ក្រសួងសុខាភិបាលគ្រប់គ្រងដោយក្រុមហាម៉ាស បាននិយាយថា ចំនួនអ្នកស្លាប់របស់ពលរដ្ឋ​ប៉ាឡេស្ទីនពី​ការវាយប្រហារនៅតែបន្តរបស់អ៊ីស្រាអែលលើតំបន់ហ្កាហ្សាស្ទ្រីប បានកើនឡើងដល់ ៣២.២២៦ នាក់ និង ៧៤.៤១២ នាក់ផ្សេងទៀតបានរងរបួស។

ក្រសួងខាងលើនេះបាននិយាយនៅក្នុងសេចក្តីថ្លែងការណ៍មួយថា កងទ័ពអ៊ីស្រាអែល​បាន​សម្លាប់​ជន​ជាតិ​ប៉ាឡេស្ទីន ៧២នាក់ និងបណ្ដាលឲ្យ១១៤នាក់ផ្សេងទៀតរងរបួស ក្នុងរយៈពេល ២៤​ម៉ោង​កន្ល​ងមកនេះ។

ទន្ទឹមនឹងនេះ ការិយាល័យប្រព័ន្ធផ្សព្វផ្សាយរបស់រដ្ឋាភិបាលគ្រប់គ្រងដោយក្រុមហាម៉ាស បាន​និយាយ​ថា កងទ័ពអ៊ីស្រាអែល បានគម្រាមបំផ្ទុះគ្រាប់បែក និងបំផ្លាញអគារមន្ទីរពេទ្យ Al-Shifa ក្នុង​ទីក្រុងហ្កាហ្សា។

ការិយាល័យខាងលើបាននិយាយនៅក្នុងសេចក្តីថ្លែងការណ៍មួយថា យើង​បាន​ទទួល​ដំណឹង​ពី​ខាង​ក្នុង​អគារមន្ទីរពេទ្យ Al-Shifa ដែលបង្ហាញថា កងទ័ពអ៊ីស្រាអែល បានគំរាម​កំហែង​បុគ្គលិក​ពេទ្យ និងជនភៀសខ្លួននៅខាងក្នុងអគារថា ខ្លួននឹងបផ្ទុះគ្រាប់បែកកម្ទេចមន្ទីរពេទ្យនោះ បើ​បុគ្គលិក និងពលរដ្ឋមិនព្រមចាកចេញពីទីនោះ ឬនឹងត្រូវរងការធ្វើបាប និងការប្រហារជីវិត។

កង​ទ័ពអ៊ីស្រាអែលបាននិយាយនៅក្នុងសេចក្តីថ្លែងការណ៍មួយថា កងកម្លាំងរបស់ខ្លួន និង​សេវា​សន្តិសុខ Shin Bet បានបន្តប្រយុទ្ធគ្នានៅក្នុងតំបន់មន្ទីរពេទ្យ Al-Shifa ដោយបញ្ជាក់ថាមនុស្ស ១៧០នាក់​ត្រូវបានសម្លាប់នៅក្នុងតំបន់នោះ និងជាង៨០០ នាក់ផ្សេងទៀតត្រូវបានចាប់ខ្លួន៕