ភ្នំពេញ៖ ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បានបង្កើតក្រុមការងារមួយសម្រាប់សិក្សាលើការចាក់វ៉ាក់សាំងបង្ការជំងឺកូវីដ-១៩ នេះបើតាមសេចក្ដីសម្រេចរបស់រាជរដ្ឋាភិបាលចេញនៅថ្ងៃនេះ។
ក្នុងសេចក្ដីសម្រេចនោះ សម្ដេចតេជោ ហ៊ុន សែន បានចាត់តាំងលោកជំទាវ ឱ វណ្ណឌីន រដ្ឋលេខាធិការក្រសួងសុខាភិបាល ឱ្យធ្វើជាប្រធាននៃក្រុមប្រឹក្សានាយករបស់ក្រុមការងារដឹកនាំ និងប្រតិបត្តិលើការសិក្សាការចាក់វ៉ាក់សាំងកូវីដ-១៩នេះ និងមានលោកជំទាវបណ្ឌិត ពេជ ចន្ទមុន្នី ជាអនុប្រធានផងដែរ។
សម្រាប់ក្រុមប្រតិបត្តិលើការសិក្សាការចាក់វ៉ាក់សាំងកូវីដ-១៩ មានសមាសភាព ៧រូប ដែលដឹកនាំដោយលោកបណ្ឌិត លាង ឫទ្ធា ប្រធានកម្មវិធីជាតិប្រយុទ្ធនឹងជំងឺគ្រុនឈាម និងមានលោកសាស្ត្រាចារ្យរង អ៊ា ប៉ នាយករងវិទ្យាស្ថានជាតិសុខភាពសាធារណៈ ជាអនុប្រធានផងដែរ។
ក្នុងសេចក្ដីសម្រេចដដែលនេះ រាជរដ្ឋាភិបាលបានចាត់តាំងក្រុមការងារទើបបង្កើតឡើងថ្មីនេះ ឱ្យសិក្សាវាយតម្លៃទាក់ទងនឹងការចាក់វ៉ាក់សាំងកូវីដ-១៩ វិភាគ រៀបចំរបាយការណ៍សិក្សា និងផ្ដល់ប្រឹក្សាយោបល់លើការសិក្សាទាក់ទងនឹងការចាក់វ៉ាក់សាំងកូវីដ-១៩នេះ។
ក្រុមការងារសិក្សាពីការចាក់វ៉ាក់សាំងកូវីដ-១៩ ត្រូវបានរៀបចំឡើងនេះ ចំពេលដែលកម្ពុជាកំពុងដំណើរការយុទ្ធនាការចាក់វ៉ាក់សាំងជូនប្រជាពលរដ្ឋទូទាំងប្រទេស។
គិតត្រឹមថ្ងៃនេះ កម្ពុជាបានចាក់វ៉ាក់សាំងជូនប្រជាពលរដ្ឋបានជាង ៥លាន ៦សែននាក់រួចហើយ ក្នុងនោះពលរដ្ឋជាង ៤លាន ៧ម៉ឺននាក់ បានទទួលវ៉ាក់សាំងទាំងពីរដូសរួចរាល់ គិតចាប់តាំងពីពេលកម្ពុជាចាប់ផ្ដើមយុទ្ធនាការនេះកាលពីថ្ងៃទី១០ ខែកុម្ភៈ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
