មនុស្សរាប់រយនាក់បានតម្រង់ជួរនៅជិតមណ្ឌលផ្ដល់ឈាម ក្នុងក្រុងមូស្គូ កាលពីព្រឹកថ្ងៃសៅរ៍ ដើម្បីជួយអ្នករបួសនៅក្នុងអំពើបាញ់ប្រហាដោយកម្រោលចូលមួយនៅឯសាលប្រគុំដន្រ្ដីមួយក្នុងតំបន់​ក្រុងមូស្គូកាលពីយប់ថ្ងៃសុក្រកន្លងទៅនេះ។

គណៈ​កម្មាធិការស៊ើបអង្កេតរបស់រុស្ស៊ីបាននិយាយថា ចំនួនអ្នក​ស្លាប់​ពី​ការ​វាយ​ប្រហារ​បាន​កើន​ឡើង​ដល់​យ៉ាងហោចណាស់១៤៣នាក់ ដោយក្រុមខ្មាន់កាំភ្លើងក្លែងបន្លំខ្លួន បានបើក​ការ​បាញ់​ប្រហារ​ដោយ​ប្រើអាវុធស្វ័យប្រវត្ដិទៅលើអ្នកប្រគំតន្ដ្រីនៅក្នុងសាលាក្រុងក្រូឃើស(Crocus City) ជិត​រដ្ឋធានីនោះ។

គេនិយាយថា អ្នកខ្លះបានស្លាប់មុខរបួសគ្រាប់កាំភ្លើង និងខ្លះទៀតស្លាប់នៅក្នុងអគ្គិភ័យដ៍ធំមួយ ក្នុង​បរិវេណកន្លែងកើតហេតុ។ សេចក្ដីរាយការណ៍បាននិយាយថា ក្រុមខ្មាន់​កាំភ្លើ​ង​បាន​ដុត​ភ្លើង​ដោយ​ប្រើប្រាស់ប្រេងចេញពីកេសគ្រាប់ដែលពួកគេបានកាន់នៅក្នុងកាបូបស្ពាយ។

វិមានក្រឹមឡាំង បាននិយាយកាលពីថ្ងៃសៅរ៍ថា មនុស្ស១១នាក់ ក្នុងនោះរួមមាន៤នាក់ ជា​ជន​សង្ស័យ​ខ្មាន់​កាំភ្លើងដែលទាំក់ទងនឹងការវាយប្រហារដោយបង្ហូរឈាម ត្រូវបានចាប់ខ្លួនផងដែរ។

ក្រុម​សកម្មប្រយុទ្ធរដ្ឋអ៊ីស្លាម បានអះអាងទទួលខុសត្រូវចំពោះការវាយប្រហារកាលពីថ្ងៃសុក្រ ដែល​ជាការបង្ហូរឈាមខ្លាំងបំផុតក្នុងប្រទេសរុស្ស៊ីអស់រយ:ពេល២០ឆ្នាំកន្លងមកនេះ។

ប៉ុន្ដែ​មានតម្រុយជាច្រើនបង្ហាញថា រុស្ស៊ីកំពុងបន្ដករណីនេះ អាចទាក់​ទង​នឹង​ប្រទេស​អ៊ុយក្រែន​ទោះ​បី​ជា​មានសេចក្ដីថ្លែងការមួយចេញពីទីប្រឹក្សាប្រធានាធិបតីអ៊ុយក្រែនលោកមីខាអែល ប៉ូដូ​លីយ៉ាក (Mykhailo Podolyak) ដែលថា ក្រុងគីវគ្មានរឿងអ្វីដែលត្រូវធ្វើដូច្នោះឡើយ៕ អត្ថបទ៖ មករា