រដ្ឋមន្ត្រីពាណិជ្ជកម្មបរទេស និងអភិវឌ្ឍន៍របស់ប្រទេសហ្វាំងឡង់ នៅថ្ងៃសុក្រ (ទី២២ ខែមីនា) នេះ បានឲ្យដឹងថា ហ្វាំងឡង់នឹងចាប់ផ្ដើមឡើងវិញ ក្នុងការផ្តល់មូលនិធិដល់ទីភ្នាក់ងារជំនួយ និងការងាររបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីន នៅតំបន់ជិតបូព៌ា (UNRWA)។

គួរបញ្ជាក់ថា ប្រទេសជាច្រើន ក្នុងនោះរួមទាំងសហរដ្ឋអាមេរិក និងអង់គ្លេសផងដែរ បានផ្អាកការផ្តល់មូលនិធិរបស់ពួកគេដល់ UNRWA បន្ទាប់ពីមានការចោទប្រកាន់ពីអ៊ីស្រាអែលដែលថា បុគ្គលិក ១៣.០០០នាក់របស់ទីភ្នាក់ងារនេះ នៅក្នុងតំបន់ហ្កាហ្សា បានមានចំណែករួមក្នុងការវាយប្រហាររបស់ពួកហាម៉ាស កាលពីថ្ងៃទី៧ ខែតុលា នៅក្នុងប្រទេសអ៊ីស្រាអែល។

រដ្ឋមន្ត្រីពាណិជ្ជកម្មបរទេស និងអភិវឌ្ឍន៍ហ្វាំងឡង់ លោក Ville Tavio បានប្រាប់ថា៖ «UNRWA ធ្វើឲ្យការគ្រប់គ្រងហានិភ័យរបស់ខ្លួនប្រសើរឡើង ដែលមានន័យថា ការការពារ និងគំនិតផ្តួចផ្តើមឲ្យមានការត្រួតពិនិត្យយ៉ាងម៉ត់ចត់ ចំពោះការប្រព្រឹត្តិមិនត្រឹមត្រូវ ផ្តល់នូវការធានាគ្រប់គ្រាន់ នៅដំណាក់កាលនេះ ដើម្បីឲ្យពួកយើងផ្ដល់ការគាំទ្ររបស់យើងបន្តទៀត»។

លោកបានប្រាប់សន្និសីទសារព័ត៌មានថា ថវិការបស់ហ្វាំងឡង់មួយចំនួននឹងត្រូវបានទុកដោយឡែកសម្រាប់ការគ្រប់គ្រងហានិភ័យ។ បណ្តាប្រទេស ដែលរួមមានទាំងកាណាដា អូស្ត្រាលី និងស៊ុយអែតផងដែរ ក៏បានស្ដារការផ្តល់មូលនិធិដល់ UNRWA ឡើងវិញ ខណៈដែលប្រទេសឈូងសមុទ្រមួយចំនួន ដូចជាអារ៉ាប៊ីសាអ៊ូឌីតជាដើម បានបង្កើនមូលនិធិបន្ថែម៕