មនុស្សរាប់រយនាក់បានប្រមូលផ្តុំគ្នានៅទីក្រុង Tel Aviv កាលពីចុងសប្ដាហ៍នេះ ជំរុញ​ឱ្យ​រដ្ឋាភិបាល​អ៊ីស្រាអែល ធ្វើកិច្ចព្រមព្រៀងជាមួយក្រុមហាម៉ាស ដើម្បី​ធានា​ការ​ដោះលែង​ចំណាប់​ខ្មាំង​ដែល ត្រូវបានឃុំខ្លួននៅក្នុងតំបន់ហ្កាហ្សា។  

គណៈប្រតិភូអ៊ីស្រាអែល ដឹកនាំដោយប្រធានចារកម្មម៉ូហ្សាដ (Mossad) លោក ដេវីដ បានី (David Barnea) កំពុងស្ថិតនៅក្នុងទីក្រុងដូហា (Doha)ប្រទេសកាតា សម្រាប់​ការ​ចរចា​ដោយ​ប្រយោល​ជាមួយក្រុមសកម្មប្រយុទ្ធហាម៉ាសប៉ាឡេស្ទីន ដែលប្រមុខទីភ្នាក់ងារ CIA របស់​សហរដ្ឋ​អាមេរិក លោក វីលៀម ប៊ន (William Burns) កំពុងជួយប្រទេសកាតា និងក្រុមមន្ត្រីអេហ្ស៊ីប ក្នុង​ការសម្របសម្រួលឲ្យមានបទឈប់បាញ់និងការដោះដូរចំណាប់ថ្នូរ។ 

ភាគីទាំង​នោះ​ធ្លាប់បាននិយាយកាលពីកន្លងទៅថា ប្រសិនបើកិច្ចព្រមព្រៀងមួយត្រូវបានសម្រេច អ៊ីស្រាអែល​នឹងផ្អាកការវាយលុកនៅតំបន់ហ្កាហ្សាសម្រាប់រយៈពេល៦សប្តាហ៍ និងសង្គ្រោះ​ចំណាប់​ខ្មាំង​៤០ នាក់ក្នុងចំណោម១៣០នាក់ ដែលនៅតែត្រូវបានឃុំខ្លួនដោយក្រុមហាម៉ាស ពី​ការ​វាយលុកឆ្លងព្រំដែនកាលពីថ្ងៃទី ៧ ខែតុលាឆ្នាំ២០២៣ បង្ក​ឱ្យ​ផ្ទុះ​សង្រ្គាម​រហូត​ដល់​សព្វ​ថ្ងៃ​នេះ​។   

ក្រុមហាម៉ាស ចង់ឱ្យបទឈប់បាញ់ណាមួយ រួមបញ្ចូល​ការ​ប្ដេជ្ញា​ចិត្ត​រប​ស់​អ៊ីស្រាអែល​ក្នុង​ការ​បញ្ចប់​សង្គ្រាម និងដកកម្លាំងចេញពីតំបន់ហ្កាហ្សា តែអ៊ីស្រាអែល បានច្រាន​ចោល​ការ​លើក​ឡើង​នេះ​ ដោយនិយាយថា ខ្លួននឹងជំរុញយុទ្ធនាការដើម្បីកម្ទេចក្រុមហាម៉ាសឲ្យដល់ឬសគល់៕