ក្រុមនិស្សិតអាហារូបករណ៍ថ្នាក់ដឹកនាំកំពូលរបស់រាជរដ្ឋាភិបាល មក​ពី​វិទ្យាស្ថាន​ខ្មែរ​ជំនាន់​ថ្មី​ចំនួន​១៣៩រូប បានធ្វើទស្សនៈកិច្ចសិក្សានៅតាមប្រាសាទបុរាណមួយចំនួនក្នុងតំបន់អង្គរ ដើម្បី​ឈ្វែង​យល់​ពីប្រវត្ដិសាស្ដ្រវប្បធម៌ សំណង់ស្ថាបត្យកម្ម បន្ទាប់ពី​ពួកគាត់ធ្លាប់​បាន​សិក្សា​តាម​ទ្រឹស្ដី​នៅ​ក្នុង​សាលា។ ការធ្វើទស្សនកិច្ចនេះ មានរយៈពេល៣​ថ្ងៃចាប់ពីថ្ងៃទី​២២​ដល់ថ្ងៃទី២៣ខែមីនា​ឆ្នាំ២០២៤។

លោកបណ្ឌិត កុល សារូ នាយករងនៃវិទ្យាស្ថានខ្មែរជំនាន់ថ្មី មានប្រសាសន៍ថា ពួកគាត់​បាន​សិក្សា​​នៅ​វិទ្យាស្ថានខ្មែរជំនាន់ថ្មី ថ្នាក់បរិញ្ញាប័ត្រ និងបរិញ្ញាប័ត្រជាន់ខ្ពស់ ដែលជា​អាហា​រូបករណ៍​ថ្នា​ក់ដឹកនាំជាន់ខ្ពស់របស់កម្ពុជា ហើយពួកគាត់​តែង​តែ​ទៅ​ធ្វើ​ទស្សន​កិច្ច​សិក្សា​ជា​រៀង​រា​ល់ឆ្នាំ ពី​ប្រវត្ដិសាស្ដ្រវប្បធម៌ និងសំណង់ប្រាសាទបុរាណនៅតំបន់រមណីយដ្ឋានអង្គរ ដែល​មក​ដល់​ពេល​នេះ​ជា​លើកទី២៤ហើយ។

ប្រាសាទដែលបានចុះទៅសិក្សាស្រាវជ្រាវ រួមមាន ប្រាសាទបាគង ប្រាសាទបន្ទាយស្រី ប្រាសាទបន្ទាយសំរ៉ែ ប្រាសាទអង្គរវត្ដ និងប្រាសាទសំខាន់ៗ​មួយ​ចំនួនទៀត។ ក្រោយ​ពេលបំពេញទស្សនកិច្ច ក្រុមនិស្សិតបានបានយល់ដឹងច្រើនពី​បេតិកភ័ណ្ឌ​សំណង់​ប្រាសាទខ្មែរ។លោកបណ្ដិតបន្ថែមថា ក្រុមនិស្សិតមានជំនាញខ្លះរៀនជំនាញផ្នែកច្បាប់ រៀន​វិទ្យាសាស្ដ្រអប់រំ ប៉ុន្ដែពួកគាត់ត្រូវតែចេះចឹងពីប្រវត្ដិសាស្ដ្ររបស់ខ្លួនផងដែរ ព្រោះ​ការ​គ្រប់​គ្រង​រដ្ឋ​មួយត្រូវការចេះច្រើនជំនាញ។ក្នុងនាមជាយុវជន ត្រូវចូលរួម តាមដាន​នឹង​ថែ​រក្សា​តម្លៃ​នៃ​បេតិកភ័ណ្ឌ​ដ៏​អច្ចារ្យនេះ។ លោកបណ្ឌិត ក៍បានថ្លែងអំណរគុណដល់នាយកវិទ្យាស្ថាន​ដែល​តែង​ផ្ដល់​ឱ្យ​និស្សិត​ចុះ​កម្មសិក្សាឈ្វែងយល់ពីប្រាសាទបុរាណផងដែរ។

តំណាងឱ្យក្រុមនិស្សិតនិមួយៗ ពួកគាត់បានលើកឡើងថា ការធ្វើទស្សកិច្ចរយៈពេលបីថ្ងៃនេះ បាន​ធ្វើ​ឱ្យពួកគាត់ស្គាល់កាន់តែច្បាស់ពីសំណង់ស្ថាបត្យកម្មរបស់បុព្វការីជន ដែលបាន​បន្សល់​ទុក​ឱ្យ​ខ្មែរ​ជំនាន់ក្រោយ។ ពួកគាត់បន្ដថា ប្រវត្ដិសាស្ដ្រវប្បធម៌ អរីយធម៌ ពិតជាបេតិកភ័ណ្ឌរបស់​ជាតិ​ខ្មែរ មិនអាចរកអ្វីមកកាត់ថ្លៃបានឡើយ។ការកសាងប្រាសាទនិមួយរបស់បុព្វបុរសខ្មែរ គឺ​មាន​ភាព​អស្ចារ្យ​ខ្លាំងណាស់ ដែលប្រទេសដ៏ទៃទៀតមិនអាចធ្វើបាន។ ពួកគាត់នឹងចូលរួម​ថែរក្សា​នូវ​ប្រវត្តិ​សាស្ដ្រវប្បធម៌របស់ខ្មែរឱ្យបានគង់វង្ស។

ពួកគាត់ក៏​បានថ្លែងអំណរគុណដល់ថ្នាក់ដឹកនាំ ដែល​តែ​យកចិត្ដទុកដាក់ផ្ដល់អាហារូបករណ៍ និងផ្ដល់ឱកាសឱ្យក្រុមនិស្សិត​ធ្វើ​កម្ម​សិក្សា​ស្វែង​យល់​ពី​បេតិកភ័ណ្ឌបន្ថែមទៀតពីលើទ្រឹស្ដី នៅតាមប្រាសាទបុរាណក្នុងតំបន់រមណីយដ្ឋានអង្គរ។ បើតាមលោកបណ្ឌិត កុល សារូ បានលើកឡើងថា ការទស្សនកិច្ច​សិក្សា​ឈ្វែង​យល់​ពី​ប្រវត្ដិ​សាស្ដ្រ​វប្បធម៌ របស់និស្សិតនៅវិទ្យាស្ថានខ្មែរជំនាន់ថ្មី ដល់ពេលនេះជា​លើ​កទី២៤​។​ ក្រុម​និស្សិត​ទាំង​នោះ ជានិស្សិតអាហាររូបករណ៍របស់សម្ដេចតេជោ និងសម្ដេចកិត្ដិព្រឹទ្ធបណ្ឌិត សម្ដេច​មហា​បវរ​ធិបតី ហ៊ុន ម៉ាណែត និងលោកជំទាវ, សម្ដេចក្រឡាហោម ស ខេង និងឯកឧត្ដមអភិសន្ដិបណ្ឌិត ស សុខា ឯកឧត្ដម ឧនាយករដ្ឋមន្ដ្រី សាយ សំអាល់ និងឯកឧត្ដម ឧបនាយករដ្ឋមន្ដ្រី ហ៊ុន ម៉ានី ៕