ភ្នំពេញ÷ រាជរដ្ឋាភិបាលបានយកចិត្តទុកដាក់ និងបង្ហាញនូវការប្តេជ្ញាចិត្តខ្ពស់ ក្នុងការលើកកម្ពស់សមភាពយេនឌ័រ និងបង្កើនភាពអង់អាចដល់ស្រ្តីនិងក្មេងស្រីគ្រប់រូប ជាពិសេសការបន្តលើកកម្ពស់សិទ្ធិ និងតួនាទីស្រ្តីនៅក្នុងសង្គមពីគ្រប់មជ្ឈមដ្ឋាន ប្រកប ដោយបរិយាបន្ន និងសមធម៌។

លោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្រ្តី ក្រសួងកិច្ចការនារី លើកឡើងនៅក្នុងពិធីសំណេះសំណាលជាមួយស្រ្តីបម្រើការងារក្នុងសេដ្ឋកិច្ចក្រៅប្រព័ន្ធ (សេវាកំសាន្ត)ក្នុងឱកាសអបអរសាទរទិវាអន្តរជាតិនារី ៨មីនា ឆ្នាំ២០២៤ ខួបទី១១៣

ថ្ងៃទី ២២ ខែ មីនា ឆ្នាំ២០២៤ ថា រាជរដ្ឋាភិបាលកម្ពុជានីតីកាលទី៧ នៃរដ្ឋសភា ក្រោមការដឹកនាំប្រកបដោយគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា បានបន្តកំណត់លើការលើកកម្ពស់សមភាពយេនឌ័រ និងការបង្កើនភាពអង់អាចរបស់ស្រ្តី និងក្មេងស្រីនៅគ្រប់វិស័យជាអាទិភាព ក្នុងរបៀបវារៈគោលនយោបាយ និងយុទ្ធសាស្រ្តបញ្ចកោណ-ដំណាក់កាលទី១ តាមរយៈការពង្រឹងភាពជាពលរដ្ឋ ក្នុងសង្គមដែលមានអារ្យធម៌ខ្ពស់ ប្រកប ដោយសីលធម៌ សមធម៌ និងបរិយាបន្ន ដែលក្នុងនោះស្រ្តីគឺជាស្នូល។

ជាក់ស្តែងថ្មីៗនេះ, រាជរដ្ឋាភិបាលបានដាក់ចេញឱ្យអនុវត្តយុទ្ធសាស្រ្តជាតិ ស្តីពីការអភិវឌ្ឍសេដ្ឋកិច្ចក្រៅប្រព័ន្ធ (២០២៣-២០២៨) ដើម្បីអភិវឌ្ឍសេដ្ឋកិច្ចក្រៅប្រព័ន្ធឱ្យរីកធំធាត់ និងមានលទ្ធភាពឈានចូលក្នុងប្រព័ន្ធហើយក្លាយទៅជាកម្លាំងចលករដ៏សំខាន់ ក្នុងការកែលម្អជីវភាពប្រជាជន និងអាចរួមចំណែកជាអតិបរមា ក្នុងការឈានទៅសម្រេចបាននូវការអភិវឌ្ឍប្រកប ដោយចីរភាព បរិយាបន្ន ភាពរឹងមាំ និងភាពធន់ទៅនឹងវិបត្តិ។

លោកជំទាវកិត្តិបណ្ឌិត ថ្លែងលើកឡើងបន្តថា ជាក់ស្តែងការជួបជុំគ្នា, ក្រោមអធិបតីភាពដ៏ខ្ពង់ខ្ពស់របស់សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ ជាសក្ខីភាពបន្ថែមទៀត ដែលបង្ហាញនូវការយកចិត្តទុករបស់ថ្នាក់ដឹកនាំនិងរាជរដ្ឋាភិបាល ព្រមទាំងការទទួលស្គាល់នូវតួនាទីដ៏សំខាន់របស់បងប្អូនស្រ្តីនៅក្នុងសង្គម ហើយក៏ក្លាយជាព្រឹត្តិការ ណ៍មួយដ៏សំខាន់ ក្នុងការបង្ហាញអំពីការប្តេជ្ញាចិត្តរបស់ថ្នាក់ដឹកនាំ និងរាជរដ្ឋាភិបាល ក្នុងការបន្តលើកកម្ពស់សិទ្ធិ និងតួនាទីស្រ្តី នៅក្នុងសង្គមពីគ្រប់មជ្ឈមដ្ឋាន ប្រកបដោយបរិយាបន្ន និងសមធម៌។

សូមបញ្ជាក់ថា នៅក្នុងអំឡុងយុទ្ធនាការឆ្នាំ ២០២៤, ចាប់ពីថ្ងៃទី ១ ដល់ថ្ងៃទី ២២ ខែ មីនា នៅតាមបណ្តាក្រសួង-ស្ថាប័ន រាជធានី-ខេត្ត ក្រុង-ស្រុក-ខណ្ឌ និងគ្រឹះស្ថានសិក្សានានា រួមទាំងវិស័យឯកជន បានរៀបចំប្រារព្ធទិវាអន្តរជាតិនារី ៨មីនា នៅតាមអង្គភាព និងដែនសមត្ថកិច្ចរបស់ខ្លួននីមួយៗយ៉ាងអធិកអធម។ ក្នុងនោះដៃគូអភិវឌ្ឍន៍និងវិស័យឯកជនចំនួន ២២ បានចូលរួមសហការនៅក្នុងយុទ្ធនាការ។ តាមរយៈយុទ្ធនាការឌីជីថល និងតាមប្រព័ន្ធផ្សព្វផ្សាយបណ្តាញសង្គម, មហាជនអ្នកចូលទស្សនាសរុបប្រមាណជិត ៨០០ពាន់ផងដែរ៕

អត្ថបទ៖ សុន រ៉ាឌី