ក្រសួងទេសចរណ៍ រដ្ឋបាលខេត្តសៀមរាប និងសមាគមក្លឹបទេសចរណ៍សៀមរាប សហការជាមួយ សភាពាណិជ្ជកម្មបារាំង សភាពាណិជ្ជកម្មអ៊ឺរ៉ុប និងសម្ព័ន្ធភាពបារាំងខេត្តសៀមរាបរួមជាមួយវិស័យពាក់ព័ន្ធមួយចំនួនទៀត បានប្រារព្ធបើកព្រឹត្តិការណ៍អបអរសាទរទិវាបុណ្យប្រទេសនិយាយភាសាបារាំង។ ពិធីនេះ ធ្វើឡើងនៅសួនច្បារព្រះរាជដំណាក់ក្រុងសៀមរាប កាលពីរសៀលថ្ងៃទី២៣ ខែមីនា ឆ្នាំ២០២៤នេះ។
លោក យុន លីនណេ អភិបាលរងខេត្តខេត្តសៀមរាប មានប្រសាសន៍ថា ចាប់តាំងពីឆ្នាំ១៩៩៣ដល់ឆ្នាំ២០២៤ រដ្ឋបាលខេត្តសៀមរាបបានចងមេត្រីភាព សហប្រតិបត្តិការជាមួយខេត្ត-ក្រុងចំនួនពីរនៃសាធារណៈរដ្ឋបារាំងគឺក្រុង Fontainebleau និងខេត្ត អូឌឺសែន ហើយសម្ព័ន្ធ មេត្រីភាពនេះ ខេត្តសៀមរាបទទួលបាននូវលទ្ធផលគួរឱ្យកត់សម្គាល់ទាក់ទងទៅនឹងវិស័យវប្បធម៌ កសិកម្ម អប់រំ សុខាភិបាលនិងពាណិជ្ជកម្ម។ លោកបន្តថា ការកសាងទំនាក់ទំនង និងសហប្រតិបត្តិការនេះ ពិតជាបានរួមចំណែកយ៉ាងសកម្មដល់កិច្ចអភិវឌ្ឍប្រទេស។ ការប្រារព្ធវិធីនេះ នឹងកំណត់យកក្នុងខែមីនាជារៀងរាល់ឆ្នាំ ព្រោះ ប្រទេសកម្ពុជាជាប្រទេសស្ថាបនិកមួយនៃប្រទេសដែលនិយាយភាសាបារាំង។
ឯកឧត្តម ប៉ាក់ សុខុម រដ្ឋលេខាធិការក្រសួងទេសចរណ៍ មានប្រសាសន៍ថា ការរៀបចំព្រឹត្តិការណ៍នានាដែលជាកត្តាដ៏សំខាន់ក្នុងការទាក់ទាញទេសចរនិងវិនិយោគិន។ឯកឧត្តមបន្ដថា៖ រាជរដ្ឋាភិបាលកម្ពុជាក្រោមការដឹកនាំដ៏ត្រឹមត្រូវ ឈ្លាសវៃនិងស្វាហាប់ របស់សម្តេចធិបតី ហ៊ុន ម៉ាណែត នាយករដ្ឋមន្ត្រី វិស័យទេសចរណ៍នៅតែជាវិស័យអាទិភាពមួយដែលបានកំណត់ច្បាស់ក្នុងបញ្ចកោណទី២ស្តីពីការធ្វើពិពធកម្មសេដ្ឋកិច្ច តាមរយៈការធ្វើពិពិធកម្មក្នុងវិស័យទេសចរណ៍ ដោយបង្កើននូវប្រភេទសេវាកម្ម ផលិតផលទេសចរណ៍ និងព្រឹត្តិការណ៍ទេសចរណ៍សម្បូរបែបនានាសំដៅការទាក់ទាញនិងទទួលបាននូវភ្ញៀវទេសចរជាតិ-អន្តរជាតិឱ្យកាន់តែមានចំនួនកើនឡើងបន្ថែមទៀត ដែលធានាបាននូវការបង្កើតឱកាសការងារ និងបង្កើនប្រាក់ចំណូលជូនប្រជាពលរដ្ឋ ជំរុញការនាំចេញនៅនឹងកន្លែង ដែលចូលរួមដល់កំណើនសេដ្ឋកិច្ច និងបង្កើនចំណូលជាតិ ជាពិសេសចូលរួមដល់ការអភិរក្សវប្បធម៌ និងការការពារបរិស្ថានធនធានធម្មជាតិប្រកបដោយប្រសិទ្ធភាព និងការទទួលខុសត្រូវខ្ពស់ ដើម្បីរួមចំណែកដល់ការសម្រេចបានគោលដៅនៃយុទ្ធសាស្ត្របញ្ចកោណដំណាក់កាលទី១និងឈានទៅសម្រេចបានចក្ខុវិស័យកម្ពុជាឆ្នាំ២០៥០។
ព្រឹត្តិការណ៍អបអរសាទរទិវាសហគមន៍និយាយភាសាបារាំង មានរយៈពេលពីរថ្ងៃ គឺថ្ងៃទី២៣ និង២៤ខែមីនាឆ្នាំ២០២៤ មានការតាំងពិព័រ័ណ៍ និងលក់ចំណីអាហារ ភេសជ្ជៈ សម្ភារៈប្រើប្រាស់ របស់អាជីវករជាតិ និងអន្តរជាតិជាពិសេសអាជីករនៃប្រទេសនិយាយភាសាបារាំងដែលបានប្រកបអាជីវកម្មជាអចិន្ត្រៃយ៍ក្នុងក្រុងសៀមរាប។ ជាមួយគ្នានេះ ទិវានេះ បង្ហាញពីសាមគ្គីភាព និងសេចក្តីស្រឡាញ់របស់ពួកគេចំពោះភាសាបារាំងនិងភាពចម្រុះនៃវប្បធម៌ និងការស្រឡាញ់ភាសាបារាំងស្របទៅនឹងយុទ្ធនាការទស្សនាខេត្តសៀមរាបឆ្នាំ២០២៤ ដើម្បីផ្សព្វផ្សាយទេសចរណ៍ និងអបអរសាទរភាពជាដៃគូរវាងព្រះរាជាណាចក្រកម្ពុជា និងសាធារណៈរដ្ឋបារាំង ហើយភាពជាដៃគូនេះបានកសាងទំនាក់ទំនងកិច្ចសហប្រតិបត្តិការ និងសាមគ្គីភាពជាកត្តាមួយដ៏សំខាន់ក្នុងការអភិវឌ្ឍប្រទេសជាតិឱ្យកាន់តែរីចម្រើន៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
