ឯកឧត្ដមបណ្ឌិត អ៊ាង សុផល្លែត រដ្ឋមន្ដ្រីក្រសួងបរិស្ថាន នៅក្នុងដំណើរ​ទស្សនកិច្ច​នៅ​ក្នុង​ខេត្ត​មណ្ឌល​គីរី នាថ្ងៃទី២១ ខែមីនា ឆ្នាំ២០២៣ បាន​ចូលរួមអបអរសាទរទិវាព្រៃឈើអន្ដរជាតិ ២១ មីនា ដោយបញ្ជាក់ពីគោលជំហរ របស់រាជរដ្ឋាភិបាលអាណត្តិទី៧ នៃរដ្ឋសភា ក្នុងការជំរុញ​ភាព​បៃតង​របស់​កម្ពុជា ដែលក្នុងនោះក្រសួងបរិស្ថាន បានរៀបចំបណ្តុះកូនឈើរួចហើយ សម្រាប់​យុទ្ធនាការ​ចែក​កូនឈើជាង ១លានដើម ជូនប្រជាពលរដ្ឋដោយឥតគិតថ្លៃ ដើម្បីដាំស្តារព្រៃ ដាំ​នៅ​តា​មគេហដ្ឋាន និងតាមមូលដ្ឋាន ចាប់ពីដើមរដូវវស្សា ឆ្នាំ២០២៤ តទៅ។

ឯកឧត្តមបណ្ឌិត អ៊ាង សុផល្លែត បានថ្លែងថា យុទ្ធសាស្រ្តភាពបៃតងរបស់កម្ពុជា រៀបចំ​ឡើង​ស្រប​តាម​យុទ្ធសាស្រ្ដចក្រាវិស័យបរិស្ថាន ដែលបានដាក់ចេញ​អនុលោម​តាម​យុទ្ធ​សាស្រ្ដ​បញ្ចកោណ ដំណាក់កាលទី១ នៃរាជរដ្ឋាភិបាល នីតិកាលទី៧ ក្រោមការដឹកនាំដ៏ឈ្លាសវៃ របស់​សម្ដេច​មហាវបរធិបតី ហ៊ុន ម៉ាណែត នាយករដ្ឋមន្ដ្រីនៃព្រះរាជាណាចក្រកម្ពុជា ដើម្បី​ឈាន​ឆ្ពោះ​ទៅ សម្រេចទស្សនវិស័យ បង្កើនគម្របព្រៃចំនួន ៦០% នាឆ្នាំ២០៥០។

ថ្ងៃទី២១ ខែមីនា ជាថ្ងៃដែលពិភពលោកប្រារព្ធទិវាព្រៃឈើអន្តរជាតិជារៀងរាល់ឆ្នាំ។ ឯកឧត្ដម​បណ្ឌិត អ៊ាង សុផល្លែត បានអញ្ជើញទស្សនកិច្ច នៅថ្នាលបណ្ដុះកូនឈើ នៅក្នុង​ដែន​ជម្រក​សត្វ​ព្រៃ​កែវ​សីមា ស្ថិតក្នុងភូមិសាស្រ្តស្រុកកែវសីមា ខេត្ដមណ្ឌលគីរី ដែលបានរៀបចំឡើង ក្នុង​ទិស​ដៅ​ជំរុញ​យុទ្ធនាការភាពបៃតងរបស់កម្ពុជា ដែលបានដាក់ចេញកាលពីថ្ងៃទី១០ ខែតុលា ឆ្នាំ​២០២៣ ដោយបានចូលរួមចំណែកបណ្តុះកូនឈើ ដើម្បីចែកជូនដោយឥតគិតថ្លៃ យ៉ាង​តិ​ច​១​លាន​ដើម ដល់ប្រជាពលរដ្ឋដាំ ក្នុងមួយឆ្នាំ គិតចាប់ពីដើមរដូវវស្សា ឆ្នាំ២០២៤តទៅ។

សូមបញ្ជាក់ថា ក្រសួងបរិស្ថានគ្រោងរៀបចំទិវាភាពបៃតងរបស់កម្ពុជា រយៈពេល៣យប់៣ថ្ងៃ នា​ដើម​ខែ​កក្កដា ឆ្នាំ២០២៤ នៅរាជធានីភ្នំពេញ ដើម្បីចែកកូនឈើយ៉ាងតិច ចំនួន១លានដើម ជូន​ប្រជា​ពលរដ្ឋដោយឥតគិតថ្លៃ យកទៅដាំតាមកន្លែងផ្សេងៗ។

ជាមួយគ្នានេះ គិតត្រឹមថ្ងៃទី ២០ ខែមីនា ឆ្នាំ២០២៤ នេះ មន្ទីរបរិស្ថានរាជធានី-ខេត្ដ បាន​បណ្ដុះ​កូន​ឈើ​បាន​ចំនួន សរុប ១,១៤៤,៥៤៧ ដើម (មួយលានដប​បួន​ម៉ឺន​បួន​ពាន់​ប្រាំ​រយ​សែ​សិប​ប្រាំ​ពីរ​ដើម​) ក្នុងនោះ ឯកឧត្ដមបណ្ឌិតរដ្ឋមន្ដ្រី បានដឹកនាំបណ្ដុះដោយផ្ទាល់មានចំនួន ៣៧០,០០០ ដើម។ កន្លងមកនេះ មន្ទីរបរិស្ថានរាជធានី ខេត្ដ បានប្រគល់ និងចែក​កូន​ឈើ​ជូន​ប្រជា​ពលរដ្ឋ​ជា​បណ្តើរ​ៗ បានចំនួន ២០៥,៦៧៨ដើម ជូនដល់ប្រជាសហគមន៍ សាលារៀន ដាំស្តារព្រៃលិចទឹក និង​នៅ​កន្លែងផ្សេងៗទៀត៕