ឯកឧត្ដមបណ្ឌិត ហេង សុខគង់ រដ្ឋលេខាធិការ និងជាអ្នកនាំពាក្យ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានបញ្ជាក់ តាមរយៈទិវាជាតិវិទ្យាសាស្រ្តបច្ចេកវិទ្យា និង​នវានុវត្តន៍ ក្នុងឆ្នាំនេះនឹង ជួយដល់វិស័យ SME នៅកម្ពុជាឱ្យកាន់តែមានភាពរឹងមាំ មានភាពធន់ និង​ល្អ​ប្រសើរនៅក្នុងការប្រកួតប្រជែងទាំងនៅក្នុងតំបន់ និងពិភពលោក។

តាមរយៈកិច្ចសម្ភាសន៍ជាមួយទូរទស្សន៍ BTV ឯកឧត្ដមបណ្ឌិត ហេង សុខគង់ មានប្រសាសន៍ថា ទិវាជា​តិវិទ្យាសាស្រ្តបច្ចេកវិទ្យា និងនវានុវត្តន៍លើកទី២ឆ្នាំនេះប្រព្រឹត្តទៅចាប់ពីថ្ងៃទី២៤ ដល់ថ្ងៃទី ២៦ ខែមីនា នេះ ក្រោមប្រធានបទ «សហគ្រាសធនតូច និងមធ្យមឆ្ពោះទៅវិទ្យាសាស្រ្ដ បច្ចេក​វិទ្យា និងនវានុវត្តន៍» (SMEs Go Science, Technology & Innovation)។

ឯកឧត្តមបន្តថា ក្រសួងរំពឹងថា «ទិវាជាតិវិទ្យាសាស្រ្តបច្ចេកវិទ្យា និងនវានុវត្តន៍ លើកទី២ ឆ្នាំ២០២៤» នេះ នឹងមានអ្នកចូលរួមប្រមាណ ២ លាននាក់ ខណៈ​ឆ្នាំ​នេះ​ក្រសួង​នឹង​រៀបចំ​ការ​តាំង​បង្ហាញ​ផលិតផលបច្ចេកវិទ្យាថ្មីៗជាច្រើនពីបណ្ដាដៃគូសហការជាតិ-អន្តរជាតិ ដែលមាន​អ្នក​វិទ្យា​សាស្ត្រ អ្នកស្រាវជ្រាវ អ្នកច្នៃប្រឌិត និងសហគ្រិនជាដើម។

បើតាមឯកឧត្ដមបណ្ឌិត ហេង សុខគង់ តាមរយៈទិវាជាតិវិទ្យាសាស្រ្តបច្ចេកវិទ្យា និងនវានុវត្តន៍ ក្នុង​ឆ្នាំ​នេះនឹងជួយដល់វិស័យ SME នៅកម្ពុជាឱ្យកាន់តែមានភាពរឹងម៉ាំ មានភាពធន់ និងល្អ​ប្រសើរ​នៅ​ក្នុងការប្រកួតប្រជែងទាំងនៅក្នុងតំបន់ និងពិភពលោក។ ឯកឧត្ដមបន្តថា បច្ចុប្បន្ន​វិស័យ វិទ្យាសាស្រ្ដ បច្ចេកវិទ្យា និងនវានុវត្តន៍​កំពុង​តែ​ដើរតួនាទី​សំខាន់​នៅ​ក្នុង​សករាជ​ឧស្សា​ហកម្ម​ជំនាន់ទី៤ ជាពិសេសការជួយជំរុញលើចង្វាក់ផលិតកម្មសហគ្រាសធនតូច និងមធ្យម ខណៈ​ប្រទេសកម្ពុជាបានធ្វើសមាហរណកម្មទាំងក្នុងតំបន់ និងពិភពលោក។

សូមជម្រាបថា ទិវាជាតិវិទ្យាសាស្រ្តបច្ចេកវិទ្យា និង​នវានុវត្តន៍​ឆ្នាំ​នេះ​ក៏​មាន​ការ​ដាក់​តាំង​ពិព័រណ៍​ផ្ដោត​សំខាន់ទៅលើគ្រឿងបង្គុំកម្មន្តសាល ដែលក្នុងនោះនឹងមានរោងចក្រ សហគ្រាស​ជា​ច្រើន​នឹង​មក​ដាក់តាំងបង្ហាញពីគ្រឿងបង្គុំ គ្រឿងចក្រ គ្រឿងម៉ាស៊ីន​ផ្សេង​ៗ​ដែល​ពួក​គេ​ផលិត​បាន​ផងដែរ​៕ អត្ថបទ៖វ៉ន ដារ៉ា