រុស្ស៊ី បាននិយាយថា ខ្លួនបានចាប់ខ្លួនខ្មាន់កាំភ្លើងទាំងអស់បួននាក់ ដែល​សង្ស័យ​ថា​បាន​ធ្វើ​សកម្មភាព​បាញ់​សម្លាប់រង្គាលនៅក្នុងសាលប្រគំតន្ត្រីក្បែរទីក្រុងមូស្គូ ហើយលោ ប្រធានាធិបតី Vladimir Putin បានប្ដេជ្ញាថានឹងតាមរក និងដាក់ទោស អ្នកនៅពីក្រោយការវាយប្រហារនេះ។

ក្រុមសកម្មប្រយុទ្ធរដ្ឋអ៊ីស្លាមបានអះអាងទទួលខុសត្រូវចំពោះការសម្លាប់រង្គាលកាលពីថ្ងៃសុក្រសប្ដាហ៍មុន ប៉ុន្តែមានការចង្អុលបង្ហាញថា រុស្ស៊ីកំពុងស្វែងរកការជាប់ពាក់ព័ន្ធនឹងប្រទេសអ៊ុយក្រែន បើ​ទោះបីជាមានការបដិសេធយ៉ាងដាច់អហង្ការពីក្រុមមន្ត្រីអ៊ុយក្រែន ថាទីក្រុង Kyiv ពុំមាន​ពាក់ព័​ន្ធ​នឹង​ការវាយប្រហារនោះក៏ដោយ។

អភិបាលតំបន់ក្រុងមូស្គូលោក អាឌ្រៀល វ៉ូរ៉ូបយ៉េវ (Andrei Vorobyov) បាននិយាយថា សាក​សព​ចំនួន ១៣៣នាក់ត្រូវបានរកឃើញពីគំនរបាក់បែកក្នុងរយៈពេល ២៤ ម៉ោង ហើយក្រុ​មគ្រូ​ពេទ្យ​កំពុង ព្យាយាមសង្រ្គោះជីវិតមនុស្ស ចំនួន ១០៧នាក់ ។ និពន្ធនាយកទូរទស្សន៍រដ្ឋ ម៉ាហ្គារីតា ស៊ីម៉ុនយ៉ាន់ (Margarita Simonyan) បានផ្តល់ចំនួនអ្នកស្លាប់ ១៤៣ នាក់ ដោយ​ពុំ​បាន​ដក​ស្រង់ប្រភពណាមួយនោះទេ។ 

នៅក្នុង​សុន្ទរកថាតាមទូរទស្សន៍ លោក Putin បាននិយាយថា មនុស្ស ១១ នាក់ត្រូវបានឃុំខ្លួន រួម​ទាំងខ្មាន់កាំភ្លើងបួននាក់ផងដែរ។ យោងទៅតាមទិន្នន័យបឋម លោកបាននិយាយថា ពួកគេបានព្យាយាមលាក់ខ្លួន និងរត់ទៅប្រទេសអ៊ុយក្រែន ជាទីដែលផ្លូវមួយ ត្រូវ​បាន​រៀបចំ​សម្រាប់​ពួក​គេនៅខាងអ៊ុយក្រែន ដើម្បីឆ្លងកាត់ព្រំដែនរដ្ឋ ។

សេវា​សន្តិសុខ FSB របស់រុស្ស៊ីបាននិយាយថា ក្រុមខ្មាន់កាំភ្លើងទាំងនោះ មាន​ទំនាក់​ទំនង​ក្នុង​ប្រទេស​អ៊ុយក្រែន ហើយត្រូវបានចាប់ខ្លួននៅជិតព្រំដែន។ ប្រភពដដែល បាន​និយាយ​ថា​ពួក​គេ​ត្រូវ​បាន​បញ្ជូនទៅកាន់ទីក្រុងមូស្គូ៕