មន្រ្តីជាន់ខ្ពស់មួយរូបនៃការិយាលប្រធានាធិបតីអ៊ុយក្រែនលោក Oleksiy Kuleba និយាយនៅថ្ងៃសុក្រនេះថា អ្នកប្រើប្រាស់ថាមពលជាង ១លាននាក់នៅទូទាំងអ៊ុយក្រែន គ្មានអគ្គិសនីប្រើប្រាស់នោះទេ ក្រោយការវាយប្រហារតាមច្រកអាកាសកាលពីយប់កន្លងទៅរបស់រុស្ស៊ី លើទីតាំងថាមពល ។

លោក Kuleba និយាយថា ការវាយប្រហារនេះ បានធ្វើឲ្យប៉ះពាល់ដល់ពលរដ្ឋជាង ៧០ម៉ឺននាក់នៅតំបន់ភាគខាងកើត Kharkiv ពលរដ្ឋយ៉ាងហោច ២០ម៉ឺននាក់ នៅតំបន់ភាគខាងត្បូង Odesa និងតំបន់ភាគអាគ្នេយ៍ Dnipropetrovsk និងពលរដ្ឋ ១១ម៉ឺននាក់ទៀត នៅតំបន់ភាគកណ្តាល Poltava ។

ស្របពេលនោះដែរ អគ្គិសភ័យបានឆាបឆេះទំនប់ទឹកដ៏ធំបំផុតរបស់អ៊ុយក្រែន Dnipro HES នៅតំបន់ហ្សា Zaporizhzhiaក្រោយរងការវាយប្រហាររបស់រុស្ស៊ី ប៉ុន្តែមិនមានហានិភ័យនោះទេ ខណៈដែលហេដ្ឋារចនាសម្ព័ន្ធថាមពលនៅក្នុងតំបន់ផ្សេងទៀត រងការវាយប្រហារ ។ 

ក្រុមហ៊ុន Ukrhydroenerho ដែលគ្រប់គ្រងបណ្តាញទំនប់ទឹកអ៊ុយក្រែន បាននិយាយថា បច្ចុប្បន្នមានអគ្គិភ័យនៅស្ថានីយវារីអគ្គិសនីនេះ ។ 

សេវាកម្មសង្គ្រោះបន្ទាន់ និងបុគ្គលិកថាមពល កំពុងធ្វើការនៅនឹងកន្លែង ដោយដោះស្រាយផលវិបាកនៃការវាយប្រហារតាមអាកាសជាច្រើនរបស់រុស្ស៊ី ។ 

ដោយឡែក រដ្ឋមន្ត្រីថាមពលអ៊ុយក្រែន លោក Herman Halushchenko បាននិយាយថា វាគឺជាការវាយប្រហារដ៏ធំបំផុតលើហេដ្ឋារចនាសម្ព័ន្ធថាមពលរបស់ប្រទេសអ៊ុយក្រែន នាពេលថ្មីៗនេះ ៕