លើក្ងោកនេះ គឺជាគំរូនៃភាពច្នៃប្រឌិតដ៏គួរឱ្យស្ញប់ស្ញែងរបស់បុព្វបុរសខ្មែរ។ ព្រះស្កន្ទ គឺជាទេពនៃសង្គ្រាមរបស់សាសនាហិណ្ឌូ ដែលកម្រឃើញមាននៅក្នុងទម្រង់សិល្បៈចម្លាក់ខ្មែរ ប៉ុន្តែត្រូវបានបង្ហាញរូបរាងយ៉ាងលេចធ្លោនៅប្រាសាទក្រចាប់។
លោកជំទាវរដ្ឋមន្ត្រីបញ្ជាក់បន្ថែមថា ការវិលត្រលប់មកវិញនៃរូបចម្លាក់នេះ បញ្ជាក់ពីការប្តេជ្ញាចិត្តរបស់កម្ពុជាក្នុងការស្វែងរក និងនាំយកមកវិញនូវព្រលឹងរបស់បុព្វបុរសយើងដែលបានចាកចេញពីមាតុភូមិកំណើតអស់រយៈពេលជាច្រើនឆ្នាំកន្លងមកក្នុងអំឡុងសម័យសង្គ្រាម។
លោកជំទាវបន្តថា យើងខ្ញុំមានក្តីរំភើបឥតឧបមានៅពេលដែលយើងអាចទទួលបានមកវិញ នូវសម្បត្តិវប្បធម៌ដ៏មានតម្លៃជាច្រើន ដែ លត្រូវបាននាំចេញដោយខុសច្បាប់ពីប្រទេសកម្ពុជា ក្នុងនោះមានដូចជា ចម្លាក់ព្រះឥសូរ និងព្រះស្កន្ទ ដែលនឹងបញ្ជូនត្រលប់មកកម្ពុជាវិញនាពេលឆាប់ៗខាងមុខនេះ។ បដិមាអង្គនេះ ត្រូវអ្នកជំនាញជឿជា ក់ថា បានយកចេញពីកន្លែងតែមួយជាមួយនឹងចម្លាក់ព្រះស្កន្ទគង់លើក្ងោក នៅក្នុងតួប៉មកណ្តាលនៃប្រាសាទក្រចាប់។
លោកជំទាវរដ្ឋមន្ត្រី ក៏បានថ្លែងអំណរគុណចំពោះសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ដែលបានដឹកនាំប្រទេសប្រកបដោយភាពឈ្លាសវៃ និងនយោបាយឈ្នះ-ឈ្នះរបស់សម្តេច ដែលបាននាំមកនូវសន្តិភាពសម្រាប់ប្រទេសកម្ពុជា ដោយផ្ដល់ឱកាសដល់ការវិលត្រលប់មកវិញ នៃព្រលឹងបុព្វបុរសខ្មែរ ដែលបានរសាត់ចាកឆ្ងាយ ពីមាតុភូមិកំណើតអស់ជាច្រើនឆ្នាំមកហើយ នាសម័យសង្គ្រាម។ លោកជំទាវ ក៏បានថ្លែងនូវអំណរគុណយ៉ាងជ្រាលជ្រៅ និងកោតសរសើរ ដោយស្មោះដល់ការិយាល័យរដ្ឋអាជ្ញាសហរដ្ឋអាមេរិក, ការិយាល័យស៊ើបអង្កេតសន្តិសុខមាតុភូមិសហរដ្ឋអាមេរិក និងស្ថាប័នពាក់ព័ន្ធទាំងក្នុង និងក្រៅប្រទេស ជាពិសេសស្ថានទូតសហរដ្ឋអាមេរិកប្រចាំកម្ពុជា ក្រុមការងាររបស់ក្រសួង និងចំពោះឯកឧត្ដម សុខ ពុទ្ធិវុធ ដែលបានផ្តល់ការឧបត្ថម្ភគាំទ្រដល់ការធ្វើកំណាយនៅប្រាសាទក្រចាប់។
លោកជំទាវ ក៏បានថ្លែងនូវការកោតសរសើរជាពិសេសដល់លោក Bradley J. Gordon ស្ថាបនិកនៃក្រុមហ៊ុន Edenbridge Asia និងលោក Steve Heimberg មកពីក្រុមហ៊ុន Helmberg Barr LLP ដែលលោកទាំងពីរបានចំណាយពេលវេលាដ៏មានតម្លៃអស់រយៈពេលជាច្រើនឆ្នាំ សហការជាមួយមន្ត្រីរបស់យើង ក្នុងកិច្ចចរចានាំយកសម្បត្តិវប្បធម៌ខ្មែរត្រលប់មកវិញ និងបានសហការយ៉ាងជិតស្និទ្ធជាមួយក្រុមការងារកម្ពុជា រហូតរកឃើញនូវរតនសម្បត្តិខ្មែរជាច្រើន និងកំណត់បាននូវទីតាំងដើមនៃចម្លាក់ព្រះឥសូរ និងចម្លាក់ព្រះស្កន្ទគង់លើក្ងោក នៅក្នុងប្រាសាទក្រចាប់នេះ។
លោកជំទាវរដ្ឋមន្ត្រីបន្ថែមថា យើងពិតជាមានមោទនភាពចំពោះកិច្ចសហការរវាងរដ្ឋាភិបាលនៃប្រទេ សយើងទាំងពីរ ក្នុងការចូលរួមការពារបេតិកភណ្ឌវប្បធម៌ខ្មែរ ដើម្បីជាឧត្តមប្រយោជន៍សម្រាប់មនុស្ស ជាតិទូទៅ ជាពិសេសដល់កូនខ្មែរជំនាន់ក្រោយ ដែលពួកគេនឹងមានឱកាសក្នុងការសិក្សាស្វែងយល់អំ ពីគុណតម្លៃនៃរតនសម្បត្តិទាំងនេះ ដែលជាអត្តសញ្ញាណវប្បធម៌ដ៏ខ្ពង់ខ្ពស់របស់ជាតិ និងបុព្វបុរសខ្លួន៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
