ភ្នំពេញ ៖ ក្រសួងអប់រំ យុវជន និងកីឡា រួមទាំងស្ថានទូតបារាំងប្រចាំកម្ពុជា នៅថ្ងៃទី២២ ខែមីនានេះ បានប្រារព្ធទិវាអន្តរជាតិហ្វ្រង់កូហ្វូនី ដើម្បីបង្ហាញពីតួនាទីដ៏សំខាន់នៃភាសាបារាំងនៅកម្ពុជា។ 

​ទិវានេះមានការចូលរួមដោយផ្ទាល់ពី ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និងឯកឧត្តម JACQUES Pellet ឯកអគ្គរដ្ឋទូតបារាំងប្រចាំព្រះរាជាណាចក្រកម្ពុជា។ លើសពីនេះ ក៏មានការចូលរួមពី ទីភ្នាក់ងារឧត្ដមសិក្សានៃក្រុម ប្រទេសនិយាយភាសាបារាំង (AUF) និងអង្គការអន្តរជាតិហ្វ្រង់កូហ្វូនី (OIF) និងមានការចូលរួម ពីភ្ញៀវជាតិ និងអន្តរជាតិ ថ្នាក់ដឹកនាំ អង្គទូត មន្ត្រីរាជការ គ្រូបង្រៀន និស្សិត និងសិស្សានុសិស្ស ផងដែរ។

ឯកឧត្តម ឧបនាយករដ្ឋមន្ត្រី ហង់ជួន ណារ៉ុន បានលើកឡើង ពីគុណតម្លៃនៃភាសាបារាំង ដែលផ្សារភ្ជាប់ជាមួយចំណេះដឹងវប្បធម៌ដ៏សម្បូរណ៍បែប នាំមកនូវគំនិតច្នៃប្រឌិតការបង្កើតថ្មីដល់សិស្សនិស្សិតកម្ពុជា។ ពិសេសគឺចូលរួមលើកកម្ពស់នវានុវត្តន៍ និងសហគ្រិនភាពសម្រាប់យុវជន តាមរយៈការប្រើប្រាស់ភាសាបារាំង ក្នុងបរិបទនៃទីផ្សារការងារ ដែលកាន់តែមានភាពប្រកួតប្រជែងទាំងក្នុងប្រទេស ក្នុងតំបន់ និងអន្តរជាតិ។

ឯកឧត្ដមលើកឡើងដែរថា ការចេះភាសាបរទេសតែមួយភាសាមិនគ្រប់គ្រាន់នោះទេសម្រាប់យុគសម័យដែលពោរពេញដោយការប្រកួតប្រជែងនេះ។ ការចេះភាសាបរទេសមួយបន្ថែមទៀត នឹងនាំមកនូវឱកាសមួយបន្ថែមទៀត ក្នុងបុព្វហេតុនេះដែរ ចំពោះអ្នកសិក្សាដែលចេះភាសាបារាំងនឹងបង្កើនឱកាសចាប់យកការងារពាក់ព័ន្ធនឹងភាសាបារាំង ក៏ដូចជាទទួលបានអាហារូបករណ៍នៅបរទេស ដូចជា៖ អាហារូបករណ៍រដ្ឋាភិបាលបារាំង កម្មវិធីអាហារូបករណ៍ Eiffel អាហារូបករណ៍ ERASMUS និងកម្មវិធីអាហារូបករណ៍ហ្វ្រង់កូហ្វីនីរបស់ប្រទេសកាណាដាជាដើម។

ឆ្នាំ២០២៤នេះជាខួបលើកទី៥៤ឆ្នាំ នៃការបង្កើតអង្គការអន្តរជាតិហ្វ្រង់កូហ្វូនី បណ្ដាប្រទេសជាសមាជិកប្រារព្ធទិវានេះ ក្រោមប្រធានបទ “បង្កើតថ្មី លើកកម្ពស់នវានុវត្តន៍ និងសហគ្រិនភាព តាមរយៈភាសាបារាំង ” ។ ឆ្លើយតបនឹងប្រធានបទប្រចាំឆ្នាំ២០២៤ គ្រឹះស្ថានសិក្សា បង្រៀន និងរៀនភាសាបារាំងនានា បានចូលរួមអបអរសាទរទិវានេះ តាមរយៈការសម្ដែងទស្សនីយភាព របាំប្រពៃណី របាំប្រជាប្រិយ ចម្រៀងសម័យ ការបង្ហាញស្នាដៃបង្កើតថ្មី ការប្រកួតវោហារកោសល្យ និងការសម្ដែងរឿងខ្លី ជាភាសាបារាំង នៅវិទ្យាស្ថានបច្ចេកវិទ្យាកម្ពុជា ។

សូមជម្រាបថា អង្គការអន្តរជាតិហ្វ្រង់កូហ្វូនី ត្រូវបានបង្កើតឡើង នៅថ្ងៃទី ២០ ខែមីនា ឆ្នាំ១៩៧០ ក្រោមកិច្ចផ្ដួចផ្ដើមរបស់ស្ថាបនិកនៃអង្គការនេះ រួមមាន ឯកឧត្តម ឡេអូប៉ូល សេដាសង់ហ្គ័រ អតីតប្រធានាធិបតី នៃប្រទេសសេណេហ្គាល់ ឯកឧត្តម អាប៊ីប បួហ្គីបា អតីតប្រធានាធិបតីនៃប្រទេសទុយនីស៊ី ឯកឧត្តម អាមានី ឌីយ៉ូរី អតីតប្រធានាធិបតីនៃប្រទេសនីហ្សេ និងព្រះបរមរតនកោដ្ឋ ព្រះបាទនរោត្តម សីហនុ។ នៅក្នុងឆ្នាំ១៩៩១ ប្រទេសកម្ពុជាបានចូលជាសមាជិកនៃអង្គការអន្តរជាតិនេះ៕

អត្ថបទ៖ គឹមហុក