ក្រុមអ្នកជួយសង្គ្រោះឥណ្ឌូណេស៊ី នៅថ្ងៃសុក្រ (ទី ២២ ខែមីនា) នេះ បាននិយាយថា ពួកគេបានបញ្ចប់ការស្វែងរកជនភៀសខ្លួនរ៉ូហ៊ីងយ៉ាបន្ថែមទៀតដែលបាត់ខ្លួននៅសមុទ្រ បន្ទាប់ពីទូករបស់ពួកគេបានក្រឡាប់លិច បើទោះបីជាមានរបាយការណ៍ពីអ្នកនៅមានជីវិតមួយចំនួន ក្នុងចំណោមមនុស្ស ៧៥ នាក់ថា មនុស្សរាប់សិបនាក់ផ្សេងទៀតត្រូវបានទឹកហូរនាំទៅក៏ដោយ។

មន្ត្រីមកពីទីភ្នាក់ងារស្វែងរក និងជួយសង្គ្រោះក្នុងតំបន់ ប្រចាំខេត្ត Aceh លោក Muhammad Fathur Rachman បានឲ្យដឹងតាមរយៈអ្នកនាំពាក្យថា៖ «ការស្វែងរកបានបញ្ចប់ហើយកាលពីថ្ងៃព្រហស្បតិ៍។ ជនភៀសខ្លួនរ៉ូហ៊ីងយ៉ាទាំងអស់នៅលើទូកកាលពីម្សិលមិញ ត្រូវបានជួយសង្គ្រោះ»។ លោកបានបញ្ជាក់បន្ថែមថា ការស្វែងរកបានបញ្ចប់ដោយសារមិនមានបញ្ជីឈ្មោះអ្នកដំណើរ។

គួរបញ្ជាក់ថា ជនភៀសខ្លួនប្រហែល ១៥០នាក់ ត្រូវបានគេប្រាប់ថា បាននៅលើទូកនោះ ហើយ ៦៩នាក់ត្រូវបានគេរកឃើញរសាត់តាមទឹកនៅសមុទ្ររបស់ខេត្ត Aceh កាលពីថ្ងៃព្រហស្បតិ៍ នៅក្នុងកិច្ចប្រឹងប្រែងជួយសង្គ្រោះយ៉ាងខ្លាំងក្លា បន្ទាប់ពីជនរងគ្រោះទាំងនោះបានចំណាយពេលជាង ១ថ្ងៃ ឈរនៅលើតួទូកដែលលិចនោះ។ ជាមួយគ្នានេះ មានមនុស្ស ៦នាក់ផ្សេងទៀតត្រូវបានជួយសង្គ្រោះ ដោយអ្នកនេសាទនីនៅមួយថ្ងៃមុននេះ។

លោក Rachman បាននិយាយថា៖ «មិនមានព័ត៌មានបន្ថែមដែលយើងបានទទួលអំពីអ្នកបាត់ខ្លួនទេ ហើយមិនមានការបង្ហាញបញ្ជីអំពីទូកនោះទេ។ ការវិភាគរបស់យើង គឺទូកនេះមិនអាចផ្ទុកមនុស្ស ១៥០ នាក់បានទេ»។

ប៉ុន្តែការរៀបរាប់ពីអ្នកនៅរស់រានមានជីវិតមុននេះ បានបង្ហាញថា មនុស្សជាច្រើននាក់ទៀតត្រូវបានទឹកហូរនាំទៅ។ នេះបើយោងតាមអ្នកនេសាទ និងមន្ត្រីក្នុងតំបន់៕