ព្រះពុទ្ធបដិមារអង្គធំ មានទំហំធំជាងគេបង្អស់ក្នុងខេត្តពោធិ៍សាត់ មានទំរង់ជាព្រះពុទ្ធផ្ចាញ់មារ កម្ពស់សរុប២៩ម៉ែត្រ ស្ថិតក្នុងវត្តវាល ក្រុងពោធិ៍សាត់ ដែលកន្លងមកមានផ្ទុះការរិះគន់ និង​ជជែក​វែក​ញែក​ជាច្រើន ដោយសារមានរូបរាងខុសខ្នាត និងពុំសូវស្អាត សមរម្យនោះ ត្រូវបាន​ស្ថាបនា​ជួស​ជុល​កែលម្អឡើងវិញរួចរាលហើយប្រកបដោយរចនាបទយ៉ាងរស់រវើក ស្រប​តាម​ប្រពៃណី​នៃ​ព្រះពុទ្ធ​សាសនាគួរជាទីជ្រះថ្លា។

បន្ទាប់ពីការស្ថាបនាជួសជុលកែលម្អរួចរាល់ ព្រះពុទ្ធបដិមារអង្គធំនេះ រួម​និង​ចូឡាមុនី​ចេតិយដ៍​ស្កឹមស្កៃ​សម្រាប់​តម្កល់ព្រះបរមសារីរឹកធាតុ និងសមិទ្ធផលថ្មីៗជាច្រើនទៀតក្នុងវត្តវាល ត្រូវ​បាន​ធ្វើ​ពិធី​បុណ្យពុទ្ធាភិសេក និងបុណ្យឆ្លង សម្ពោធដាក់ឲ្យប្រើប្រាស់ជាផ្លូវការ រយៈពេល២យប់២ថ្ងៃ ក្រោម​អធិបតីភាព ឯកឧត្តមនាយឧត្តមនាវី ទៀ វិញ អគ្គមេបញ្ជាការរងកងយោធពលខេមរៈភូមិន្ទ និង​ជា​មេបញ្ជាការកងទ័ពជើងទឹក និងលោកជំទាវ កាន់ ចន្ទ្រា, ឯកឧត្តម ខូយ រីដា អភិបាល​នៃ​គណៈ​អ​ភិបាលខេត្តពោធិ៍សាត់ ។ ក្នុងពិធីបុណ្យនេះ ក៏មានការនិមន្តព្រះធម្មកធិក សម្ដែង​ព្រះធម៌​ទេសនា​គ្រែពីរ ដោយព្រះគ្រូបុណ្ណលក្ខណ៍ ម៉ម សុភក្ដី ព្រះរាជាគណៈ​ថ្នាក់​កិត្តិយស​នៃ​ព្រះរាជា​ណា​ចក្រ​កម្ពុជា និងព្រះគ្រូ​បញ្ញា​រក្ខិតមង្គល ស្វាយ វ៉ើន ព្រះសមុហ៍គណខេត្តពោធិ៍សាត់ផងដែរ ។

លោក អែម សុធា ប្រធានមន្ទីរធម្មការនិងសាសនាខេត្តពោធិ៍សាត់ បានឲ្យដឹងពីប្រវត្តិ​នៃកា​រ​កសាង​ ព្រះពុទ្ធបដិមារអង្គធំនៅវត្តវាលនេះ គឺផ្តើមកសាងតាំងពីឆ្នាំ២០០៩ ដោយសារ​កម្លាំង​សាមគ្គី ​និងចិត្តជ្រះថ្លារបស់ព្រសង្ឍ និងពុទ្ធបរិស័ទ្ធការសាងសង់ដោយក្រុមជាងក្នុងវត្តផ្ទាល់ មិន​ជួល​ជាង​មកពីខាងក្រៅនោះទេ ហើយធ្វើការកសាងបន្តិចម្តងៗ រហូតដល់ឆ្នាំ២០១២ទើបរួចរាល ដោយ​មាន​កម្ពស់​សរុប២៩ម៉ែត្រ និងភ្នែនប្រវែង២១ម៉ែត្រ ចំណាយថវិកា​អស់​ប្រមាណ​៧​ម៉ឺន​ដុល្លារ ​ក្នុងកំឡុងពេលសាងសងនោះ ពុំទាន់មាន​ច្បាប់​តម្រូវ​អោយមា​ន​ការ​ស្នើ​សុំ​មុន​ពេល​សាង​សង់ សំណង់ធំៗតាមវត្តអារាមនោះទេ ។ ហើយរហូតដល់ឆ្នាំ២០២៣ ទើបផ្ទុះការរិះគន់ និង​ជជែក​វែក​ញែកជាច្រើន លើបណ្តាញសង្គម អំពីព្រះពុទ្ធបដិមារអង្គធំនេះ ដែលមាន​ទម្រង់​មិន​សូវ​ស្អាត ។ បន្ទាប់ពីមានការរិះគន់ដូចនេះ ក្រសួងធម្មការនិងសាសនា សហការ​ជាមួយ​រដ្ឋបាល​ខេត្ត​ពោធិ៍សាត់ បានរៀបចំគណៈកម្មការសម្រាប់ដោះស្រាយបញ្ហានេះដោយមាន មន្ទីរ​ធម្មការ និង​សាសនា រួមនិងមន្ទីរវប្បធម៌ជាអ្នកទទួលបន្ទុប ដោយសម្រេចថាធ្វើការជួសជុលកែលម្អឡើងវិញ ចាប់​តាំងពីថ្ងៃទី៣ ខែសីហា ឆ្នាំ២០២៣ ចំពោះការជួសជុលកែលម្អរគឺ មានច្រើនចំណុច និង​ត្រូវ​ការ​ពេលវេលាច្រើន ដោយក្រុមជាងជំនាញ់មកពីខេត្តកំពង់ឆ្នាំង ។ លោក អែម សុធា បានបន្ត​ឲ្យ​ដឹង​ថា ចាប់ពីឆ្នាំ២០១៤ ក្រសួងធម្មការនិងសាសនា រួមនិងក្រសួងវប្បធម៌និងវិចិត្រសិល្បៈ បាន​ដាក់​ចេញ​នូវច្បាប់អន្តរក្រសួង ដោយតម្រូវ​ឲ្យ​គ្រប់​វត្ត​អារាម​ទាំង​អស់​ពេល​ត្រូវ​កសាង​សំណង់​ធំ​ៗ​អ្វីមួយ ត្រូវស្នើរឆ្លងនិងសុំច្បាប់អនុញ្ញាតពីក្រសួងទាំងពីរជាមុនសិន បើត្រូវតាមរចនាបទ ខ្នាត​និង​ទំរង់​ដើមទើប អាចសាង​សង់​បាន៕អត្ថបទ៖ ភិរុណ ពៅ