បណ្ដាគណបក្សប្រឆាំងរបស់ឥណ្ឌាបានថ្កោលទោសរដ្ឋាភិបាលរបស់នាយករដ្ឋមន្ត្រីលោក Narendra Modi ចំពោះការចាប់ខ្លួនមេដឹកនាំដ៏សំខាន់មួយរូប ដែលមានរយៈពេលត្រឹមតែប៉ុន្មានសប្តាហ៍មុនពេលប្រទេសឥណ្ឌារៀបចំការបោះឆ្នោតសកល ដោយនិយាយថា វិធានការនេះ គឺជា «ការប្រើប្រាស់ភ្នាក់ងារកណ្តាលដោយមិនត្រឹមត្រូវដើម្បីសងសឹក និងជាការប៉ុនប៉ងរារាំងពួកគេ។

រដ្ឋមន្ត្រីប្រចាំរដ្ឋធានីជាតិ Delhi គឺលោក Arvind Kejriwal ត្រូវបានចាប់ខ្លួនដោយនាយកដ្ឋានអនុវត្តច្បាប់ (ED) កាលពីថ្ងៃព្រហស្បតិ៍ (ទី២១ ខែមីនា)។ រូបលោកត្រូវបានសាកសួរអស់រយៈពេលជាង ២ម៉ោង។ នេះបើយោងតាមបុគ្គលដឹងពីបញ្ហានេះ ដែលនិយាយក្នុងលក្ខខណ្ឌមិនបញ្ចេញឈ្មោះ ដោយសារព័ត៌មាននេះមិនទាន់ចេញជាសាធារណៈ។ រដ្ឋធានីជាតិ Delhi ត្រូវបានគ្រប់គ្រងដោយគណបក្ស Aam Aadmi (AAP) របស់លោក Kejriwal តាមប្រព័ន្ធរដ្ឋាភិបាលសហព័ន្ធរបស់ប្រទេសឥណ្ឌា។

លោក Kejriwal វ័យ ៥៥ឆ្នាំ គឺជាសមាជិកសំខាន់នៃសម្ព័ន្ធភាពប្រឆាំង ដែលកំពុងទប់ទល់នឹងការប៉ុនប៉ងរបស់លោក Modi ក្នុងការស្វែងរកអាណត្តិទី៣ ជាប់ៗគ្នា នៅក្នុងការបោះឆ្នោតទូទាំងប្រទេស ដែលត្រូវចាប់ផ្តើមនៅខែមេសា។ ចំណែកលោក Modi វ័យ ៧៣ឆ្នាំ នៅតែជាមេដឹកនាំដ៏មានប្រជាប្រិយភាព ក្នុងចំណោមអ្នកបោះឆ្នោត ហើយគណបក្ស Bharatiya Janata (BJP) របស់លោក គឺស្ថិតនៅក្នុងជំហររឹងមាំ ក្នុងការបានត្រឡប់ទៅកាន់អំណាចវិញ។

សម្ព័ន្ធភាពប្រឆាំងដែលត្រូវបានបង្កើតឡើងក្នុងឆ្នាំ២០២៣ ដើម្បីបង្កើនការការពាររួមគ្នាឲ្យកាន់តែរឹងមាំប្រឆាំងនឹងលោក Modi ត្រូវបានរំខានដោយការទប់ស្កាត់ ការស៊ើបអង្កេតរបស់រដ្ឋាភិបាល និងវិបត្តិសាច់ប្រាក់។ ក្រុមនេះបានចោទប្រកាន់ថា វិធានការរបស់ទីភ្នាក់ងារសហព័ន្ធប្រឆាំងនឹងលោក Kejriwal គឺជាផ្នែកនៃយុទ្ធនាការដែលកំពុងបន្តមាន ដើម្បីបង្កាច់បង្ខូច និងធ្វើឲ្យសម្ព័ន្ធនេះចុះខ្សោយ មុនការបោះឆ្នោត។

តែយ៉ាងណាក្ដី គណបក្ស BJP បានបដិសេធរាល់ការលើកឡើងដែលថា ខ្លួនកំពុងកំណត់គោលដៅលើមេដឹកនាំបក្សប្រឆាំងដោយចេតនា និងបានការពារសកម្មភាពរបស់រដ្ឋាភិបាលថា ជាការចាំបាច់ដើម្បីលុបបំបាត់អំពើពុករលួយដែលកំពុងរីករាលដាល៕